Read wanga 2 AKAKHALE 22 Bible Online

2 AKAKHALE 22 - wanga bible

2 AKAKHALE 22

¹Abarabu bandi bali nibaseera, mana nibeera abasiani bomuruchi Yehoramu boosi halali omusiani wokhumalilikhawe owalangwa mbu Ahazia. Kho abandu ba Yerusalemu bemekha Ahazia okhukalukha mushilenje shia samwana.

²Ahazia yemekhwa okhuba omuruchi nali nemiyika amakhumi nabili kachibili, mana naruka nali Yerusalemu khulwomuyika mulala. Nyinamwana yalangwa mbu Atsalia omukhaana owomuruchi Ahabu khandi omwitsukhulu wa Omiri.

³Ahazia yaloonda khumiima chiabeinzu ya Ahabu, shichila nyinamwana yamwibalila okhukhola obwonooni.

⁴Yakhola obwonooni imbeli wa OMWAMI Nyasaye, shinga olwa Ahabu nende abeinzuye bali nibakhola, shichila olunyuma lwokhufwa khwa samwana, bo nibo abali abebaalibe, mana nibachila nakhaywa okhutsiililila.

⁵Yalonda amebaalo kabwe mana nakhoonya omuruchi Yoramu wa Isiraeli okhuseera omuruchi Hazaeli wa Siria. Abelihe babwe balwanila Ramotsi elili mu Giliadi, naye Yoramu nasaalisilibwa mubulwani obwo.

⁶Yamala nakalukha mwitookho lia Yezerili okhusilikhwa amafumire, naye Ahazia natsiayo okhumukoonya.

⁷Ne Nyasaye yali niyakaasia mbu okhubirira mu okhukoonya okhwo Ahazia anyoolelemwo obusasishi. Olwa Ahazia yali naliyo, ye mwene halala nende Yoramu baseerwa nomundu walaangwa mbu Yehu omusiani wa Nimushili, owa OMWAMI Nyasaye yali niyaahula khulwa okhusasia abeinzu ya Ahabu.

⁸Kho olwa Yehu yali nahananga obukhalachi bwa Nyasaye khubeinzu ya Ahabu, yaakaana nende omukanda kwabandu okwalimwo abemilisi ba Abayuda halala nende abekho ba Ahazia, abali nibachendile ninaye. Yehu yabeera boosi.

⁹Mana natsia okhukhaaba Ahazia halala nabandube abali nibebisile Samaria. Bamutiila ne nibamuyila khu Yehu mana nibamwira. Nebutswa bayabila omubilikwe khulwa okhuhaana oluyali khu Yehoshafati kuukanyene, shichila yali niyakhalabanila OMWAMI Nyasaye nomwoyo kwosi. Abulaho omundu khubeinzu ya Ahazia owatoong'a owakharuchile eshialo shia Yuda.

¹⁰Olwa Atsalia nyinamwana Ahazia yahulila mbu omusianiwe yerirwe, yalaka mbu abandu boosi abeinzu yoburuchi ya Yuda beerwe.

¹¹Ahazia yali nomukhaana wabwe owalangwa mbu Yehosheba, owali niyateshela omwisaaliisi mbu Yehoyada. Kho Yehosheba oyo yabukula Yoashi okhurula khubasiani bomuruchi abali nibenyanga okhwirwa; mana namufisa halala nomulesiwe hasi weshitali muhekalu. Khulwa okhumufisa ario, yamuhonokosia okhurula khukhwirwa khwa Atsalia yeera abasiani bomuruchi.

¹²Khulwa emiyika chisasaba, Yoashi yatong'a niyafiswa ario, naye Atsalia omuruchi mukhasi yaruka eshialo shia Yuda.