Read wanga 2 AKAKHALE 17 Bible Online

2 AKAKHALE 17 - wanga bible

2 AKAKHALE 17

¹Mana omusiani wa Asa mbu Yehoshafati niyemekhwa okhuba omuruchi okhukalukha mushilenje shia samwana. Naye naba owamaani muno okhulwana Isiraeli.

²Yara abelihe mumatookho koosi akombakhwa namasiisi mu Yuda mana khandi nara akandi mushialo shia Yuda shiosi nende mumatookho ka Efuraimu, aka Asa samwana yali niyabukula.

³OMWAMI Nyasaye yali halala nende Yehoshafati, shichila mumiyikachie chiambeli yaloonda omufwano kwambeli kwa samwana ne shiyayenamila omunyasaye Baali tawe.

⁴Habula yakhalabanila Nyasaye wa samwana yakhalabanilanga, nalonda amalako ka Nyasaye, ne shiyakholakhwo amakhuwa kabaruchi ba Isiraeli bakholanga tawe.

⁵OMWAMI Nyasaye yaralisia Yehoshafati muburuchibwe okhwamiha mwihanga lia Yuda; mana abandu boosi nibamureerera ebihaanwa, kho naba nemiandu eminji khandi namanyikha muno.

⁶Mana omuruchi Yehoshafati nasaangaalila okhukhalabanila OMWAMI Nyasaye, ne nasasia habundu hoosi aha abamahanga benamilanga abanyasaye babwe, khandi nalikulula ebifwanani biomunyasaye weshikhasi Ashera okhurula mushialo shia Yuda shiosi.

⁷Mumuyika kwakhataru kwomuburuchibwe yaruma abakhongobe; Benihaili, Obadia, Zekaria, Netsaneli, nende Mikaya okhutsia okhwechesia mumatookho ka Yuda.

⁸Batsia nende Abalawi shienda nende abesaaliisi babili. Abalawi batsia ninabo bali Shemaya, Netsania, Zebadia, Asaheli, Shemiramotsi, Yehonatsani, Adoniya, Tobiya nende Tobadoniya. Nabo abesaaliisi bali Elishama nende Yehoramu.

⁹Babukula eshitabu shia Amalako ka OMWAMI Nyasaye, ne nibachenda mumataala ka Yuda koosi nibakechesinjia abandu.

¹⁰OMWAMI Nyasaye yakhola abandu bamahanga karondokhane nende Yuda okhutiilwa noburi kho shikaseerakhwo Yehoshafati tawe.

¹¹Abafilisiti bandi bareerera Yehoshafati ebihaanwa nende ifetsa shinga omurungo, naba Abarabu nibamureerera amakondi ebikhumila musafu nebikhumi musafu (7,700), nende tsimbusi tsikhole ebikhumila musafu nebikhumi musafu (7,700).

¹²Kho Yehoshafati natsiililila okhuba owamaani muno. Yombakha amasiisi kokhusira amatookho komu Yuda koosi,

¹³akababikhangamwo ebimanulwa ebinji. Khandi yara abalwani abalulu mwitookho lia Yerusalemu.

¹⁴Yabarayo okhulondana nende ebilibwa biabwe; Adina niye owali omusinjilili wa abelihe abokhurula muluyia lwa Yuda, ne yasinjilila abandu ebikhumila ebikhumi bitaru (300,000).

¹⁵Owamulondakhwo yali Yehohanani owasinjilila abelihe abandu ebikhumila ebikhumi bibili namakhumi munane (280,000).

¹⁶Owakhataru yali Amazia omusiani wa Zikiri owasinjilila abelihe ebikhumila ebikhumi bibili (200,000), Yali niyehaana omwene okhukhalabanila OMWAMI Nyasaye.

¹⁷Naye owasinjilila abelihe bokhurula muluyia lwa Benjamini yali Eliada owasinjilila abelihe ebikhumila ebikhumi bibili (200,000) nibemanule nebikhumba nende obuyingo.

¹⁸Owamulondakhwo yali Yehozabadi owasinjilila abelihe eshikhumila shilala nebikhumi amakhumi munane (180,000) abali nibemanule obulayi khulwa lihe.

¹⁹Abalwani bano nibo abakhalabanilanga omuruchi mu Yerusalemu, ne okhumeeta khu bano yara abalwani bandi mumatookho kandi akasirwa namasiisi mu Yuda.