Read wanga 2 AKAKHALE 19 Bible Online

2 AKAKHALE 19 - wanga bible

2 AKAKHALE 19

¹Omuruchi Yehoshafati wa Yuda yakalukha munzuye yoburuchi Yerusalemu mumulembe.

²Mana omulakusi Yehu omusiani wa Hanani natsia okhumwakanila, ne namureeba ari, “Opaaranga mbu kali habwene iwe okhukhoonya abamayanu, khandi okhuheela abo abasira OMWAMI Nyasaye? Akokholile kano kareerire liruma lia OMWAMI Nyasaye khwiwe.

³Ne kata kario, amalayi kalikhwo khwiwe. Warusia mushialo ebifwanani biomunyasaye mukhasi Ashera ebiabandu benamilanga, khandi wateema okhulonda kokhwenya khwa Nyasaye.”

⁴Yehoshafati yamenyanga Yerusalemu, ne buli lwosi yachendanga mubandube okhurula Berisheba elili emulambo okhuula khushialo shiebikulu eshili emasaba, nakalusinjia abandu khu OMWAMI Nyasaye wabakuuka babwe.

⁵Yaahula Abayaasi mu buli litookho eliasirwa nelisiisi mu Yuda.

⁶Mana nababoolela ari, “Muyililisie obulayi olwa mukhalaka eshiina, shichila shimukhalakanga khulwa obunyali bwa OMWAMI Nyasaye ta, naye ali halala ninenywe olwa mukhalaka eshiina.

⁷Muhelesie OMWAMI Nyasaye oluyali, mana mube abachesi mubuli likhuwa lia mukhola, shichila OMWAMI Nyasaye wefwe shiafuchililanga obubatsa, kata ebiela kata eshiomufusi tawe.”

⁸Yehoshafati yaahula khandi mu Yerusalemu Abalawi, abesaaliisi nende abemilisi bebilibwa bia Abaisiraeli okhuyaasia abandu nibafunache lilako lia OMWAMI Nyasaye nende nibabiranile abeene khu beene. Bekhalanga Yerusalemu.

⁹Mana nabalachilisia ari, “Okhuula mukhole emilimo chienywe mukhuria OMWAMI Nyasaye, nimumuhulila nomwoyo kwosi.

¹⁰Buli lwosi olwa abandu bashienywe okhurula mumatookho bamureerera emise chieshitsayi noho chiokhufunaka amalako noho indakano, okhuula mubachetsiyie obulayi shinga olwa bakhoyile okhuboola olwa betsa mushiina, kho baleshe okhuba neshikha shiokhwonoonela OMWAMI Nyasaye. Ne nimulakhola murio ta, inywe nende abashienywe abo mulanyoola eshinyasio okhurula khu OMWAMI Nyasaye. Halali nimukhola emilimo chienywe obulayi, shimulaba neshikha shiosi tawe.

¹¹Naye Amaria Omwisaaliisi Omukhulundu niye owitsa okhumwimililanga mumakhuwa koosi akeidiini. Naye Zebadia omusiani wa Ishimaeli omwimilisi woluyia lwa Yuda, niye owitsa okhumwimililanga mumakhuwa koosi akomushiina shiomuruchi. Nabo Abalawi okhuula balole mbu koosi akabusiibwe mushiina kakholilwe. Mume ikholo mana mukhole kano koosi, naye OMWAMI Nyasaye abetsenje nende abo abali khuka habwene!”