Read wanga 2 AKAKHALE 26 Bible Online

2 AKAKHALE 26 - wanga bible

2 AKAKHALE 26

¹Mana abandu ba Yuda boosi nibahula Uzia owali nali nemiyika likhumi nachisasaba okhukalukha mushilenje shia Amazia samwana okhuba omuruchi.

²Niye owatiila Elatsi khandi niyombakha obuyiakha litookho elo, olunyuma lwokhufwa khwa samwana.

³Uzia yemekhwa okhuba omuruchi nali nemiyika likhumi nachisasaba, mana naruka nali mu Yerusalemu khulwemiyika amakhumi karano nachibili. Nyinamwana yalaangungwa mbu Yekolia okhurula Yerusalemu.

⁴Uzia yakhola amakhuwa amalayi imbeli wa OMWAMI Nyasaye shinga olwa Amazia samwana yakhola.

⁵Yarakhwo omwoyo okhukhalabanila OMWAMI Nyasaye tsinyanga tsiosi etsia Zakaria owali omwibaaliwe yali nashiliho mwoyo. Yakhalabanila OMWAMI Nyasaye nomwoyo kwosi, mana Nyasaye namuhelesia tsikhabi.

⁶Uzia yatsia okhulwana lihe nende aba Filisiti, mana nakwisia hasi amasiisi ka Gatsi, Yabuneri nende Ashidodi. Mana khandi niyombakha obuyiakha amatookho akali ahambi Ashidodi nende akali habundu hosi mu Filisiti.

⁷Nyasaye yamukhoonya okhuhula aba Filisiti nende Abarabu abali nibamenya Guribaali, nahula khandi Abameoni.

⁸Abamoni barunga omurungo khu Uzia, mana ifumaye niyitswana okhuula Misiri, okhuba yekhola wamaani muno.

⁹Mana Uzia niyombakha eminara mu Yerusalemu, yachiumbakha mushilibwa shiomukona, mushilibwa shiomwibanda nende aha lisiisi liashiamila. Mana nabiumbashila biosi amasiisi amarambi.

¹⁰Khandi yombakha eminara chindi mushitsiimi. Nayaba amayabo amanji kamaatsi shichila yali netsing'ombe tsinyinji, etsindi khutsio tsiali hasi webikulu natsio etsindi tsiali mubikulu; khandi yali nabalimi bemitsabibu mubikulu nende mumikunda eminulu, shichila yali niyachama obulimi.

¹¹Uzia khandi yali nende abalwani belihe aberechekha okhulwana buli lwosi, abali nibakabulwamwo mumikanda okhulondana nende obunji bwabwe shinga olwa Yeyieli omuhandichi nende omukhongo Maaseya bali nibabahandika nibali hasi wa Hanania mulala khubasesia bomuruchi.

¹²Obunji bwabakhulundu abebilibwa abasinjilila abelihe abo bali ebikhumila bibili nende ebikhumi visaba (2,600).

¹³Nabo abelihe abali hasi wabwe boosi bali ebikhumila ebikhumi bitaru namusafu nende ebikhumi birano (307,500) abalwananga namaani okhukhoonya omuruchi okhuseera abasukube.

¹⁴Uzia yahelesia abalwani belihe abo boosi ebikhumba, amafumo, tsikutwa, ebitsengwa, obuyingo, ebisele nende amachina ketsifandili khulwa lihe.

¹⁵Namwo mu Yerusalemu abasitsabe bakaasia ebindu ebiokhulasilakhwo obuyingo, nende ebiokhulasilakhwo amachina amakhongo nibali khuminaara nende khutsikona tsiamasiisi kelitookho. Ifumaye yatswana buli habundu, mana naba wamaani muno khulwa okhubela obukhoonyi obwa yanyoola okhurula khu Nyasaye.

¹⁶Nebutswa lwomuruchi Uzia yaba owamaani muno, yekhola oweinjinia muno, mana niyimureerera obusasishi. Yonoonela OMWAMI Nyasaye khulwa okhwinjila muhekalu okhusamba obubane khushimalilo shiemisango shiokhusambilakhwo obubane.

¹⁷Mana omwisaaliisi Azaria nali halala nende abesaaliisi amakhumi munane abamaani khandi abeikholo nyumu nibalonda khumuruchi,

¹⁸khulwa okhumwikalila nibamuboolela bari, “Uzia, shiali niwe oukhoyele okhusambila OMWAMI Nyasaye obubane tawe, habula abesaaliisi bonyene abolwibulo lwa Haroni nibo abaahulwa okhusamba obubane. Rula habundu hatakatifu hano! Omalile okhwonoonela OMWAMI Nyasaye, ne shiolaba netsikhabitsie tawe.”

¹⁹Uzia yali nasinjiile muhekalu ahambi nende eshimalilo shiemisango shiokhusambilakhwo obubane. Mana nasinyishila abesaaliisi abo, ne habwene nahabwene obulwale bwobuchele nibumutiila okhurulila mubwenibwe.

²⁰Omwisaaliisi Azaria halala nabesaaliisi bandi abo bahenga mubweni bwomuruchi nibali noburi obunji, mana nibamulunyia okhurula muhekalu. Naye narulamwo bwangu shichila OMWAMI Nyasaye yali namuhelesiye eshinyasio.

²¹Mana Uzia naba nobuchele okhuula khunyanga yokhufwakhwe. Yamenyanga munzuye yenyene, nalanyala okhutsia muhekalu khandi ta, shichila yekalilwa okhutsiamwo nende okhukhola emilimo chindi chiosi. Omusianiwe mbu Yotsamu niye owarukanga lihanga elo.

²²Omulakusi Isaya, omusiani wa Amozi yahandika amakhuwa kandi koosi akomuruchi Uzia yakhola mutsinyanga tsioburuchibwe.

²³Mana Uzia nafwa ne nayabilwa mwikunda liabaruchi bayabilungwamwo, nebutswa shiyayabilwa mubilindwa ebiabaruchi ta khulwa okhubela obulwalebwe bwobuchele. Mana Yotsamu omusianiwe nakalukha mushilenjeshie okhuba omuruchi.