Read wanga 1 AKAKHALE 5 Bible Online

1 AKAKHALE 5 - wanga bible

1 AKAKHALE 5

¹Bano nibo abolwibulo lwa Rubeni owali omukhulundu mubasiani ba Yakobo. Rubeni yakhaywa okhunyoola ikhabi yobukhulundubwe shichila yakona nende abakhasi ba samwana yabiikha; ne ikhabi eyo yahelesibwa Yusufu

²Oluyia ulwa Yuda nilwo olwali olwa amaani muno, khandi nilwo olwarulangamwo abaruchi bokhuruka tsimbia tsiosi.

³Rubeni owali omusiani omukhulundu wa Yakobo yali nabasiani bane bano; mbu Hanoki, Palu, Hezironi nende Karimi.

⁴Abolwibulo lwa Yoeli bali bano; Yoeli yali samwana Shemayia; naye naba samwana Koki owali samwana Shimei,

⁵owali samwana Mika, owali samwana Reaya, owali samwana Baali,

⁶owali samwana Beera. Omuruchi Tigilatsi Pileseri wa Asiria yatiila Beera owali omwimilisi owoluyia olwo, mana namukhola okhutsia mushialo shindi.

⁷Akalondakhwo kano, niko ameera kabeshilibwa shia aboluyia lwa Rubeni, abali abimilisi: Yeyieli, Zakaria,

⁸nende Bela omusiani wa Asasi khandi omwitsukhulu wa Sheema weshilibwa shia Yoeli. Abeshilibwa bano bamenyanga Aroeri, mulukongo yaho emasaba (enotsi) okhuula Nebo nende Baali Meoni.

⁹Bali nibaruka ebiayo ebinji mushialo shia Giliadi, kho nibamenya mushialo elubeka lwebukwe okhuula khushitsiimi shialaandaala okhuula khumuchela okwa Yufurate.

¹⁰Mutsinyanga tsiomuruchi Saulo, oluyia lwa Rubeni lwaseera Abahagiri, nibabeera mwihe mana nibabukula eshialo shiabwe eshili ebukwe elubeka wa Giliadi.

¹¹Oluyia lwa Gadi lwamenyanga ebukwe ewa oluyia olwa Rubeni mushialo shia Bashani okhuula ebukwe wa Saleka.

¹²Yoeli naye omwimilisi weshilibwa eshikali naye Shafumu naba omwimilisi weshilibwa shilondelela eshikali eshio. Yonai nende Shafati bali abemilisi bebilibwa bindi mushialo shia Bashani.

¹³Abandu bandi bolwibulo lwa Gadi bali abebilibwa musafu bino mbu; Mikaeli, Meshulamu, Sheba, Yorai, Yokani, Zia nende Eberi.

¹⁴Bali abolwibulo lwa Abihaili omusiani wa Huri, owa bakuukabe balondananga mukhwibulwa bari; Abihaili yali omusiani wa Huri, owali omusiani wa Yaroa, owali omusiani wa Giliadi owali omusiani wa Mikaeli, owali omusiani wa Yeshishai owali omusiani wa Yahido owali omusiani wa Buzi. Yahido owali omusiani wa Buzi.

¹⁵Ahi omusiani wa Abudieli khandi omwitsukhulu wa Kuni naye owali omwimilisi webilibwa ebio.

¹⁶Bamenyanga mutsingongo tsia Bashani nende Giliadi mumataala ka yaho nende tsinzayilo tsiosi etsia Sharoni.

¹⁷Amakhuwa kano hakhunjelesibwa nikahandikwa mutsinyanga tsiomuruchi Yotsamu wa Yuda nende omuruchi Yeroboamu wakhabili wa Isiraeli.

¹⁸Mutsimbia tsia Rubeni, Gadi nende inusu ya Manase, olwa Ebukwe, bali nende abelihe ebikhumila amakhumi kane nende bine, ebikhumi musafu nende amakhumi kasasaba (44,760) abechesibwa obulayi okhulwana nibekhoonyelanga ebikhumba, tsinganga nende obuyingo

¹⁹Batsia okhulwana Abahagiri tsimbia tsia Yeturi, Napishi nende Nodabu.

²⁰Basuubilila mu Nyasaye mana nibamusaba obukhoonyi naye Nyasaye nahulila okhusaba khwabwe mana nabakhola okhuhula Abahigiri nende abasanjilananga ninabo boosi.

²¹Bayaaya tsingamia ebikhumila amakhumi karano (50,000), amakondi ebikhumila ebikhumi bibili namakhumi karano (25,000), tsisishili ebikhumila bibili (2,000) nende ababohe ebikhumila eshikhumi (100,000) okhurula mubasuku babwe.

²²Beera abasuku abo abanji shichila lihe lialiho khulwa okhwenya khwa Nyasaye. Mana nibatsiililila okhumenya mushialo eshio okhuula olwa batiilwa nibayilwa mushialo shindi okhuba ababohe.

²³Abandu boluyia olwa Ebukwe lwa Manase bamenyanga mushialo shia Bashani okhuula elubeka lwemasaba lwa Baali Herimoni, Seniri nende Eshikulu shia Herimoni nalwo olwibulo lwabwe nilutsiililila okhwinjila muno.

²⁴Abalondakhwo bano nibali abemilisi babwe; Eferi, Ishi, Elieli, Asirieli, Yeremia, Hodawia nende Yahidieli. Bosi bali nibamanyikha okhuba abelihe abalulu bitswoni khandi abemilisi abalayi abamanyikha bebilibwa biabwe.

²⁵Abandu shibaali abesiikwa khu Nyasaye wabakuuka babwe tawe, mana nibamulekha nibenamila abanyasaye bamahanga kandi aba Nyasaye yali niyarusia mushialo eshio.

²⁶Kho Nyasaye nakhola omuruchi Puli wa Asiria owamanyikha khandi shinga Tigilatsi Pilesa okhuseera eshialo shiabwe. Yayila mumbohe tsimbia tsia Rubeni, Gadi, inusu yoluyia lwa Manase olwa Ebukwe mana nitsimenya inziayo mushialo shia Hala, Habori Hara nende khumuchela kwa Gozani.