Read wanga 2 AKAKHALE 23 Bible Online

2 AKAKHALE 23 - wanga bible

2 AKAKHALE 23

¹Mumuyika kwomusafu Yehoyada yamanyia amaanike. Yakhola indakano nabakhongo belihe barano bano, Azuria omusiani owa Yehoramu, Ishimaeli omusiani wa Yehohanani, Azaria omusiani wa Obedi, Maseya omusiani wa Adaya nende Elishafati omusiani wa Zikiri.

²Batsia mumatookho ka Yuda koosi mana nibachelela Yerusalemu nibali nende Abalawi nende abemilisi bebilibwa bia Abaisiraeli.

³Boosi bakhung'anila muhekalu, mana nibakhola indakano nende Yoashi omusiani owa omuruchi. Yehoyada nababoolela ari, “Omusiani womuruchi ali hano! Niye outsia okhuba omuruchi shinga olwa OMWAMI Nyasaye yasuubisia mbu omwitsukhulu wa Daudi yakhabetsenje omuruchi.

⁴Kano niko aka khutsia okhukhola: Olwa abesaaliisi nende Abalawi betsa khumilimo khunyanga yeisabato, eshitonye shiakhataru khubo balalinda ebilibwa biomuhekalu,

⁵nashio eshitonye shindi shiakhataru khubo balalinda inzu yomuruchi, nabo abandi boosi nabalinde eshilibwa shiomushinji. Abandu bandi boosi balakhung'anila mulwanyi lwa Ihekalu.

⁶Omundu yesi alenjilakhwo mu Ihekalu ta, okhurusiakhwo abesaaliisi nende Abalawi abali khumilimo chiobulindi. Abo banyala okhwinjilamwo shichila bamala okhwahulwa nende okhusaayilwa. Nebutswa abandu bandi okhuula balinde amalako ka OMWAMI Nyasaye mana basinjile elwanyi.

⁷Abalawi basinjile nibabotokhane omuruchi, buli mundu natiilile eshimanulwashie mumakhono, mube ahambi nende omuruchi habundu hosi aha atsia. Ne omundu yesi outeema okhwinjila muhekalu okhuula yerwe.”

⁸Abalawi nende abandu ba Yuda bakhola amakhuwa koosi akomwisaaliisi Yehoyada yabebaalila. Abandu shibafuchililwa okhurula khumilimo khunyanga ya Isabato tawe, kho abakhongo belihe bali nende abandu boosi abali nibetsanga khumilimo nende abo abali nibarulangakhwo.

⁹Yehoyada yahelesia abakhongo belihe amafumo nende ebikhumba ebiali biomuruchi Daudi, biali nibiabikhwa muhekalu.

¹⁰Mana narechekha abandu abali netsinganga nitsitsomoolwe nibabotokhaane imbeli wa Ihekalu khulwa okhulinda omuruchi.

¹¹Mana Yehoyada nabasianibe nibarusia Yoashi elwanyi namufwala olusimbi khumurwe, mana nibamuhelesia eshitabu shiamalako akalindanga oburuchi. Mana munjila eyo namwemekha okhuba omuruchi. Bamutsushilila amafura mana nibaayula obutinyu bari, “Omuruchi ayindile tsinyanga tsinyinji!”

¹²Olwa Atsalia yahulila oluyoka lwabandu nibelukhanga nibetsoominjia omuruchi, yatsia ewa bali nibakhung'anile muhekalu.

¹³Yahenga ne nalola omuruchi omuyia nali habwinjililo bwa Ihekalu, nasinjiile hasiilo eyabishilwa omuruchi nabotokhaanwe nende abakhongo belihe nende abakhupi betsinzika. Abandu boosi bali nibaayulanga nobusaangaali nibakhupa tsinzika. Nabo abakhupi bobukhana bomuhekalu nibali nibarereesinjia tsinyimbo nebinanda biabwe. Mana Atsalia narandula tsingubotsie muburuma niyaayula naboola ari, “Buno nobukhobani! Buno nobukhobani!”

¹⁴Yehoyada shiyayenyanga mbu Atsalia yeererwe Muhekalu tawe, kho yalanga abakhongo belihe nababoolela ari, “Mubukule mumuyile elwanyi hakarikari wetsinyaali tsiabalindi, ne mwire omundu yesi outeema okhumuhonokosia.”

¹⁵Bamutiila, nibamuyila munzu yomuruchi ne nibamwirira hashilibwa shia tsifarasi.

¹⁶Mana omwisaaliisi Yehoyada nakhola indakano hakariwe nende omuruchi Yoashi nende abandu boosi mbu, balabetsanga abandu aba OMWAMI Nyasaye.

¹⁷Abandu abo boosi batsia muhekalu yomunyasaye Baali mana nibachilikulula. Balikulula ebimalilo biemisango nende ebifwanani bialimwo mana nibeera omwisaaliisi wa Baali owalangwa mbu Matani, imbeli webimalilo biemisango.

¹⁸Mana Yehoyada nara abesaaliisi nende Abalawi okhusinjilila emilimo chiomuhekalu. Bakholanga emilimo echia bahebwa okhukhola nomuruchi Daudi, nende okhumala emisango emisambe khu OMWAMI Nyasaye okhulondana nende Amalako ka Musa. Khandi nibo abasinjililanga obwimbi nende emilukha chiamasabo.

¹⁹Yehoyada khandi yaraho abandu bokhulinda khubilibwa bia Muhekalu, khulwa okhwikalila omundu yesi oulali omusiiye ta okhwinjilamwo.

²⁰Yabukula abakhongo belihe, abandu beifuma indayi, abemilisi nende abandu bandi boosi nibachenda nibareera omuruchi okhurula muhekalu nibamuyila munzu yoburuchi. Benjilila mushilibwa eshikhongo, mana nibekhasia omuruchi khu shifumbishie shioburuchi.

²¹Abandu boosi basaangaala, mana litookho liosi niliholeela tsi shichila Atsalia yali niyerirwe nolukanga.