Read wanga 2 AKAKHALE 1 Bible Online

2 AKAKHALE 1 - wanga bible

2 AKAKHALE 1

¹Solomoni omusiani wa Daudi yaralila muburuchibwe khu Isiraeli, mana OMWAMI Nyasaye namuhelesia tsikhabi khandi namukhola owamaani muno.

²Omuruchi Solomoni yalaka abemilisi boosi emikanda echia abasinjilile emikanda chiabelihe eshikhumila (1,000), echia eshikhumi (100) nende abakhongobe boosi Muisiraeli nende abemilisi belilibwa nende abandu bandi boosi,

³mbu batsie ninaye habundu hokhwinamila Nyasaye ahali Gibeoni. Batsia ebweneyo shichila Liheema elia OMWAMI Nyasaye lia Musa omukhalabani wa OMWAMI Nyasaye yali niyombakha nali mushitsiimi liali ebweneyo.

⁴(Nebutswa Daudi yali niyanisia lisanduku lieindakano okhurula Kinatsi Yerimu niyaliyila Yerusalemu, ne niyalira mwiheema lia yali niyaliumbashila.)

⁵Nebutswa eshimalilo shiemisango shiomukasa shia Bezaleli omusiani wa Uri, omwitsukhulu wa Huri yali niyombakha shiali Gibeoni imbeli welisanduku liokhubaho okhwa OMWAMI Nyasaye. Omuruchi Solomoni halala nabandube boosi benamilanga OMWAMI Nyasaye habwene yaho.

⁶Imbeli weliheema elo omuruchi Solomoni yenamilaho OMWAMI Nyasaye khulwa okhumuhaanilaho shiemisango khushimalilo misango shiomukasa eshio emiruko chiokhusambwa eshikhumila shilala (1,000).

⁷Mushilo eshio Nyasaye yaloleshela Solomoni mana namureeba ari, “Nishiina eshia wakhenya mbu ekhuhelesie?”

⁸Naye Solomoni nakalusia ari, “Buli lwosi walolesiyenje obuheeli obukhongo khu papa wanje Daudi, ne bulano ufuchiliile isie okhukalukha mushilenjeshie.

⁹Kho OMWAMI Nyasaye heesia obusubisiebwo obwa wasuubisia Daudi papa wanje. Iwe unyemeshe okhuruka abandu abanji abalanyala okhubalwa ta;

¹⁰kho mbelesia obuchesi nende obumanyi kho ndimilile abandu bano. Nikalali kario ta isie ndakhanyala endie okhwimilila abandubo abanji bano?”

¹¹Nyasaye naboolela Solomoni ari, “Wahuule likhuwa lilayi; mushilenje shiokhusaba obuyinda, noho emiandu noho ifuma noho okhwirwa khwabasukubo, noho kata okhumeetwa tsinyanga tsiobulamubwo, iwe wusabile obuchesi nende obumanyi kho mbu wimilile abandu bandi aba ndakhwemeeshe okhuba omuruchi wabwe.

¹²Khulweshio enzia okhukhuhelesia obuchesi nende obumanyi, ne khandi okhumeetakhwo enzia okhukhuhelesia obuyinda, emiandu nende ifuma, ebiyombilekhwo ebia omuruchi wundi yesi yakhabekhwo ninabwo.”

¹³Mana omuruchi Solomoni narula habundu ahokhwinamila ahali Gibeoni yaho aha liheema elia OMWAMI Nyasaye liali ne natsia Yerusalemu. Ebweneyo niyo ewa yaruchila abandu ba Isiraeli.

¹⁴Solomoni yara halala amakaari kelihe nende tsifarasi, yali namakaari eshikhumila nebikhumi bine (1,400) nende tsifarasi ebikhumila ekhumi nabibili (12,000) etsia yara mu Yerusalemu ne etsindi tsiosi natsira mumatookho kandi.

¹⁵Mutsinyanga tsioburuchibwe ifetsa nende itsahabu biali mu Yerusalemu ebinji shinga amachina, nachio emisiita chiali eminji shinga emikhuyu chiokhumwalo khwebikulu.

¹⁶Tsifarasi tsia Solomoni tsiakulungwa okhurula Misiri nende Kilikia, abakholibe bobukhala nibo abakulanga okhurula ebweneyo.

¹⁷Bakulanga likaari elala okhurula Misiri khulwa ebitonye ebikhumi bisasaba (600) bieifetsa, ne ifarasi ndala khulwa ebitonye eshikhumi shilala namakhumi karano (150). Mana nabo bakusilia khubaruchi baba Hiti nende aba Siria.