Read wanga 2 AKAKHALE 10 Bible Online

2 AKAKHALE 10 - wanga bible

2 AKAKHALE 10

¹Rehoboamu yatsia Shekemu ewa abandu ba Isiraeli abelubeka lwemasaba boosi bali nibakhung'anile khulwa okhumwemekha okhuba omuruchi.

²Ne olwa Yeroboamu omusiani wa Nebati owali niyelushila Misiri okhurula khu Solomoni yahulilakhwo ako, yakalukha ingo.

³Abandu betsimbia tsielubeka lwemasaba bamulanga, mana boosi halala nibatsia khu Rehoboamu nibamuboolela bari,

⁴“Papawo Solomoni yakhurakhwo emisiko emisiro. Noba niwanguyia emisiko chino nende okhukhola obulamu bwefwe okhuba obulayi, kho nefu khulakhukhalabanila mubuhulili.”

⁵Mana Rehoboamu nababoolela ari, “Mukalushe olunyuma lwetsinyanga tsitaru” mana abandu abo nibarulaho nibenyokha.

⁶Omuruchi Rehoboamu natsia nareeba abakofu abachelelanga papawe Solomoni. Kho yabareeba ari, “Likhuwa shiina eliamwakhakhoonya ninalio elia enyala okhuboolela abandu bano?”

⁷Nabo nibamuboolela bari, “Noba nokholela abandu bano obulayi, nobachamisia khulwa okhubaboolela amakhuwa amalayi balakhukhalabanilanga buli lwosi.”

⁸Nebutswa Rehoboamu yachayilisia kabakofu abo bamuchelela, mana natsia khu abaraaka ba yakhula ninabo, khandi abali nibamuchelelanga amakhuwa.

⁹Nabareeba ari, “Nishiina eshia munzibalila okhukhola? Ne likhuwa shiina elia ndakhaboolela abandu bano abamboolelanga mbu, ndanguyie emisiko chiabwe?”

¹⁰Abaraaka abo nibamuboolela bari, “Kano niko akokhoyile okhubaboolela mbu, ‘Eshitere shianje eshitiiti neshisiro okhushila eshishienje shia papa wanje.

¹¹Papa wanje yamutukha emisiko emisiro, kho nasi enzia okhuchikhola emisiro okhushilakhwo. Papa wanje yamukhupanga netsisaala, nasi enzia okhumukhupa nolukhoba lweifarasi.’ ”

¹²Olunyuma lwetsinyanga tsitaru Yeroboamu halala nabandu boosi bakalukha khu Omuruchi Rehoboamu, shinga lwomwene yali nababooleele.

¹³Omuruchi Rehoboamu yalechelesia obuchetsiyi bwabakofu bali nibamwibaaliile, ne naboola nahalabila abandu,

¹⁴shinga olwa abaraaka abo bali nibamuboolele. Yaboola ari, “Papa wanje yamutuukha emisiko emisiro, nasi enzia okhumutuukha emisiro muno. Yamukhupanga netsisaala, nasi enzia okhumukhupa nolukhoba lweifarasi!”

¹⁵Kali kokhwenya khwa OMWAMI Nyasaye okhuhesia aka yali niyaboolela Yeroboamu omusiani wa Nebati okhubirira mumulakusi Ahiya owokhurula Shilo. Kano niko akachila omuruchi nalateeba abandu tawe.

¹⁶Olwa abandu abo balola mbu omuruchi alobile okhubarecheresia, baboolela omuruchi bari, “Ifwe khuli nomukabo shiina mu Daudi? Kata shikhulikhwo nobulaame mumwana wa Yese ta. Abandu ba Isiraeli chende khukalushe ingo! Leshe Rehoboamu aruche abeinzuye omwene.” Kho Abaisiraeli boosi nibakalukha ingo wabwe.

¹⁷Nebutswa Rehoboamu yasikala narukanga Abaisiraeli abasikala nibamenyile mumataala ka Yuda.

¹⁸Mana omuruchi Rehoboamu naruma Adoniramu owali omusinjilili wabakholi bemilimo chiokhulungibwa okhutsia khu Abaisiraeli, nebutswa Abaisiraeli abo bamulasa namachina nafwa. Khulwa amakhuwa ako omuruchi Rehoboamu yenjila mwikaarilie ne niyelukha natsia Yerusalemu.

¹⁹Khulweshio, okhurula olwo abandu boburuchi bwatsimbia tsiemasaba tsia Isiraeli nabobukhayi khuboluyia lwomuruchi Daudi okhuula olwa leelo.