Read wanga 2 AKAKHALE 21 Bible Online

2 AKAKHALE 21 - wanga bible

2 AKAKHALE 21

¹Mana nafwa ne nayabilwa mubilindwa biabaruchi mwitookho lia Daudi, mana omusianiwe mbu Yehoramu nakalukha mushilenjeshie shinga omuruchi.

²Yehoramu omusiani owomuruchi Yehoshafati yali nabasiani babwe basasaba bano: Azaria, Yehieli, Zekaria, Azaria, Mikaeli, nende Shefatia.

³Samwana yabahelesia itsahabu inyinji, nende ifetsa nende ebindu bindi biobukusi. Mana nara buli mulala khubo okhusinjilila buli litookho liasirwa nelisiisi mu Yuda. Nebutswa khulwa okhubeela Yehoramu niye owali omukhulundu muboosi, Yehoshafati yamwemekha okhukalukha mushilenjeshie.

⁴Olwa Yehoramu yali namalile okhuralila muburuchibwe, yalaka mbu abasiani babwe boosi beerwe halala nende abemilisi bandi ba Abaisiraeli.

⁵Yehoramu yemekhwa okhuba omuruchi nali nemiyika amakhumi kataru nachibili, mana naruka mu Yerusalemu khulwemiyika munane.

⁶Yalonda emiima emibi chiomuruchi Ahabu nende echiabaruchi bandi ba Isiraeli, shichila yali niyateshia mulala khubakhaana ba Ahabu. Yakhola obwonooni imbeli ewa OMWAMI Nyasaye.

⁷Ne kata kario OMWAMI Nyasaye shiyayenya okhumulula oburuchi bwa Daudi ta, shichila yali niyakhola indakano nende Daudi, ne niyamwitsubila mbu abetsukhulube bakhatsiililile okhuruka buli lwosi.

⁸Mutsinyanga tsioburuchi bwa Yehoramu, abelihanga lia Edomu bakholela eshialo shia Yuda indiri mana niberuka abeene.

⁹Kho Yehoramu yarula nabelihebe nende amakaari kelihe natsia okhuseera Edomu. Abelihe lia Edomu bababotokhana halala namakaari kabwe, nebutswa babuukha mushilo mana nibelukha.

¹⁰Okhuula olwa leelo Eshialo shia Edomu shikholelanga eshia Yuda indiri. Mutsinyanga tsiene etsio litookho lia Libuna liosi liakhola indiri, shichila Yehoramu yali niyalekha OMWAMI Nyasaye owa abakuuka babwe.

¹¹Okhumeetakhwo, yombashila abanyasaye abacheni habundu hokhubenamila mubikulu bia Yuda, mana niyemilila abandu ba Yuda nende Yerusalemu okhwonoonela OMWAMI Nyasaye.

¹²Omulakusi Eliya yahandichila omuruchi ibarwa niyiboolanga yiri, “OMWAMI Nyasaye wa kuukawo Daudi khukhalachilanga eshiina shichila shiwaloonda omwima okwo papawo omuruchi Yehoshafati noho okwa kuukawo omuruchi Asa tawe.

¹³Mushilenje shiako, oloondanga emiima chiabaruchi ba Isiraeli, mana wachilile abandu ba Yuda nende Yerusalemu nibalekha okhuba abasuubilwa khu Nyasaye, shinga lwomuruchi Ahabu yakhola butswa. Okhumeetakhwo, weerire abasiani benywe, abali abandu abalayi okhushila iwe.

¹⁴Khulweshio OMWAMI Nyasaye nahelesie abandubo eshinyasio, halala nabaanabo, nabakhasibo khandi nasasie emianduchio chiosi.

¹⁵Nawe omwene nolwale obulwale obutinyu bwomunda, ne nabumeeteshenje buli lwosi nibukhola amala koko okhurula elwanyi.”

¹⁶Abafilisiti bandi nende Abarabu bandi bali nibamenya ahambi nende aha aba Etsiopia bandi bali nibamenya khundulo weinyanza. OMWAMI Nyasaye yabayakula okhutsia okhuseera Yehoramu.

¹⁷Batsia nibaseera Yuda, nibayaaya inzu yomuruchi, nibabukula abakhasi bomuruchi boosi halala nabasianibe boosi nibatsia ninabo shinga abahambe, halali shibabukula omusianiwe omushe mbu Ahazia tawe.

¹⁸Olunyuma lwako, OMWAMI Nyasaye yareera khumuruchi obulwale obutinyu obwomumala.

¹⁹Khuluhono oluhela ahambi emiyika chibili, obulwale obwo bwameetekha okhuba obubi muno okhuula lwomuruchi yamala nafwa nasaaliile obululu muno. Abandu beshialoshie shibamubwanila omulilo kwamacheenga shinga olwa bakholelanga abakuuka babwe abamuranjilila okhufwa tawe.

²⁰Yehoramu yachaaka okhuruka nali nemiyika amakhumi kataru nachibili, mana naruka nali Yerusalemu khulwemiyika munane. Omundu yesi shiyabelelakhwo olwa yafwa tawe, mana nayabilwa mwitookho lia Daudi, nebutswa shibamuyabila mubilindwa biabaruchi tawe.