Read wanga 2 AKAKHALE 25 Bible Online

2 AKAKHALE 25 - wanga bible

2 AKAKHALE 25

¹Amazia yachaaka okhuruka nali nemiyika amakhumi kabili nachirano, mana naruka nali mu Yerusalemu khulwemiyika amakhumi kabili nashienda. Nyinamwana yalaangwa mbu Yehodani okhurula Yerusalemu.

²Yakhola amakhuwa amalayi imbeli wa OMWAMI Nyasaye, nebutswa shiyakhola nomwoyo kwosi tawe.

³Olwa yali niyakharalila muburuchibwe yeera abakhongo abali nibeera samwana.

⁴Nebutswa shiyayeera abaana babwe ta, habula yalonda aka OMWAMI Nyasaye yali niyalachilisia mushitabu shia Musa eshia Amalako mbu, “Abebusi baleerwa khulwa obwonooni bwabaana babwe ta, nabo abaana baleerwa khulwa obwonooni bwabebusi babwe tawe. Omundu yeerwe khulwa obwonoonibwe omwene.”

⁵Omuruchi Amazia yakhung'asia abandu ba Yuda, mana naloosia abasaatsa boosi abetsinzibulo tsia Yuda nende Benjamini, nabara mumikanda chiabelihe, okhulondana nebilibwa biabwe, mana nabara hasi wabasinjilili bemikanda echia eshikhumila nende eshikhumi. Abo bali abasaatsa bemiyika amakhumi kabili nende abashilaho, abali abanyala okhutsia okhukhalabana mwihe, boosi halala bali abasaatsa ebikhumila ebikhumi bitaru (300,000). Bali abalwani abaahule abamanya okhulwana namafumo nende ebikhumba.

⁶Okhumeetakhwo, yahandika abelihe ebikhumila eshikhumi shilala (100,000) okhurula Isiraeli aba yarunga tsikilo tsia ifetsa ebikhumila bitaru nebikhumi bine (3,400)

⁷Nebutswa omulakusi yatsia khuye namuboolela ari, “Shiolatsia mwihe nabelihe ba Abaisiraeli bano tawe, shichila OMWAMI Nyasaye shiali nabandu bokhurula mwihanga liamasaba bano tawe.

⁸Onyala okhupaara mbu haundi balakhumeeta amaani mwihe, nebutswa Nyasaye niye ouli nobunyali bwokhuhaana obuhuli noho obuhulwi, naye alachila abasuku benywe bamuhule.”

⁹Mana Ahazia nareeba omulakusi oyo ari, “Ne amapesa aka ndarunga abelihe abo katsia okhuba karie?” Omulakusi namukalusia ari, “OMWAMI Nyasaye anyala okhukhukalusilia amanji okhushila yako!”

¹⁰Kho Ahazia naseebula abelihe ba yali narunjile amapesa abo nababoolela batsie ingo. Kho abelihe abo bakalukha ingo nibasinyishiile abandu ba Yuda muno.

¹¹Mana Amazia niyoma ikholo ne niyemilila abelihebe okhutsia mwibanda liomunyu. Habwene yaho baseera aba Edomu mana nibeera abelihe ebikhumila likhumi (10,000),

¹²khandi nibatiila abandi ebikhumila likhumi (10,000). Bayila abahambe abo khubutenje bwelichina likhongo eliali mu Sela, mana nibabasindikha okhurula khwichina elo mana nibafunishila khumachina akali nikali hasi walio, ne nibafwa.

¹³Mushise eshio abelihe ba Isiraeli aba Ahazia yali naseebuule, kho mbu baleshe okhutsia ninaye mwihe, baseera amatookho ka Yuda akali hakari wa Samaria nende Betsi Horoni; nibeera abandu ebikhumila bitaru khandi nibabayaaya ebindu ebinji.

¹⁴Olwa omuruchi Amazia yachelela narula okhwira aba Edomu, yabukula ebifwanani biabanyasaye babwe, nabisinjisia, mana nachaaka okhubiinamila nende okhubisambila obubaane.

¹⁵Kano kachila OMWAMI Nyasaye natiilwa neliruma likhongo, mana naruma omulakusi khu Ahazia kho omulakusi oyo namureeba ari, “Nishiina eshichilile niwinamila abanyasaye abacheni, abalanyalile kata okhuhonokosia abandu babwe beene okhurula mubunyalibwo?”

¹⁶Olwa yali nashiboolanga ario, omuruchi Ahazia yamukondeshela naboola ari, “Neyinyanga shiina eya khwakhukhola omuchetsiyi womuruchi? Holeela tsi, nebutswa ndalaka mbu wirwe!” Omulakusi oyo naholeela tsi, nebutswa yali namuboolele ari, “Bulano emalile okhumanya mbu Nyasaye atsitsanga okhukhurusiaho, shichila okholile kano koosi, khandi olechelesiye obuchetsiyi bwanje.”

¹⁷Omuruchi Amazia wa Yuda halala nende abachetsiyibe berechekha okhuseera Isiraeli. Kho yarumila omuruchi Yehoashi wa Isiraeli, owali omusiani owa Yehoahazi khandi omwitsukhulu wa Yehu oburume mbu yetse balwane.

¹⁸Naye Yehoashi nakalusia Amazia naboola ari, “Olundi lihwa liomubikulu bia Lebanoni liarumila omusiita oburume niliboola liri, ‘Bashila omusiani wanje omukhaanawo.’ Ne isolo nabulimo yamala niyibiraho ne niyisenachila lihwa elo hasi.

¹⁹Nawe Amazia wiyitsialanga mbu wahulile aba Edomu, nebutswa ekhuchetsiyia mbu wikhale ingo. Shichila shiina wiyenyelanga amatinyu aketsa okhureera obusasishi khwiwe omwene nende khubandubo?”

²⁰Nebutswa Amazia shiyarecheresia amakhuwa ako ta, kali akokhwenya khwa Nyasaye mbu Amazia ahulwe mwiheeshichila yali niyenamila abanyasaye ba Edomu.

²¹Kho omuruchi Yehoashi wa Isiraeli yatsia okhulwana nende omuruchi Amazia wa Yuda, balwanila habundu ahalangwa mbu Betsishemeshi mu Yuda.

²²Abelihe ba Yuda bahulwa mana buli mundu niyelukha nakalukha ingowe.

²³Mana Yehoashi natiila Amazia ne namuyila Yerusalemu, mana nakwisia hasi lisiisi lia Yerusalemu okhurula khushilibwa shia Efuraimu okhuula khushiliibwa shia mukona, eshibanga eshihela oburambi tsimita ebikhumi bibili (200)

²⁴Ne nabukula itsahabu yosi nende ifetsa yosi nende ebindu biosi ebiali muhekalu, ebialindungwa nende Obedi Edomu. Khandi nabukula amabikho komunzu yoburuchi nende abandu ba yahamba, ne nakalukha ninabo Samaria.

²⁵Omuruchi Amazia wa Yuda yamenya emiyika likhumi nende chirano olunyuma lwokhufwa khwomuruchi Yehoashi wa Isiraeli.

²⁶Amakhuwa kandi koosi akomuruchi Amazia yakhola muburuchibwe okhurula khukhuchaaka okhuula khukhumalilikha kahandikwa mushitabu shibaruchi ba Yuda nende Isiraeli.

²⁷Ne okhurula khunyanga ya Amazia yaloba okhulonda amalako ka OMWAMI Nyasaye, abandu bakhaaba okhumwirira Yerusalemu, kho niyerushila Lakishi; Nebutswa baruma abandu okhumukhaaba Lakishi eyo ne nibamwirirayo.

²⁸Omubilikwe kwachinjilwa khusishili nikureerwa Yerusalemu, mana nayabilwa mubilindwa biabaruchi mwitookho lia Daudi.