Read wanga 2 AKAKHALE 13 Bible Online

2 AKAKHALE 13 - wanga bible

2 AKAKHALE 13

¹Mumuyika kwa likhumi namunane Yeroboamu nali omuruchi wa Isiraeli, Abiya yemekhwa okhuba omuruchi wa Yuda,

²mana naruka nali Yerusalemu khulwemiyika chitaru. Nyinamwana yalangwa mbu Mikaya omukhaana wa Urieli owokhurula mwitookho lia Gibea. Lihe liabuukha hakari wa Abiya nende Yeroboamu.

³Abiya yatsia mwihe nali nabalwani abalulu abandu ebikhumila ebikhumi bine (400,000). Naye Yeroboamu naba nabalwani abalulu abandu ebikhumila ebikhumi munane (800,000).

⁴Abalwani abo babukaanila mushialo shiebikulu shia Efuraimu. Omuruchi Abiya yatikulukha khushikulu shia Zemaraimu mana nalanjilisia naboolela Yeroboamu nende abandu ba Isiraeli boosi, ari, “Murecheresie,

⁵inywe shimumanyile mbu OMWAMI Nyasaye owa Isiraeli yakhola indakano eyilanyala okhufunakwa hakariwe nende Daudi, mana namuhelesia ye nende abetsukhulube oburuchi bwa Isiraeli khulwa inziayo tawe?

⁶Yeroboamu omusiani wa Nebati yakholela omuruchiwe Solomoni indiri.

⁷Ne olunyuma yakhung'asia omukanda kwabandu abayingwa khandi abalanyala eshindu ta, mana nibalunyia Rehoboamu omusiani wa Solomoni okhukhola aka bali nibenyanga. Naye yali nashili omubukha khandi nabula amachesi kokhubafukula.

⁸Nenywe bulano mwenyanga okhuseera lihe khuburuchi bwoluyali bwa OMWAMI Nyasaye yahelesia abetsukhulu ba Daudi. Inywe muli nabalwani abanji nende ebimoosi bieitsahabu ebia Yeroboamu yamukaasilia okhuba abanyasaye benywe.

⁹Mwalonda abesaaliisi aba OMWAMI Nyasaye, abali bolwibulo lwa Haroni, khandi nimulonda Abalawi. Mushilenje shiabwe mweyahulila abesaaliisi shinga olwa abamahanga bakholanga. Omundu yesi owitsa nende isurusi noho amakondi musafu anyala okhwemekhwa okhuba omwisaaliisi owa abanyasaye benywe.

¹⁰“Nebutswa ifwe khushikhalabanilanga OMWAMI Nyasaye wefwe, ne khushili okhumulekha. Abesaaliisi abolwibulo lwa Haroni bakhalabanilanga OMWAMI Nyasaye, ne Abalawi babakhoonyelelanga.

¹¹Buli mumabwibwi nende khungoloobe bahaananga obubane nende okhukhola emisango emisambe khu OMWAMI Nyasaye. Barenjekhanga eshihaanwa shiomukaate khumesa eyasiiywa, mana bahafia etsitaha etsili khushichibi shieitsahabu. Khukholanga aka OMWAMI Nyasaye wefwe yalaka. Nebutswa inywe mwamulekha.

¹²Nyasaye omwene niye omwimilisi wefwe, ne abesaaliisibe nibali netsinzika balakhupa oluhungu lwokhukhung'asia okhumuseera inywe. Inywe abandu ba Isiraeli mulalwane OMWAMI Nyasaye wabakuuka benywe tawe! Shimulahula lihe tawe!”

¹³Naye Yeroboamu yali narumile abalwanibe bandi okhutsia okhuseera abalwani ba Yuda nibabarulilanga inyuma, nabo abandi nibabaseera okhurulila imbeli.

¹⁴Abalwani ba Yuda bahenga eyi nende eyi, ne nibalola mbu babotokhaanwe. Kho nibahabila OMWAMI Nyasaye mbu abakhoonye, nabo abesaaliisi nibakhupa tsinzika tsiabwe.

¹⁵Abalwani ba Yuda baayula nomwoyo omukhongo, ne nibaseera lihe nibemiliilwe nende Abiya. Nyasaye yahula Yeroboamu halala nende abelihe ba Isiraeli.

¹⁶Mana aba Isiraeli nibelukha okhurula khuba Yuda, Nyasaye yanyalila aba Yuda okhuhula aba Isiraeli.

¹⁷Abiya halala nabalwanibe bakhupa ba Isiraeli obululu, okhuula abalwani abalulu aba Isiraeli ebikhumila ebikhumi birano (500,000) niberwa.

¹⁸Kho abandu ba Yuda nibahula aba Isiraeli shichila beleta khu OMWAMI Nyasaye wabakuuka babwe.

¹⁹Mana Abiya nalondachila abalwani ba Yeroboamu, ne nabukula malala khumatookhoke ka Betseli, Yeshana, Efuroni, halala nende amataala akali nikabotokhaane amatookho ako.

²⁰Yeroboamu shiyanyoola amaani khandi oluhoono lwa Abiya yali omuruchi tawe. Mana OMWAMI Nyasaye namukhupa ne nafwa.

²¹Nebutswa Abiya yameeta okhuba owa amaani. Yateshia abakhasi likhumi nabane, niyebula abaana abasiani amakhumi kabili nababili nabo abakhaana likhumi nabasasaba.

²²Amakhuwa kobulamu bwa Abiya kandi koosi, aka yaboola nende aka yakhola kahandikwa mushitabu shiamakhuwa kobulamu bwomulakusi Iddo.