Read wanga 2 AKAKHALE 29 Bible Online

2 AKAKHALE 29 - wanga bible

2 AKAKHALE 29

¹Hezekia yemekhwa okhuba omuruchi wa Yuda nali nemiyika amakhumi kabili nashienda. Nyinamwana yalaangungwa mbu Abiya omukhaana owa Zekaria.

²Yakhola amakhuwa amalayi imbeli wa OMWAMI Nyasaye shinga olwa Daudi kuukanyene yali niyakhola.

³Mumwesi kwambeli mumuyika kwambeli kwomuburuchibwe, omuruchi Hezekia yekula khandi ebilibwa ebia Ihekalu mana nabikaasia obuyiakha.

⁴Yakhung'asia abesaaliisi nende Abalawi mulwanyi lwebukwe olwa Ihekalu,

⁵mana nababoolela ari, “Inywe Abalawi murecheresie, mwisiiye abeene bulano, mana khandi musiiye Ihekalu ya OMWAMI Nyasaye wabakuuka benywe. Murusie muhekalu eshindu shiosi eshichifwabinjia.

⁶Abakuuka befwe shibali abasuubilwa khu OMWAMI Nyasaye wefwe ta, mana nibakhola obwonooni imbeliwe. Bamulekha khandi nibakhupa emikongo chiabwe habundu hamenyanga.

⁷Bekalaho emiliango chia Ihekalu, nibasimia tsitaha. Khandi shibasamba obubane kata okhukhola emisango emisambe muhekalu ya Nyasaye wa Isiraeli tawe.

⁸Khulweshio OMWAMI Nyasaye amalile okhusinyishila Yuda nende Yerusalemu, ne akabakholile kachenyisiye nende okhurisia abandu, khandi nakeshifimbwa murwe shinga olwa munyala okhulola netsimoni tsienywe.

⁹Kano niko akachila abakuuka befwe nibeerwa, khandi abaana befwe abasiani nende abakhaana nende abakhasi befwe nibayilwa mubuhambe.

¹⁰Bulano enzenya okhukhola indakano nende OMWAMI Nyasaye wa Isiraeli, kho mbu aleshe okhukhusinyishila ifwe.

¹¹Abaana banje mulakosiekhwo ebise tawe, ninywe aba OMWAMI Nyasaye yaahule okhumusambilanga obubane nende okhwimililanga abandu okhumwinamila.”

¹²Abalawi bahulwa bali bano; okhurula mubeshilibwa shia Kohatsi bali, Mahalatsi omusiani wa Amasayi nende Yoeli omusiani wa Azaria. Okhurula mubeshilibwa shia Merari bali, Kishi omusiani wa Abudi nende Azaria omusiani wa Yehaleli. Okhurula mubeshilibwa shia Gerishoni bali, Yoha omusiani wa Zimuna, nende Edeni omusiani wa Yoha.

¹³Okhurula mubolwibulo lwa Elizafani bali, Shimuri nende Yeheli. Okhurula mubolwibulo lwa Asafu bali Zekaria nende Matania.

¹⁴Ne okhurula mubolwibulo lwa Hemani bali Yeheli nende Shimeyi. Nalwo olwa Yedutsuni bali Shemayia nende Uzeheli.

¹⁵Olwa bali nibakhung'asiye Abalawi bashiabwe khandi nibesiyile abeene, batsia okhusiiya Ihekalu ya OMWAMI Nyasaye shinga lwomuruchi yali nalachilisiye okhulondana nende lilako lia OMWAMI Nyasaye.

¹⁶Abesaaliisi batsia habundu hatakatifu nibahasiiya. Nibarusia mulwanyi lwa Ihekalu ebindu biosi ebialimwo ebilali ebisiiye ta. Mana Abalawi abo nibabichinga biosi nibabiyila mwibanda lia Kidironi.

¹⁷Emilimo chiokhwiyahula chiachaaka khunyanga yambeli yomumwesi kwambeli, ne okhuula khunyanga ya munane bali nibamalile emilimo chiosi halala nende okhusiiya eshisika eshili habwinjililo bwa Ihekalu. Mana nibatsiililila nemilimo khutsinyanga tsindi munane, okhuula khunyanga yekhumi nakhasasaba yokhumwesi okwo, nibarechekhanga Ihekalu ya OMWAMI Nyasaye khulwa okhumwinamilamwo.

¹⁸Mana Abalawi abo nibatsia nibaboolela omuruchi bari, “Khumalile okhusiiya Ihekalu ya OMWAMI Nyasaye yoosi halala nende eshimalilo shiemisango shiokhusambilakhwo omusango omusambe, halala nebimanulwa biashio biosi, nende imesa yokhurenjekhakhwo omukaate omutakatifu halala nebimanulwa biayo.

¹⁹Khandi khukalusiye ebindu biosi ebiomuruchi Ahazia yali niyarusiamwo mumiyika echio echia yakhaya okhusuubila mu Nyasaye, mana khubisiiyile. Biosi bili imbeli weshimalilo shiemisango shia OMWAMI Nyasaye.”

²⁰Mana mumabwibwi inyanga yalondakhwo omuruchi Hezekia yahuuna okhukhung'asia abakhongo bomwitookho boosi ne nibatsia muhekalu ya OMWAMI Nyasaye.

²¹Khulwa okhukhola omusango kwokhurusiaho obwonooni bwabeinzu yomuruchi, nende bwabandu ba Yuda nende khulwa okhusiiya Ihekalu batsia nende tsisurusi musafu, amakondi musafu, ebimeme biamakondi musafu nende tsimbusi musafu. Omuruchi naboolela abesaaliisi abali abolwibulo lwa Haroni mbu babire biosi shinga emisango khushimalilo shiemisango.

²²Abesaaliisi abo baranjilila okhwira tsisurusi, mana nibamalilisia nende okwira amakondi nende tsimbusi, ne nibahanya amatsayi aka buli omusango khushimalilo eshia emisango.

²³Mana nibareerera omuruchi nende abandu bandi boosi tsimbusi etsiomusango kwokhurusiakhwo obwonooni nabo nibatsirakhwo amakhono.

²⁴Mana abesaaliisi abo nibasinza tsimbusi etsio, ne nibasundula amatsayi katsio khushimalilo shiemisango khulwa okhutisa Abaisiraeli boosi, shichila omuruchi yali nalachile mbu omusango omusambe nende okwokhurusiakhwo obwonooni chikholwe khulwa Abaisiraeli boosi.

²⁵Omuruchi Hezekiah yalonda amebaalo ka OMWAMI Nyasaye yali niyahelesia omuruchi Daudi okhubirira mu Gadi omulakusi womuruchi nende okhubirira mumulakusi Natsani, mana nasinjisia Abalawi muhekalu nibali namatungu nende ebikhuli,

²⁶ebindu biobukhana shinga ebia Daudi yakhupanga.

²⁷Mana omuruchi Hezekia nalaka mbu emisango chiokhusambwa chihaanwe, ne olwa bachaaka okhumala emisango echio abandu bemba nibetsoomia OMWAMI Nyasaye, nabo abembi nibachaaka okhukhupa tsinzuka tsiabwe nende ebiobukhana bindi biosi.

²⁸Abandu boosi abali nibaliho benamila OMWAMI Nyasaye, ne obwimbi nende obukhana bwatsiililila okhuula olwa emisango chiokhusambwa chiali nichikholilwe chiosi.

²⁹Olwa omusango okwo kwali nikuhwele, omuruchi Hezekia nende abandu boosi abali ninaye basikama hasi boosi khandi nibenamila OMWMI.

³⁰Mana omuruchi Hezekia nende abemilisi nibalachilisia Abalawi okhwimba nibetsoomia OMWAMI Nyasaye netsinyimbo tsiomuruchi Daudi yakaasia nende omulakusi Asafu. Mana abandu boosi nibetsoomia nende okhumwinamila nobusaangaafu.

³¹Mana Hezekia naboolela abandu ari, “Bulaano mwakhamala okhwiyahula abeene khu OMWAMI Nyasaye, yitse mureere emisango chienywe nende ebihaanwa bienywe biokhukhupila OMWAMI Nyasaye orio muno muhekaluye.” Kho abandu boosi nibareera emisango chiabwe nende ebihaanwa biabwe ebiokhukhupa orio muno halala nende emisango emisambe.

³²Ebihaanwa biemisango emisambe ebiabandu bareere biali tsisurusi amakhumi musafu, amakondi eshikhumi (100) nende ebimeme biamakondi ebikhumi bibili (200). Bino biosi biali ebihaanwa biomusango omusambe kwa OMWAMI Nyasaye.

³³Nabio ebihaanwa biomusango omwahule biali tsisurusi ebikhumi bisasaba (600) nende amakondi ebikhumila bitaru (3,000).

³⁴Khulwa okhubeela abesaaliisi bali batiiti muno, shibanyala okhubaaka ebihaanwa ebia omusango omusambe okwo biosi tawe, kho abasiani babwe Abalawi babakhoonya okhuula khukhuhwa khwachio, okhuula olwa abesaaliisi bandi abanji bali nibeyahule abeene. Okhuba Abalawi beyahula abeene nomwoyo kwosi okhushilakhwo abesaaliisi.

³⁵Okhumeeta khubunji bwemisango chiokhusambwa, amasinya okhurula khubihaanwa biokhureera omulembe koosi khandi kasambilwa khushimalilo shiemisango, khandi omusango kweidivai kwosi kwatsushililwa khushimalilo shiemisango khulwa buli omusango omusambe. Nindio obukhalabani bwomunzu ya OMWAMI Nyasaye bwasimikhwa khandi burio.

³⁶Omuruchi Hezekia halala nabandu boosi bekhoya muno khulwa amakhuwa koosi ka Nyasaye yali nakholeele abandu, shichila amakhuwa kano kekholekha butswa mubwangu.