Read wanga 2 AKAKHALE 24 Bible Online

2 AKAKHALE 24 - wanga bible

2 AKAKHALE 24

¹Yoashi yemekhwa okhuba omuruchi wa Yuda nali nemiyika musafu, mana naruka mu Yerusalemu khulwemiyika amakhumi kane. Nyinamwana yalangungwa mbu Zibia, okhurula mwitookho lia Berisheba.

²Yoashi yakhola amakhuwa amalayi imbeli wa OMWAMI Nyasaye emiyika chiosi echia Yehoyada yali nali omwisaaliisi.

³Yehoyada yamwahulila abakhasi babili, mana nibamwibulila abaana abasiani nende abakhaana.

⁴Olunyumakhwo, Yoashi yakhalaka mumwoyokwe okhukaasia obuyiakha Ihekalu ya OMWAMI Nyasaye.

⁵Yakhung'asia halala abesaaliisi nende Abalawi mana nababoolela ari, “Tsie mumatookho ka Yuda mana musolole amapesa ka buli omundu akhoyile okhuhaana buli khumuyika khulwa okhukaasia obuyiakha Ihekalu ya Nyasaye wenywe, muyuchilisiekhwo.” Nebutswa Abalawi abo shibayuchilisia tawe.

⁶Khulweshio omuruchi yalaanga Yehoyada, Omwisaaliisi Omukhulundu namureeba ari, “Mbushiina nolalachilisia Abalawi okhusolola okhurula mu Yuda nende mu Yerusalemu obushuru bwa Musa omukhalabani wa OMWAMI Nyasaye, nende omukhung'ano kwa Abaisiraeli balachilisia khulwa obulindi bwa lisandu li indakano?”

⁷Okhuba abalondi ba Atsalia, owali omukhasi omumayanu, bali nibafunaka nibenjila muhekalu ya Nyasaye ne nibekhoonyela ebindu ebitakatifu khulwa okhwinamila abanyasaye ba Baali.

⁸Mana omuruchi nalachilisia Abalawi okhukaasia lisanduku liebihaanwa nende okhulirenjekha mushilibwa shia Ihekalu ya OMWAMI Nyasaye.

⁹Nabo nibalandasia likhuwa mu Yuda nende mu Yerusalemu yoosi mbu buli mundu areerere OMWAMI Nyasaye obushuru obwa Musa omukhalabani wa Nyasaye yali niyalachilisia Abaisiraeli okhusolola nibali mushitsiimi.

¹⁰Abemilisi boosi nende abandu boosi nibareera omusololo kwabwe nomwikhoyo, nibara mwisanduku elo okhuula niliitsula.

¹¹Buli inyanga Abalawi bayilanga lisanduku elo khumukhongo womuruchi owalisinjililanga. Buli olwa lialinji niliitsuule omuhandichi woburuchi nende omulondi wa Omwisaaliisi Omukhulundu barusinjiamwo amapesa mana bakalusia lisanduku habundu halio. Bakholanga bario mana nibakhung'asia amapesa amanji.

¹²Mana omuruchi nende Yehoyada bahaananga amapesa ako khu abandu abakholanga emilimo chiokhukaasia obuyiakha Ihekalu ya OMWAMI Nyasaye. Bahandika abombashi bamachina, ababaatsi betsimbao, aberanyi bebibia, nende ebimikasa boosi abokhurungwa amapesa khulwa okhukaasia obuyiakha Ihekalu ya OMWAMI Nyasaye.

¹³Abakholi abo boosi bakhola emilimo echio namaani mana nibakhola Ihekalu eyo okhuba shinga olwa yali mukhuchaaka, nibameeta okhuyiralisia.

¹⁴Olwa emilimo echio chiali nichihwele, bareera amapesa kali nikatoonyile khumuruchi nende Yehoyada, abakekhoonyela khulwa okhukaasia ebikaye nende ebindu bindi ebieraanywa okhurula khu tsahabu nende ifetsa ebiekhoonyelungwa muhekalu nende khulwa emisango emisambe. Olwa Yehoyada yali nashiliho mwoyo emisango chiahaanungwa buli lwosi muhekalu.

¹⁵Olwa Yehoyada yali nakofuule muno, nali nemiyika eshikhumi namakhumi kataru (130) yafwa.

¹⁶Bamuyabila mung'ani tsiabaruchi mwitookho lia Daudi, khulwa okhumuhelesia oluyali. Khulwa emilimo chia yali niyakholela abandu ba Isiraeli, khu Nyasaye nende khu Ihekalu.

¹⁷Nebutswa olwa Yehoyada yali namalile okhufwa, abemilisi ba Yuda betsa nibasaaya omuruchi Yoashi okhuhulila amakhuwa kabwe.

¹⁸Kho abandu abo nibalekha okhwinamila muhekalu ya OMWAMI Nyasaye, Nyasaye wabakuuka babwe, ne nibachaaka okhwinamila abanyasaye bandi nende ebifwanani biomunyasaye Ashera. Eshikha shiabwe khulwa obwonooni obwo, shiachila oburuma bwa Nyasaye nibuba khu Yuda nende Yerusalemu.

¹⁹OMWAMI Nyasaye yabarumila abalakusi abokhubachetsiyia mbu bamukalushile, nebutswa abandu abo shibabahulila tawe.

²⁰Kho Roho wa Nyasaye niyetsa khu Zekaria omusiani womwisaaliisi Yehoyada. Mana nasinjila habundu aha abandu banyalilwa okhumulola ne naboola nomwoyo omukhongo ari, “OMWAMI Nyasaye areebanga mbu, eshichilile nimukhaya okhulonda amalakoke, ne khulwa okhukhola murio nimwiyenyela amabi abeene nishiina? Inywe mwamulekha, kho naye wumuleshile!”

²¹Nebutswa bafuchilisania masiliisi okhwira Zekaria, mana shinga omuruchi Yoashi yabalaka, beera Zekaria khulwa okhumulasa amachina nali mulwanyi lwa Ihekalu.

²²Omuruchi Yoashi yali niyebilila amakhuwa amalayi ka Yehoyada samwana Zekaria yali niyamukholela, ne nalaka mbu Zekaria yeerwe. Ne olwa Zekaria yali nafwitsanga yaboola nomwoyo omukhongo ari, “OMWAMI Nyasaye omwene alole aka mukholanga mana amuhelesie eshinyasio!”

²³Olwa omuyika okwo kwahwa, abelihe lia Abasiria baseera Yuda nende Yerusalemu mana nibeera abemilisi babwe boosi, ne nibayaaya ebindu ebinji nibabiyila Damasiko khumuruchi wabwe.

²⁴Abelihe lia Abasiria bali batiiti, nebutswa OMWAMI Nyasaye yabameeta amaani nibahula abelihe abanji ba Yuda, shichila abandu abo bali, nibaleshile OMWAMI Nyasaye wabakuuka babwe. Kho munjila yino omuruchi Yoashi yahelesibwa eshinyasio.

²⁵Yoashi yasaalisibwa obululu muno, ne olwa abasukube bamulekha, abakhongobe babili bafuchilisania masiliisi mana nibamwirira khushitalishie khulwa okhumala eshikwoli shiokhwira omusiani womwisaaliisi Yehoyada. Yayabilwa mwitookho lia Daudi nebutswa shibamuyabila mung'ani yabaruchi tawe.

²⁶Abo abafuchilisania masiliisi okhumwira bali Zabadi, omusiani womukhasi omu Moni, owalaangwa mbu Shimeatsi, nende Yehozabadi omusiani womukhasi omu Moabu, owalaangwa mbu Shimiritsi.

²⁷Amakhuwa kabaanabe abasiani, nende akobulakusi obunji obwarumbulwa khuye, nende amahandiko shinga olwa yakaasia Ihekalu ya Nyasaye obuyiakha kahandikwa mushitabu eshinoosinjia amakhuwa kabaruchi. Ne omusianiwe mbu Amazia yakalukha mushilenjeshie shinga omuruchi.