Read wanga 2 AKAKHALE 28 Bible Online

2 AKAKHALE 28 - wanga bible

2 AKAKHALE 28

¹Ahazi yemekhwa okhuba omuruchi nali nemiyika amakhumi kabili, mana naruka nali Yerusalemu khulwemiyika likhumi nachisasaba. Shiyakhola amakhuwa amalayi imbeli wa OMWAMI Nyasaye shinga olwa Daudi kuukanyene yakhola tawe.

²Habula yakhola butswa shinga olwa abaruchi ba Isiraeli bakholanga, mana nakaasia ebifwanani biomunyasaye Baali okhurula khumukasa.

³Khandi nasambila obubane mwibanda lia Hinomu; kata khandi yahaana abaanabe abasiani shinga omusango omusambe kwokhuhaanila ebifwanani, nalondanga omwima kweshisinyo kwabamahanga, aba OMWAMI Nyasaye yali niyalonda okhurula mushialo eshio olwa Abaisiraeli bali nibenjilangamwo.

⁴Ahazia yakhola emisango nende okhusambila obubane habundu hosi hachingukhu, nende khubikulu nende buli hashiinikha shiomusaala.

⁵Khulweshio OMWAMI Nyasaye yamuhaana mumakhono komuruchi wa Siria, owamuhula mana natiila abandu abanji bomushialoshie okhuba abahambe ne nabayila Damasiko. Khandi OMWAMI Nyasaye namuhaana mumakhono komuruchi wa Isiraeli, owamuhula khandi niyeera abandube abanji muno.

⁶Omuruchi Peka omusiani wa Remalia yeera abandu ebikhumila eshikhumi namakhumi kabili (120,000) mu Yuda khunyanga ndala, boosi bali abasaatsa beitswoni; shichila bali nibaleshile OMWAMI Nyasaye wabakuuka babwe.

⁷Mwihe elo mulala khubelihe ba Efuraimu owalaangwa mbu Zikiri yeera abasaatsa bataru aba Yuda abali: Maseya omusiani womuruchi, Azirikamu owasinjililanga inzu yomuruchi nende Elikana owali omulondeleli womuruchi.

⁸Abelihe lia Abaisiraeli batiila abandu ebikhumila ebikhumi bibili (200,000), abali abakhasi, abaana abasiani nende abakhaana beinzu yabwe yene ya Isiraeli, khandi babayaaya ebindu ebinji mana nibabireera Samaria.

⁹Nebutswa omulakusi wa OMWAMI Nyasaye owalaangwa mbu Odeeli yarula natsia okhwakaanila abelihe abali nibetsanga nabahambe ba Yuda okhwinjila mwitookho lia Samaria, ne nababoolela ari, “OMWAMI Nyasaye wabakuuka benywe yatiilile abandu ba Yuda oburuma, ne neshio eshiachilile nabahaana mumakhono kenywe. Ne Nyasaye alutsi shinga mubeerire neliruma likhongo.

¹⁰Ne bulano mwenyanga okhukhola abasaatsa nabakhasi ba Yuda nende Isiraeli okhuba abasumba benywe. Kho nenywe shimuli nobwonooni imbeli wa OMWAMI Nyasaye wenywe noho?

¹¹Khulweshio recheresie amakhuwa kanje! Abahambe bano nabomunzu yenywe, kho mubaleshe batsie, nimulakhola murio ta, OMWAMI Nyasaye alamuhelesia eshinyasio muburumabwe.”

¹²Mana balala khubemilisi belihanga lia Efuraimu mbu Azaria omusiani wa Yohanani, Berekia omusiani wa Meshilemotsi, Yehizikia omusiani wa Shalumu nende Amasa omusiani wa Hadilai boosi khandi bafukula akabelihe ba Isiraeli bali nibakholanga.

¹³Nibababoolela bari, “Mulareere abahambe bano hano tawe! Khumalile okhwonoonela OMWAMI Nyasaye nende okhumuhafia liruma elichila akhuhelesie eshinyasio. Ne bulano mwenyanga okhukhola eshindu eshitsa okhuchila khube neshikha eshikhongo!”

¹⁴Kho abelihe abo nibalekhula abahambe abo nende okhuhaana ebia bali nibayaayile imbeli wabandu ba Isiraeli nende abemilisi babwe.

¹⁵Ne abandu bane abali nibahulwe babukula abahambe abo, nibabukula okhurula mubindu biali nibiyaayilwe tsingubo nibafwala abo abali eshiechenye. Nibafwala tsingubo, ebilaaro; nibabahelesia eshiokhulia nende eshiokhunywa khandi nibabakha amafura komuseituni mumafumire kabwe. Abo abali abateshele muno barebwa khutsisishili, mana abahambe abo boosi nibakalusibwa khubeinzu yabwe Yeriko, litookho liemisaala chiamashindu. Mana Abaisiraeli nibakalukha inango wabwe Samaria.

¹⁶Mutsinyanga etsio omuruchi Ahazia yarumana mbu omuruchi owa Asiria yetse amukhonye.

¹⁷Aba Edomu bali khandi nibaseerire Yuda nibatsiile nabahambe,

¹⁸nabo aba Filisiti bali nibaseeranga amataala akali hasi webikulu nende elubeka lwemulambo lwa Yuda. Batiila amatookho ka Betsishemeshi, Ayiyaloni, Gederotsi, Soko, Timuna, Gimuso halala nende amataala kabwe mana nibamenyayo.

¹⁹OMWAMI Nyasaye yareera amatinyu khu Yuda shichila omuruchi Ahazia wa Yuda yatsuuba abandu okhukhola obumayanu khandi shiyali omuhulili khu OMWAMI Nyasaye tawe.

²⁰Mana Pilesa omuruchi wa Siria niyetsa ne mushilenje shiokhumukhoonya, yamunyasia nende okhumufukula.

²¹Kho Ahazia nabukula itsahabu yomuhekalu nende eyomunzu yomuruchi nende eyali mutsinzu tsiabemilisi ba Yuda nahelesia omuruchi wa Siria, nebutswa kata ako shikamukhoonya tawe.

²²Mubise ebiomuruchi Ahazia yali mumatinyu, yakholela OMWAMI Nyasaye obwonooni obukhongo muno.

²³Yakholela abanyasaye ba Abasiria abali nibamuhulile emisango. Mana naboola ari, “Abanyasaye aba Abasiria bakhoonyile abaruchi ba Abasiria, kho nebakholela emisango boosi khandi banyala okhukhoonya.” Kano kamureerera amatinyu ye omwene halala nende khulihangalie.

²⁴Okhumeeta khu ako, yabukula ebindu biekhonyelungwa muhekalu biosi nebiarakamwo mubitonye. Yafunga emiliango chia Ihekalu mana nasinjisia ebimalilo biemisango buli habundu mu Yerusalemu.

²⁵Mu buli litookho nende litaala mu Yuda, yombakhamwo habundu hokhwinamila abanyasaye abacheni, aha basambilangaho obubane khulwa abanyasaye abo. Ne munjila yino yereerera omwene liruma lia OMWAMI Nyasaye wabakuukabe.

²⁶Amakhuwa kandi koosi akomuburuchibwe okhurula khukhuchaaka okhuula khubumalilishi kahandikwa mushitabu shiamakhuwa kobulamu bwabaruchi ba Yuda nende Isiraeli.

²⁷Omuruchi Ahazia yafwa mana nayabilwa mu Yerusalemu, nebutswa shiyayabilwa mubilindwa biabaruchi tawe. Omusianiwe mbu Hezekia niye owakalukha mushilenjeshie okhuba omuruchi.