Read wanga 2 AKAKHALE 11 Bible Online

2 AKAKHALE 11 - wanga bible

2 AKAKHALE 11

¹Olwa omuruchi Rehoboamu yola Yerusalemu, yalanga halala abalwani abalulu muno ebikhumila eshikhumi namakhumi munane (180,000) okhurula muboluyia lwa Benjamini nende olwa Yuda. Yali niyenyanga mbu atsie aseere lihe abetsimbia tsielubeka lwemasaba okhubukula oburuchi okhurula khubo bukalushe khuye.

²Nebutswa OMWAMI Nyasaye yaboolela omulakusi Shemayia,

³atsie aboolele omuruchi Rehoboamu nende abandu ba Yuda nende aba Benjamini ari,

⁴“Mulaseera Abaisiraeli bashienywe tawe. Mutsie ingo wenywe inywe mwesi, akekholeshe kano nakokhwenya khwanje.” Kho bamala nibahulila lilako lia OMWAMI Nyasaye mana nibalatsia okhuseera Yeroboamu tawe.

⁵Rehoboamu yamenya mu Yerusalemu mana niyombakha amasiisi okhusira amatookho ka Yuda nende Benjamini kaloondakhwo kano;

⁶Betselehemu, Etamu, Tekoa,

⁷Betsizuri, Soko, Adulamu,

⁸Gatsi, Maresha, Zifu,

⁹Adoraimu, Lakishi, Azeka,

¹⁰Zora, Aiyaloni nende Heburoni.

¹¹Yakasira obutinyu namasiisi mana niyaahula omwimilisi mubuli litookho, khandi naramwo tsinzu tsiokhubikhamwo ebiokhulia, amafura kokhumiseituni, nende idivai.

¹²Khandi yara mumatookho ako ebikhumba nende amafumo. Mana munjila yino nolwa yara aboluyia lwa Yuda nende olwa Benjamini hasi woburuchibwe.

¹³Abesaaliisi nende Abalawi okhurula mutsingongo tsia Isiraeli tsiosi bakholomokha emulambo nibatsia Muyuda.

¹⁴Abalawi balekha obwayilo bwabwe nende emikunda chiabwe chindi ne nibetsa Yuda nende Yerusalemu, shichila omuruchi Yeruboamu wa Isiraeli nende abaruchi bandi abakalukha muburuchibwe olunyuma shibabafuchilila okhukhalabana shinga abesaaliisi ba OMWAMI Nyasaye tawe.

¹⁵Omuruchi Yeroboamu yaahula abesaaliisibe omwene abokhukhalabana habundu hokhwinamila ebifwanani bieimbusi nende eshimoosi ebia yali niyakaasia.

¹⁶Okhurula mubandu abetsimbia tsia Isiraeli tsiosi, abo abenya okhwinamila OMWAMI Nyasaye wa Isiraeli balonda khubalawi nibatsia Yerusalemu khulwa okhukholela OMWAMI Nyasaye wabakuuka babwe emisango.

¹⁷Kano kakhola lihango lia Yuda okhuba namaani muno, ne khulwemiyika chitaru bakhonyelela Rehoboamu omusiani womuruchi Solomoni, mana nibamenya shinga olwa balinji nibali hasi hoburuchi bwomuruchi Daudi nende bwomuruchi Solomoni.

¹⁸Rehoboamu yateshia Mahalatsi, owa Samwana yali Yerimotsi omusiani wa Daudi, naye nyinamwana yali Abihaili omukhaana wa Eliabu ne yali omwitsukhulu wa Yese.

¹⁹Bebula abasiani bataru bano; Yeushi, Shemaria nende Zahamu.

²⁰Olunyumakhwo yateshia Maaka omukhaana wa Abusalomu, ne nibebula abasiani bane; Abiya, Ataayi, Ziza nende Shelomitsi.

²¹Rehoboamu yateshia abakhasi likhumi namunane nende abakhasi bandi ababiikha amakhumi kasasaba. Ne yebula abaana abasiani amakhumi kabili namunane nende abakhaana amakhumi kasasaba. Mubakhasibe boosi halala nende aba yali niyabiikha yali niyaheela Maaka omukhaana wa Abusalomu muno.

²²Khulweshio, yaahula Abiya omusiani wa Maaka okhusinjilila abasiani babwe okhuba yapaaranga mbu namwemeshe okhuba omuruchi.

²³Rehoboamu yakabula emilimo khubasianibe mubuchesi obukali, mana nabakaba boosi mumatookho kasirwa koosi mu Yuda nende mu Benjamini. Yabahelesia ebiokhulia bia batambanga biosi khandi nabarereera abakhasi abanji.