Read wanga 2 AKAKHALE 15 Bible Online

2 AKAKHALE 15 - wanga bible

2 AKAKHALE 15

¹Roho wa Nyasaye yetsa khu Asaria omusiani wa Obedi,

²ne natsia okhwakaana nende omuruchi Asa. Namuboolela ari, “Omuruchi Asa, recheresia ohulile, iwe, halala nabandu boluyia lwa Yuda nende lwa Benjamini. OMWAMI Nyasaye ali halala ninenywe, oluhoono lwa mwesi muba nimushili halala ninaye. Nimuba nimumukhaaba mulamunyoola, nebutswa nimuba nimumulekha naye khandi alamulekha.

³Khulwa eshise eshirambi abandu ba Isiraeli bamenya nibabula Nyasaye watoto, khandi nibabula abesaaliisi bokhubechesia, khandi nibabula amalako.

⁴Nebutswa olwa banyoola amatinyu, bashiukhanila OMWAMI Nyasaye wa Isiraeli, bamukhaaba ne nibamunyoola.

⁵Mutsinyanga tsia khale etsio abulaho owarulanga mana khandi akalukha mumulembe shichila omulembe shikwaliho ta, habula abandu boosi beshialo bali butswa mumatinyu.

⁶Lihanga lialwananga nelihanga liashie, nalio litookho lilwana nelitookho liashie, shichila OMWAMI Nyasaye yabanyasinjia okhubira mumatinyu kaukhane.

⁷Nebutswa inywe mwitinyie, ne mulafwa emioyo ta, shichila mularungwa obulayi khulwa emilimo chienywe.”

⁸Olwa omuruchi Asa yahulila amakhuwa komulakusi Azaria omusiani wa Obedi yaboola, yatinya omwoyo. Mana narusiaho ebifwanani biabanyasaye beshisinyo boosi okhurula mushialo shia Yuda shiosi nende eshia Benjamini; nende okhurula mubuli litookho liosi elia yatiila mushialo shiebikulu shia Efuraimu. Khandi nakaasia obuyiakha eshimalilo shiemisango shia OMWAMI Nyasaye eshiali imbeli mulwanyi lweinzu ya OMWAMI Nyasaye.

⁹Mana omuruchi Asa nalanga abandu boosi abeshialo shia Yuda nende Benjamini, nende abandu boosi abali mushialoshie okhurula mu Efuraimu, Manase nende eshia Simeoni. Bano boosi bali nibelushila mushialoshie olwa balola mbu OMWAMI Nyasayewe ali halala ninaye.

¹⁰Boosi bakhung'anila Yerusalemu mumwesi kwakhataru mumuyika kwekhumi nakharano kwomuburuchi bwa Asa.

¹¹Khunyanga eyo bakholela OMWAMI Nyasaye omusango okhurula khubindu bia bali nibayaayile. Natsio tsiali tsing'ombe ebikhumi musafu (700) nende amakondi netsimbusi ebikhumila musafu (700).

¹²Mana nibakhola indakano eya bafuchilila okhwinamila OMWAMI Nyasaye wabakuuka babwe nomwoyo kwabwe kwosi.

¹³Omundu yesi abe omukhasi noho omusaatsa, omwana noho omusakhulu oulenamila OMWAMI Nyasaye ta yerungwa.

¹⁴Balia omuma muliira lia OMWAMI Nyasaye nibaayula obutinyu mbu balalindanga indakano eya OMWAMI Nyasaye. Mana nibayula obutinyu nibakhupa tsinzika.

¹⁵Abandu ba Yuda boosi basaangaala shichila bakhola indakano yino nomwoyo kwabwe kwosi. Benamila OMWAMI Nyasaye nobusaangaali, naye nabafuchilila khandi nabahelesia omulembe tsimbeka tsiosi.

¹⁶Omuruchi Asa yarusia Maaka nyakukhulunyene khushifumbishie shinga nyinamwana omuruchi shichila yali nakaasiye eshifwanani shieshisinyo eshiomunyasaye mukhasi mbu Ashera. Asa yaremaka eshifwanani eshio, nashitubula mana nashisambila mwibanda lia Kidironi.

¹⁷Kata nikali mbu Asa shiyalikulula habundu habamahanga benamilanga abanyasaye babwe mushialo shiosi ta, yali omusuubilwa khu OMWAMI Nyasaye mubulamubwe bwosi.

¹⁸Yareera muhekalu ebindu biosi ebieifetsa nende itsahabu, ebia Abiya samwana yali niyaahulila OMWAMI Nyasaye, halala nende ebia ifetsa nende itsahabu, ebia ye omwene yali niyaahulila OMWAMI Nyasaye.

¹⁹Lihe shilialikhwoho ta, okhuula khumuyika kwamakhumi kataru nachirano kwomuburuchibwe.