Read wanga 1 AKAKHALE 9 Bible Online

1 AKAKHALE 9 - wanga bible

1 AKAKHALE 9

¹Abandu boosi aba Isiraeli bahandikungwa ameera okhulondana netsinzu tsiabwe, ne amakhuwa ako koosi kahandikwa Mushitabu eshia Abaruchi ba Isiraeli. Abandu beshialo shia Yuda bali nibahambwa nibayilwa Babuloni ekhuhebwa eshinyasio khulwa okhubela obwonooni bwabwe.

²Abaranjilila okhukalukha khumikunda chiabwe mumatookho kabwe bali abandu butswa Abaisiraeli, abesaaliisi, Abalawi nende abasaatsa bakhalabananga muhekalu.

³Abandu okhurula mutsimbia tsia Yuda, Benjamini, Efuraimu nende Manase batsia okhumenya Yerusalemu.

⁴Abolwibulo lwomusiani wa Yuda oulangwa mbu Perezi bali nomwimilisi wabwe owelira mbu Utasi omusiani wa Amihudi omwitsukhulu wa Omuri. Abolwibulo lulwe bandi bali Imuri nende Bani.

⁵Abolwibulo lwomusiani wa Yuda oulangwa mbu Shela bali nomwimilisi weliira mbu Asayia, owali omusinjilili wa abeinzu yabwe.

⁶Abolwibulo lwomusiani wa Yuda mbu Zera bali nomwimilisi wabwe oulangwa mbu Yeweli. Abandu bolwibulo lwabeinzu yoluyia lwa Yuda bali ebikhumi amakhumi kasasaba nende amakhumi shienda (690).

⁷Abandu bolwibulo lwa Benjamini abamenyanga Yerusalemu bali Salu omusiani wa Meshulamu, owali omusiani wa Hodawia, naye Hodawia yali omusiani wa Hesenua.

⁸Ibuneyia omusiani wa Yerohamu; Ela omusiani wa Uzi, nende omwitsukhulu wa Mikiri. Meshulamu omusiani wa Shefatia owali omusiani oa Rumeli owali omusiani wa Ibiniya.

⁹Abandu betsinzu tsioluyia lwa Benjamini luno olwamenyanga hano bali ebikhumi shienda nende amakhumi karano nabasasaba. Abasaatsa boosi aba ameera kabwe karumbulwa bali abemilisi ba abetsinzu tsiabwe.

¹⁰Abesaaliisi abamenyanga Yerusalemu bali Yedaya, Yehoyaribu nende Yakini.

¹¹Azaria omusiani wa Hilikia, owa bakuukabe bali Meshulamu, omusiani wa Zadoki owali, omusiani wa Merayotsi owali omusiani wa Ahitubu, owali omwimilisi omukhongo wa Muhekalu.

¹²Adayia omusiani wa Yerohamu, owa bakuukabe bali Pashuri nende Malikiya. Maasayi omusiani wa Adieli, owa bakuukabe bali Yahuzera, Meshulamu, Meshilemitsi nende Imeri.

¹³Abesaaliisi abali abemilisi babetsinzu bali eshikhumila shilala, ebikhumi musafu nende amakhumi kasasaba (1,760). Bali nibamanya okhukhola obulayi emilimo chiosi echiakholungwa Muhekalu.

¹⁴Abalawi abamenyanga Yerusalemu bali Shemayia omusiani wa Hashubu, wa bakuukanyene bali Azirikamu nende Hoshabia; abeshilibwa eshia Merari.

¹⁵Bakibakari; Heresi nende Galai; nende Matania omusiani wa Mika, owali omusiani wa Zikiri omusiani wa Asafu.

¹⁶Obadia omusiani wa Shemayia omusiani wa Gala, owali omusiani wa Yedutsuni nende Berekia omusiani wa Asa, owali omusiani wa Elikana owamenyanga mumataala akali hambi mwitookho lia Netofa.

¹⁷Abalindi ba Ihekalu abamenyanga Yerusalemu bali Shalumu, Akubu, Talimoni nende Ahimani. Shalumu niye owali omwimilisi wabwe.

¹⁸Okhurula khale okhuula khunyanga etsio, abebilibwa biabwe bali nibarebwa habwinjililo weshilibwa shia Ihekalu eshia Omuruchi yenjililanga elubeka lwebukwe. Balindanga khale hashilibwa shia tsikambi tsia Abalawi.

¹⁹Shalumu omusiani wa Kore khandi omwitsukhulu wa Ebiasafu halala nende abandu bashie beshilibwa shia Kora, bali nomulimo kwokhulinda eshilibwa shiokhutsia khwiheema Litakatifu, shinga butswa abakuuka babwe balindanga olwa basinjililanga Ikambi eya OMWAMI Nyasaye.

²⁰Finehasi omusiani wa Eleazari yalikhwo omusinji wabwe shichila OMWAMI Nyasaye yamulindanga.

²¹Zakaria omusiani wa Meshelemia yesi khandi yali omulindi wa habwinjililo wa Liheema Litakatifu.

²²Abandu boosi halala abahulwa okhulinda habwinjililo nende ebilibwa bali ebikhumi bibili nende ekhumi nababili (212). Bahandikungwa ameera kabwe okhulondana nende amataala ka bamenyangamwo. Omuruchi Daudi nende omulakusi Samweli nibo abali nibaahula abakuuka babwe okhuba abakhongo mubwimilisi obwo.

²³Batsiililila halala nende abolwibulo babwe okhulinda habwinjililo bwa Ihekalu.

²⁴Buli eshilibwa shialiho eshiahenganga buli elubeka; emasaba, emulambo, ebukwe nende mumbo, ne buli shilala shialinji nomulindi omukhongo.

²⁵Abalindi abo bakhonyelelungwa nende abekho babwe, abamenyanga mumataala khandi nibongulanilanga okhulinda khulwa tsinyanga musafu.

²⁶Abalindi abakhongo bane bali Abalawi ne nibo abalinjinji nelikhuwa liamanyinjia ekekholekha. Balindanga khandi nende ebikoro ebili Muhekalu nende ebindu ebiareerungwa nibibikhwamwo.

²⁷Bamenyanga hambi nende Ihekalu, shichila kwalinji omulimo kwabwe okhuchilinda nende okhwikula emiliango chiayo buli mumabwibwi.

²⁸Abalwi bandi balindanga ebikaye biekhonyelungwa Muhekalu. Babihenjelesinjia nibiyilwa elwanyi khandi nende nibikalusibwa mukari buli lwosi olwa biekhonyelungwa.

²⁹Abandi bali abalindi bebindu ebitakatifu nende obusie, idivai, amafura akemitsaituni, obubane nende amafura keshing'ari.

³⁰Nebutswa omulimo kwakhutsokaasia amafura keshing'ari kwalinji okwa abesaaliisi.

³¹Omwisaaliisi oulangwa mbu Matihia owali omusani omukhulundu wa Shalumu, oweshilibwa shia Kora yali nomulimo kwokhukaasia emusango kwa mandasi amateshe.

³²Abandu abeshilibwa shia Kohatsi bali nomulimo kwokhutekha omukaate omutakatifu kwa Ihekalu buli khusabato.

³³Abandu bandi beinzu ya Abalawi bali abasinjilili betsinyimbo tsia Muhekalu. Abemilisi ba abetsinzu bano bamenyanga mutsinzu tsindala tsia Ihekalu ne bali nibaleshesibwa okhukhola emilimo olundi shichila balinji khumilimo eshiteere neshilo.

³⁴Abasaatsa baruumbuulwe abo bali abemilisi ba abetsinzu tsioluyia olwa Abalawi; okhulondana nende obwibulani bwabwe. Nibo abali abemilisi abamenyanga mu Yerusalemu.

³⁵Yeyieli niye owachachia litookho lia Gibeoni mana namenyaho. Omukhasiwe yalangungwa mbu Maaka.

³⁶Omusianiwe omukhulundu yali Abudoni ne abasianibe bandi bali Zuri, Kishi, Baali, Neri, Nadabu

³⁷Gedori, Ahio, Zekaria nende Mikilotsi,

³⁸owali samwana Shimea. Abolwibulo lwabwe bamenyanga Yerusalemu hambi nabetsinzu tsieshilibwa shiabwe.

³⁹Neri niye owali samwana Kishi, naye Kishi naba samwana Saulo. Saulo yebula abasiani bane mbu Yonatsani Malikishua, Abinadabu nende Eshibaali.

⁴⁰Yonatsani yali samwana Meribaali owali samwana Mika.

⁴¹Mika yebula abasiani bane mbu Pitsoni, Meleki, Tarea nende Ahazi.

⁴²Ahazi yali samwana Yara owali samwana abasiani bano bataru mbu Alemetsi, Azimawetsi nende Zimuri. Zimuri yali samwana Moza,

⁴³naye Moza naba samwana Binea, owali samwana Refayia; Refayia yali samwana Eleasa naye Eleasa naba samwana Azeli.

⁴⁴Azeli yebula abasiani basasaba mbu Azirikamu, Bokeru, Ishimaeli, Shearia, Obadia nende Hanani.