Read wanga 2 AKAKHALE 12 Bible Online

2 AKAKHALE 12 - wanga bible

2 AKAKHALE 12

¹Olwa Rehoboamu yali namalile okhwikhalila oburuchibwe obulayi, khandi nali owamaani muno, ye halala nende abandube boosi balekha okhulonda lilako lia OMWAMI Nyasaye.

²Mumuyika kwakharano muburuchi bwa Rehoboamu, Shishaki omuruchi wa Misiri yaseera Yerusalemu. Baseerwa khulwa okhubela baloba okhulonda amalako ka OMWAMI Nyasaye.

³Yabaseera nali namakaari kelihe eshikhumila nebikhumi bibili (1,200), nabo abokhuchendela khutsifarasi bali ebikhumila amakhumi kasasaba (60,000) nabo abandu ba yarula ninabo Misiri shibali abanyala okhubalwa tawe. Yabaseera nali halala nende abelihe okhurula Libia, Sukite nende Etsopia.

⁴Yahamba amatookho akali nikasirwa namasiisi ka Yuda okhutsia okhuula Yerusalemu.

⁵Mana omulakusi Shemayia natsia khumuruchi Rehoboamu nende khubemilisi ba Yuda abali nibakhung'anile Yerusalemu nibenyanga okhwilukha okhurula khumuruchi Shishaki, mana nababoolela ari, “Kano niko aka OMWAMI Nyasaye aboolanga khwinywe mbu, mwayandeshile, nasi bulano emalile okhumulekha mumakhono ka Shishaki.”

⁶Mana omuruchi halala nende abemilisi abo nibafuchilila mbu bonoonile mana nibaboola bari, “Aka OMWAMI Nyasaye akholanga nakahabwene.”

⁷Olwa OMWAMI Nyasaye yalola mbu betuutuyiyie abeene, yaboolela Shemayia ari, “Khulwa okhubela bafuchilile obwonooni bwabwe shindalabasasia tawe. Nebutswa olwa Shishaki abaseera balahonokokha hatiiti butswa. Abandu ba Yerusalemu shibalasalisibwa obululu neliruma lianje liosi tawe.

⁸Nebutswa Shishaki alabahula mwihe, nabo balamanya obwahukhani hakari wokhukhalabanila isie nende okhukhalabanila abaruchi bokhushialo.”

⁹Olwa Shishaki omuruchi wa Misiri yaseera Yerusalemu, yabukula amabikho komuhekalu ya OMWAMI Nyasaye nende akomunzu yomuruchi koosi. Yabukula ebindu biosi halala nende ebikhumba bieitsahabu ebia Omuruchi Solomoni yali niyakaasia.

¹⁰Ne mushilenje shiabio omuruchi Rehoboamu yakaasia ebikhumba biomukasa mana nabihaana mumakhono kabakhongo abalindanga khubilibwa bieinzu yoburuchi.

¹¹Mana buli lwomuruchi yenjilanga muhekalu, abalindi abo betsanga ninaye nibachinjile ebikhumba ebio, mana khandi babikalusia munzu yabalindi.

¹²Khulwa okhubela Rehoboamu yetuutuyia omwene, oburuma bwa OMWAMI Nyasaye shibwamala nibumusasilia elala tawe, khandi amakhuwa kamala katsiililile okhuba amalayi mu Yuda.

¹³Omuruchi Rehoboamu yaruka nali mu Yerusalemu mana niyemeeta obunyalibwe shinga omuruchi. Yachaaka okhuruka nali nemiyika amakhumi kane namulala, mana naruka emiyika likhumi namusafu nali mu Yerusalemu litookho lia OMWAMI Nyasaye yali niyaahula okhurula mutsimbia tsia Isiraeli tsiosi okhuba habunduwe hokhwinamilwa. Nyinamwana Rehoboamu yali Naamah owokhurula mushialo shia Ammoni

¹⁴Rehoboamu yakhola obwonooni shichila shiyateema okhukhola akokhwenya khwa OMWAMI Nyasaye tawe.

¹⁵Ne amakhuwa ka Rehoboamu yakhola okhurula mukhuchaaka okhuula mukhumalilisia, halala nende amakhuwa kabeinzuye kahandikwa mushitabu shiamakhuwa kobulamu bwomulakusi Shemayia, nende mushitabu shiamakhuwa kobulamu bwomulakusi Iddo. Rehoboamu nende Yeroboamu balwananga lihe abeene khubeene buli khase.

¹⁶Rehoboamu yafwa mana nayabilwa mubilindwa biabaruchi mwitookho lia Daudi. Mana omusianiwe mbu Abiya nakalukha mushilenjeshie shinga omuruchi.