Read wanga 2 AKAKHALE 14 Bible Online

2 AKAKHALE 14 - wanga bible

2 AKAKHALE 14

¹Omuruchi Abiya yafwa mana nayabilwa mubilindwa biabaruchi mwitookho lia Daudi. Mana omusianiwe mbu Asa nakalukha mushilenjeshie shinga omuruchi. Olwa Asa yali omuruchi eshialo shiali nomulembe khulwemiyika likhumi.

²Asa yakhola amakhuwa amalayi khandi aka habwene imbeli wa OMWAMI Nyasayewe.

³Yalikulula ebimalilo biemisango biabanyasaye abacheni, nende habundu habwe hokhwinamila, khandi nakwisia hasi tsisiilo tsiabwe tsindakatifu. Khandi naremaka ebifwanani biaomunyasaye oweshikhasi mbu Ashera.

⁴Khandi yalaka abandu ba Yuda okhukhola kokhwenya khwa OMWAMI Nyasaye wabakuuka babwe nende okhulonda amechesioke nende amalakoke.

⁵Yarusiaho habundu habamahanga benamilanga abanyasaye babwe nende ebimalilo biemisango biabwe ebiokhusambilakhwo obubane, khulweshio amatookho koosi aka Yuda nende lihangalie liosi liali nomulembe hasi owoburuchibwe.

⁶Yombakha amasiisi akokhusira amatookho ka Yuda munyanga etsio, khandi khulwemiyika eminji lihe shilialikhwoho ta, shichila OMWAMI Nyasaye yamuhelesia omulembe.

⁷Mana naboolela abandu ba Yuda ari, “Chende khusire amatookho kefwe, khulwa okhumbakha amasiisi amarambi, nende eminara, nende ebilibwa ebinyala okhwikalwa obutinyu nebibia. Eshialo shino neshiefwe, shichila khwalonda amalako aka OMWAMI Nyasaye wefwe. Khwalonda amalakoke naye yakhulindile obulayi tsimbeka tsiosi.” Kho bombakha mana nibayindihala.

⁸Omuruchi Asa yali nabalwani bomwihe abandu ebikhumila ebikhumi bitaru (300,000) okhurula muluyia lwa Yuda abali nebikhumba nende amafumo. Ne okhurula muluyia lwa Benjamini yali nabalwani bomwihe abandu ebikhumila ebikhumi bibili namakhumi munane (280,000) abali nebikhumba nende obuyingo. Boosi bali abandu abalulu khandi abasitsa belihe.

⁹Omusaatsa wundi okhurula Etsiopia owalangwa mbu Zera yaseera Yuda nali nabalwani ebikhumila eshikhumila namakaari kelihe ebikhumi bitaru nibenjila niboola Maresha.

¹⁰Asa yarula okhutsia okhuseera, mana abalwanibe niberechekha khandi aba Sera boosi niberechekha mwibanda lia Zefatsa ahambi nende Maresha.

¹¹Mana Asa nasaaya khu OMWAMI Nyasayewe naboola ari, “Iwe OMWAMI Nyasaye, iwe onyala okhuhabina abalwani batiiti butswa okhulwana shinga olwa bakhalwanile nibali abanji. Kho khuhabine bulano, iwe OMWAMI Nyasaye wefwe, shichila ifwe khwileetanga khwiwe khandi khurulile okhulwana abalwani abanji bano muliiralio. OMWAMI Nyasaye, iwe oli Nyasaye wefwe, ne obulaho ounyala okhupaara mbu anyala okhukhuhula.”

¹²Kho OMWAMI Nyasaye yakhupa nahula abalwani ba Etsiopia olwa Asa halala nabalwani ba Yuda barula nibabaseera. Boosi belukha,

¹³mana Asa nende abelihebe nibabalondachila okhuula Egerari. Abandu abanji bomukanda kwa Etsiopia berwa, ne shiyaliho owatong'akhwo omulamu tawe. Boosi bahulwa nende OMWAMI Nyasaye nabalwanibe, mana abalwani abo nibayaaya ebindu ebinji.

¹⁴Abalwani ba Yuda basasia amataala akali hambi Gerasi, shichila abandu abo bali nibatecheesibwe nende OMWAMI Nyasaye. Abalwani abo bayaaya amatookho ako koosi mana nibabukula ebindu ebinji muno.

¹⁵Khandi baseera tsikambi tsiabaayi nibabukula amakondi amanji, netsimbusi nende tsingamia tsinyinji. Mana nibakalukha Yerusalemu.