Read wanga 2 AKAKHALE 31 Bible Online

2 AKAKHALE 31 - wanga bible

2 AKAKHALE 31

¹Olwa lisabo elo liali nilihwele abandu ba Isiraeli boosi batsia mubuli litookho lia Yuda nibakwisia tsisiilo tsiamachina nende okhuremaka ebifwanani biosi biomunyasaye Ashera, khandi nibasasia ebimalilo biemisango nende buli habundu hachingukhu aha abamahanga bakholelanga emisango. Bakhola bario mushialo shia Yuda shiosi, eshia Benjamini, Efuraimu nende eshia Manase, mana boosi nibakalukha mutsingo tsiabwe.

²Mana omuruchi Hezekia nakalusiaho obulosie bwemilimo chiabesaaliisi nende Abalawi, buli mulala okhulondana nende omulimokwe. Emilimo echio chialimwo echiokhuhaana omusango omusambe, nende echiokhureera omulembe, echiokhwinamila OMWAMI Nyasaye muhekalu, echiokhwitsoomia nende okhukhupila OMWAMI Nyasaye orio muno muhekalu.

³Okhurula mubiayobie biamakondi nende tsimbusi nende ebietsing'ombe omuruchi yahaana emiruko khulwa emisango emisambe chia buli mumabwibwi nende khungoloobe, nende echiokhuhaana khu buli Isabato, nende khulisabo eliomwesi omutoro, nende echiamasabo kandi koosi kamalako ka OMWAMI Nyasaye kalaka.

⁴Okhumeetakhwo omuruchi yalachilisia aba Yerusalemu okhureerera abesaaliisi nende Abalawi ebihaanwa biabalakwa okhubahelesia, kho mbu abesaaliisi nende Abalawi bahaana obwiyangu bwabwe bwosi khu kamalako aka OMWAMI Nyasaye kalachilisinjia.

⁵Bwangu bwene olwa lilako elo lialachilisibwa abandu ba Isiraeli bareera ebihaanwa biabwe ebiambeli ebia imele, idirai, amafura komuseituni, obuushi, nende ebindu bindi ebichesungwa mumukunda, khandi bareera eshitonye shielikhumi shiemiandu chiabwe.

⁶Abandu aba Isiraeli nende aba Yuda boosi abameenya mumatookho ka Yuda bareera eshitonye shiabwe shielikhumi eshia tsing'ombe, nende amakondi, khandi nibareera ebihaanwa ebinji ebia bahaanila OMWAMI Nyasaye.

⁷Bachaka okhureera ebihaanwa ebio mumwesi kwakhataru mana nibatsiililila okhubibunjikha okhuula mumwesi kwa musafu.

⁸Olwa omuruchi Hezekia nende abemilisibe betsa nibalola ebibunjikho ebio, betsoomia OMWAMI Nyasaye khandi nibetsoomia abandube ba Isiraeli.

⁹Mana omuruchi nareba abesaaliisi nende Abalawi khu akebihaanwa ebio,

¹⁰naye Azaria Omwisaaliisi Omukhulundu womulwibulo lwa Zadoki namuboolela ari, “Okhurula olwa abandu bachaaka okhureera ebihaanwa muhekalu khubetsanga nende ebiokhulia ebikhuhela khandi ebindi bisikalakhwo, kano koosi kali kario shichila OMWAMI Nyasaye yahelesia abandube tsikhabi.”

¹¹Mana omuruchi nabalachilisia okhukaasia ebisika muhekalu ebiokhubikhamwo ebindu,

¹²kho nibabikhamwo ebihaanwa ebio nende ebihaanwa ebishitonye shielikhumi nende ebindi biosi ebiaahulwa. Omukhongo wabisinjilila biosi yali Omulawi owalangwa mbu, Konania, ne omusiani wabwe mbu Shimeyi niye owali omulondeleliwe.

¹³Abalawi bandi ekhumi bano baahulwa okhukhola emilimo hasiwe; Yeneli, Azazia, Nahatsi, Asaheli, Yerimotsi, Yozabadi, Elieli, Isimachie, Mahatsi nende Benaya. Omuruchi Hezekia nende Omwisaaliisi Omukhulundu Azaria nibo abalachilisia amakhuwa kano koosi.

¹⁴Naye Kore omusiani wa Imuna Omulawi owali omulindi omukhongo weshilibwa shiebukwe weihekalu niye owasinjilila ebihaanwa ebiahulilwa OMWAMI Nyasaye nende khulwa okhubikabula.

¹⁵Ne mumatookho kandi kabesaaliisi bamenyangamwo Kore yakhonyelelwa mubwisikwa na Balawi bandi bano; Edeni, Miniamini, Yeshua, Shemayia, Amaria, nende Shekania. Bakabulila Abalawi bashiabwe ebiokhulia okhulondana shinga emilimo chiabwe chiali,

¹⁶nebutswa shibakabula okhulondana nebilibwa biabwe tawe. Bakaba eshitonye khubuli omusaatsa owali nemiyika amakhumi kataru nende okhubisiaho abali nemilimo chiabuli nyanga muhekalu.

¹⁷Abesaaliisi bakabulilwa emilimo chiabwe okhulondana nende ebilibwa biabwe, nabo Abalawi abali bemiyika amakhumi kabili nende okhubisiaho bakabulilwa emilimo chiabwe mumikanda.

¹⁸Abesaaliisi bahandichisibwa halala nabakhasi babwe, abaana babwe nende abandi boosi abomukanda kwabwe shichila bali abesiikwa mukhwiyahula kwabwe.

¹⁹Balala khubesaaliisi abamenyanga mumatookho akakabulilwa abolwibulo lwa Haroni, noho abamenyanga mubwayilo bwemiruko echiamatookho ako, balimwo abandu aboluyali abakabulilanga abandu beshisaatsa boosi abetsinzu tsiabesaaliisi eshiokhulia nende khu buli mundu owahandichisibwa mumeera kabeshilibwa shia Abalawi.

²⁰Mushialo shia Yuda shiosi omuruchi Hezekia yakhola amakhuwa amalayi khandi akokhuchamisia OMWAMI Nyasayewe.

²¹Yanyalilwa mukosi aka yakhola shichila koosi aka yakhola khulwa Ihekalu nende khulwa okhulonda amalako yakakhola nomwoyo kwosi khandi niyehaaniile elala khu Nyasaye.