Read wanga 2 AKAKHALE 3 Bible Online

2 AKAKHALE 3 - wanga bible

2 AKAKHALE 3

¹Omuruchi Daudi, samwana Solomoni yali niyamala khale okhurechekha habundu hokhumbakha Ihekalu. Ne habundu tsana hali mu Yerusalemu khushikulu shia Moria. Niho habundu tsana aha OMWAMI Nyasaye yaloleshela Daudi, khandi niho aha Arauna Omuyebusi yali niyekhoonyelangaho khulwa okhusesa imeleye. Kho omuruchi Solomoni yachaaka okhumbakha Ihekalu,

²mumwesi kwakhabili kwomuyika kwakhane okwomuburuchibwe.

³Ihekalu yomuruchi Solomoni yombakha yali eyoburambi obuhela etsimita amakhumi kabili namusafu, ne obubambuukhu obuhela tsimita shienda.

⁴Eshirokoola eshiali mubwinjililo shiali eshiobubambuukhu obuhelana nende obubambuukhu bwa Ihekalu, obwali tsimita shienda; ne okhutsia ikulu shiali noburambi obuhela tsimita amakhumi karano natsine. Ne mukari mweshirookoola eshio obwelu bwali nibwahomwa nende itsahabu inzeleleshe.

⁵Nayo inzu yene ikhongo yachifuunishila emisaala emitarakwe nende itsahabu yisiikhu, mana niyang'onibwa nemisaala chiamashindu nende eminyololo.

⁶Omuruchi yang'ona Ihekalu nende amachina kobukusi, akobukondo obulayi nende itsahabu eyarula Pariwaimu.

⁷Yekhoonyela itsahabu tsana okhufunikha amasiisi ke Ihekalu, nende khumikulo chiayo, nende khubininilo biayo nende khumiliango chiayo. Khumasiisi kayo abafundi bang'oolakhwo amang'ole kabakerubi.

⁸Eshikoro shiomukari eshialangwa mbu, Habundu hatakatifu muno shiali noburambi obuhela tsimita shienda, khandi obubambuukhu bwashio bwali tsimita shienda, obuhelana nende oburambi bwa Ihekalu yosi. Tsitani tsishila amakhumi kabili tsieitsahabu tsiekhonyelwa okhufuunikha amasiisi ka habundu hatakatifu muno.

⁹Khandi bekhoonyela tsikiramu ebikhumi birano namakhumi musafu (570) khulwa okhukaasia emisumari, ne amasiisi keshisika shieikulu koosi nafuunikhwa neitsahabu.

¹⁰Mana omuruchi khandi nalaka abakholibe okhukaasia abakerubi babili okhurula khushibia, babafuunishe neitsahabu mana babare Habundu Hatakatifu muno.

¹¹Tsimbaha tsiabakerubi abo boosi babili nitsibambuushile tsiali etsihela tsimita shienda. Olubaha lulala lwomukerubi mulala lwali tsimita tsibili nende ebitonye bibili khumita, ne lwolanga khwisiisi lieinzu. Khandi olubaha Lundi lwosi lwahela lurio nilutilaane nende olubaha lwomukerubi mulala lwali tsimita tsibili nende ebitonye bibili khumita, ne lwolanga khwisiisi lieinzu. Khandi olubaha Lundi lwosi lwahela lurio nilutilaane nende olubaha lwomukerubi undi.

¹²Olubaha lwomukerubi lwahela tsimita tsibili nebitonye bibili khumita, nalwo khandi lwolanga khwisiisi lieinzu. Ne olubaha Lundi lwomukerubi wakhabili oyo lwali tsimita tsibili nebitonye bibili khumita, ne khandi lwetiilanga khulubaha lwomukerubi wokhuranga.

¹³Tsimbaha tsiabakerubi babili abo tsiabambukha mana nitsihela tsimita shienda, ne abakerubi abo basinjila khubilenje biabwe nibahenjile mubwelu hasi.

¹⁴Ipasia eya habundu hatakatifu muno yalukhwa okhurula khungubo yikatani nende khungubo yindi eyenikhwa murangi yabuluu, nende eya sambarau, nende inzakhanyu niyilikhwo amang'ole kabakerubi nikanabilwekhwo.

¹⁵Omuruchi khandi yakaasia tsisiilo tsibili ne buli isiilo yali noburambi bweikulu obuhela tsimita ekhumi natsirano nende inusu yimita, ne natsirenjekha imbeli womuhekalu. Buli isiilo yali neikofia yoburambi obuhela tsimita tsibili nebitonye bibili khumita.

¹⁶Yakaasia eminyololo shinga echiokhwifwala mwikosi mana nachira khumirwe chietsisiilo etsio, mana natsing'onia nende amakomamanga eshikhumi shilala akomukasa nakara khuminyololo echio.

¹⁷Mana nasinjisia tsisiilo etsio mubwinjililo bwa Ihekalu, ndala nachira elubeka lwemulambo ne eyindi elubeka lwemasaba. Eyayasinjisia elubeka lwemulambo yachikulikha mbu, Yakini, nayo eyayasinjisia elubeka lwemasaba nachikulikha mbu, Boazi.