Read wanga 2 AKAKHALE 18 Bible Online

2 AKAKHALE 18 - wanga bible

2 AKAKHALE 18

¹Olwa omuruchi Yehoshafati wa Yuda yekhola omuyinda khandi oweifuma muno, yakhola mulala khubeinzuye okhuteshia okhurula mubeinzu ya Ahabu omuruchi wa Isiraeli.

²Olunyuma lwemiyika eminji, Yehoshafati yatsia mwitookho lia Samaria okhucheniya Ahabu. Khulwa okhumuhelesia oluyali halala nende abandube. Ahabu yamwirira amakondi nende tsing'ombe tsinyinji. Mana namusaaya yeyunje halala ninaye okhuseera litookho lia Ramotsi elili mu Giliadi.

³Ahabu nareeba Yehoshafati ari, “Olatsia ninasi okhuseera litookho lia Ramotsi?” Naye Yehoshafati namukalusia ari, “Isie endi halala ninawe, khandi abalwani banje boosi bali halala ninawe: khulatsia ninawe mwihe.”

⁴Nebutswa Yehoshafati yaboolela omuruchi wa Isiraeli ari, “Khuranjilile khureebe OMWAMI Nyasaye mbelio.”

⁵Kho omuruchi wa Isiraeli nakhung'asia abalakusi boosi, abali ahambi abandu ebikhumi bine (400), mana nabareeba ari, “Enzie eseere litookho lia Ramotsi nohomba ta?” Nabo nibamukalusia bari, “Tsia oliseere, Nyasaye alakhunyalila okhulihula.”

⁶Nebutswa Yehoshafati yamureeba ari, “Omulakusi wa OMWAMI Nyasaye shialikhwoho owa khunyala okhureeba tawe?”

⁷Ahabu namukalusia ari, “Aliho omundu undi oulangwa mbu Mikaya omusiani wa Imula. Nebutswa ndamusila shichila shiyandakulilangakhwo amakhuwa amalayi ta, habula amabi konyene.” Yehoshafati namuboolela ari, “Shiokhoyile okhuboola orio tawe.”

⁸Kho omuruchi Ahabu nalanga mulala khubakhongobe namuboolela ari, “Tsia bwangu oreere hano Mikaya omusiani wa Imula.”

⁹Abaruchi babili abo nibefwalile tsingubo tsiabwe tsioburuchi bali nibekhaale khubifumbi biabwe bioburuchi aha bahulilanga imele elwanyi weshilibwa shia Samaria, ne bali nende abalakusi boosi nibalakulanga imbeli wabwe.

¹⁰Mulala khubo mbu Zedekia omusiani wa Kenaana yali nakaasiye tsinzika tsieshibia ne naboolela Ahabu ari, “Kano niko aka OMWAMI Nyasaye aboola, ‘Tsinzika tsino nitsio tsiokhwikhoonyela okhulwana nende okhuhula Abasiria.’ ”

¹¹Abalakusi bandi boosi baboola amakhuwa malala ako bari, “Tsia oseere litookho lia Ramotsi olalihula, shichila OMWAMI Nyasaye alakhunyalila okhubahula.”

¹²Mana omukhongo owali narumilwe okhulanga Mikaya namuboolela ari, “Abalakusi boosi babooleele omuruchi Ahabu amakhuwa amalayi, kho wesi khandi omuboolele amakhuwa amalayi.”

¹³Nebutswa Mikaya yamukalusia ari, “Nditsuba muliira lia OMWAMI Nyasaye ouliho mwoyo mbu ndalaboola butswa aka Nyasaye wanje yamboolela okhuboola!”

¹⁴Olwa yoola womuruchi Ahabu yali, omuruchi Yehoshafati yamureeba ari, “Khutsie khuseere litookho lia Ramotsi nohomba tawe?” Mikaya namukalusia ari, “Tsia oliseere, olalihula, shichila OMWAMI Nyasaye alakhunyalila okhubahula.”

¹⁵Nebutswa Ahabu yamuboolela ari, “Olwa oba noboola ninasi muliira lia OMWAMI Nyasaye okhuula umboolele akatoto! Nekhwitsubie endio okhuula eshiakhanga?”

¹⁶Naye Mikaya naboola ari, “Endolile abelihe lia Isiraeli nibasaalanile mubikulu shinga amakondi akabula omwayi.” Naye OMWAMI Nyasaye naboola ari, “Abandu bano babula omwimilisi, lekha benyoshe bakalushe nango mumulembe.”

¹⁷Omuruchi Ahabu naboolela Yehoshafati ari, “Shiekhubooleele mbu shialakulangakhwo amakhuwa amalayi khwisie ta, habula amabi konyene?”

¹⁸Omulakusi Mikaya natsiililila okhuboola ari, “Khulweshio, recheresia likhuwa lia OMWAMI Nyasaye. Enduutsi OMWAMI Nyasaye niyekhaale mwikulu khushifumbishie shioburuchi, nali nabamalaikabe boosi nibasinjiile nibamubotokhaane tsimbeka tsiosi.

¹⁹Mana OMWAMI Nyasaye nareeba ari, ‘Niwiina oulatsia okhukaatilisia omuruchi Ahabu okhutsia okhuseera litookho lia Ramotsi kho mbu afwileyo?’ Abamalaika balala balola amakhuwa malala nabo abandi nibaboola akandi lukano.

²⁰Mana roho wundi narula mubo niyetsa imbeli ewa OMWAMI Nyasaye namuboolela ari, ‘Ndalatsia okhumukaatilisia.’ OMWAMI Nyasaye namureeba ari, ‘Olamukaatilisia orie?’

²¹Roho oyo namuboolela ari, ‘Ndalatsia okhukhola abalakusi ba Ahabu okhumuboolela obubeeyi’ mana OMWAMI Nyasaye namuboolela ari, ‘Tsia, olanyalilwa okhumukaatilisia.’

²²Khulweshio OMWAMI Nyasaye wukholile abalakusibo bano okhukhuboolela obubeeyi. Nebutswa ye omwene wumalile okhurumbula amasila khwiwe.”

²³Mana omulakusi Zedekia natsia ewa omulakusi Mikaya yali namupaama tsikhofi khutsiseya namureeba ari, “Nilina olwa Roho owa OMWAMI Nyasaye yarulile mwisie natsia okhuboola ninawe?”

²⁴Mikaya namuboolela ari, “Wakhamanye khunyanga ya wakhatsie okhwifisa mushisika shia mukari.”

²⁵Mana omuruchi Ahabu nalaka mulala khubakhongobe ari, “Tiile Mikaya mumuyile khu Ammoni omuruchi welitookho nende khu Yoashi omusiani womuruchi.

²⁶Mubaboolele bamusukune mumbohe ne balamuhelesiakhwo eshindu shiosi ta habula omukaate nende amaatsi bionyene okhuula olwa ndakhakalushe mumulembe.”

²⁷Mikaya nameeta okhuboola ari, “Noba nokalukha mumulembe kho OMWAMI Nyasaye shiaba naboolile okhubirira mwisie tawe!” Khandi nameeta ari, “Inywe mwesi muhulile obulayi akemboolanga!”

²⁸Mana omuruchi Ahabu wa Isiraeli nende omuruchi Yehoshafati wa Yuda nibatsia okhuseera litookho lia Ramotsi eliali mu Giliadi.

²⁹Ahabu naboolela Yehoshafati ari, “Olwa khutsia mwihe isie ndalafwala tsingubo tsiamatasi, nawe ofwale tsingubotsio tsioburuchi” Kho Ahabu natsia mwihe nafwalile tsingubo tsiamatasi.

³⁰Omuruchi wa Siria yali nalachile abakhongo bamakaari kelihe mbu balalwanakhwo nomundu undi yesi abe omutiiti noho omukhongo ta, habula omuruchi wa Isiraeli.

³¹Kho olwa abakhongo bamakaari kelihe balola omuruchi Yehoshafati bapaara mbu niye omuruchi wa Isiraeli, ne nibashiukhana mbu bamuseere. Nebutswa Yehoshafati yaayula obutinyu ne OMWAMI Nyasaye namuhonia. Nyasaye yakhola abelihe abo okhushiukhana nibamulekha.

³²Abakhongo bamakaari abo balola mbu shiali omuruchi wa Isiraeli ta, ne nibalekha okhumulondachila.

³³Nebutswa mulala khubelihe lia Siria, metsukhana yakhwesa obuyingobwe ne nalasa omuruchi Ahabu hakari wobunjilo bweshikhumbashie. Omuruchi niyaayula naboolela owali niyelukhasinjia likaarilie ari, “Baafuumire! Shiukhasia likaari urusie mwihe.”

³⁴Obulwani bwatsiililila eshiteere shiosi, naye omuruchi wa Isiraeli yeeleetelela mwikaarelie aha hengane nende Abasiria okhuula khungoloobe, ne olwa eliuba liali niyelanga yamala nafwa.