Read wanga 2 AKAKHALE 32 Bible Online

2 AKAKHALE 32 - wanga bible

2 AKAKHALE 32

¹Olunyuma lwamakhuwa kano, akomuruchi Hezekia nakhalabanile OMWAMI Nyasaye mubwisikwa, Senakeribu omuruchi wa Siria yaseera Yuda. Yabotokhana amatookho akasirwa, mana nalachilisia abelihebe okhulikulula amasiisi ako.

²Olwa Hezekiah yalola mbu Senakeribu yetsile niyerecheshe okhuseera Yerusalemu,

³yakaasia nabemilisibe halala nende abasaatsabe abamaani okhusinjisia amaatsi aketsisebele akabiranga elwanyi welitookho, nabo nibamukhoonya okhukhola bario;

⁴Abandu abanji bali nibakhung'anileho, mana nibasinjisia amaatsi koosi aketsisebele nende akemichela akabiranga mumikunda chiabwe nibarebana bari, “Eshichila omuruchi wa Siria yetse mana anyoole amaatsi amanji nishiina?”

⁵Omuruchi yamala naralisia amasiisi kelitookho khulwa okhukombakha obuyiakha, nende okhumbakha eminara khumasisi ako, khandi niyombakha lisiisi lindi elwanyi ewa eliabakaasinjia obuyaakha. Okhumeetakhwo yameeta okhukaasia lisiisi eliali elubeka lwebukwe welitookho lia Yerusalemu. Khandi yakaasia amafumo amanji nende ebikhumba ebinji.

⁶Abandu boosi abomwitookho barebwa hasi wobulindi bwabelihe abakhongo, mana nabalachilisia boosi bakhung'anile mulwanyi olwali mushilibwa shielitookho, mana naboola nabatsuuba ari,

⁷“Mularie kata okhufwa emioyo khulwa okhubela omuruchi wa Asiria nende abelihebe tawe. Ifwe khuli namaani amanji elubeka wefwe okhushila elubekawe.

⁸Ye ali namaani kabandu, nefwe khuli namaani ka OMWAMI Nyasaye wefwe khulwa okhukhukhoonya okhulwana lihe liefwe.” Kho abandu nibatinyisibwa emioyo namakhuwa komuruchi Hezekia yaboola.

⁹Olunyuma lwakano, olwomuruchi Senakeribu nabelihebe bali nibashili Lakishi yarumila omuruchi Hezekia nende abandu ba Yuda abali nibali Yerusalemu oburume buno naboolanga ari,

¹⁰“Esie Senakeribu omuruchi wa Asiria ereebanga mbu, nishiina eshimutsuubanga okhutsiililila okhuba mu Yerusalemu elimalile okhubotokhanwa nabamahe kanje?

¹¹Hezekia amuboolelanga OMWAMI Nyasaye, Nyasaye wenywe alamuhonokosia okhurula mumakhono kanje! Nebutswa Hezekia amukaatinjia, ne alamulekha mufwe khulwa inzala nende obuloho.

¹²Hezekia oyo niye owasasia habundu hokhwinamila OMWAMI Nyasaye nende ebimalilobie biemisango, mana naboolela abandu ba Yuda nende Yerusalemu mbu benamilenje OMWAMI Nyasaye nende okhumusambila obubane khushimalilo shiemisango shilala shionyene.

¹³Shimumanyile kabakuuka banje nende isie khwakholela abandu bamahanga kandi tawe? Kata abanyasaye bamahanga kandi bahoniakhwo abandu babwe okhurula mumakhono kanje?

¹⁴Ne liina olwa mulala khu abanyasaye abamahanga ako yahonokosia abandu babwe okhurula khwifwe? Kho eshichilanga nimupaara mbu Nyasaye wenywe namuhonokosie nishiina?

¹⁵Khulweshio mulaleshe Hezekia okhumukaatia noho okhumukosia ario tawe. Mulamusuubile tawe. Okhuba abulaho omunyasaye welihanga lindi liosi owahonokosia abandube okhurula khumukhono kwomuruchi wa Asiria. Kho kata omunyasaye wenywe oyo shianyala okhumuhonokosia tawe!”

¹⁶Ne abemilisi ba Asiria baboola amakhuwa amabi muno okhufukula OMWAMI OMWAMI Nyasaye nende omuruchi Hezekia.

¹⁷Mana nahandika tsibarwa tsiokhunyeka OMWAMI Nyasaye wa Isiraeli naboola ari, “Abanyasaye bamahanga shibahonokosia abandu babwe okhurula mumakhono tawe, kho kata omunyasaye wa Hezekia shialahonokosia abandube tawe.”

¹⁸Kho abemilisi abo nibalaanjilisia amakhuwa ako obutinyu Muluheburania khulwa okhwisia nende okhufwisia emioyo abandu ba Yerusalemu abali hambi namasiisi kelitookho, kho mbu bube obwangu khubo okhutiila litookho elo.

¹⁹Kho baboola khu ka Nyasaye wa Yerusalemu munjila shinga olwa baboolanga khu kabanyasaye ba abandu bandi, ebifwanani biakaasibwa namakhono kabandu.

²⁰Mana omuruchi Hezekia nende omulakusi Isaya omusiani wa Amozi nibasaya khu Nyasaye nibamuhabila mbu abakhoonye.

²¹OMWAMI Nyasaye naruma omumalaika oweera abelihe nende abemilisi belihe lia Asiria. Kho omuruchi oyo nakalukha Asiria nafimbilwe omurwe. Inyanga yindi olwa yali nali muhekalu yomunyasayewe, balala khubasianibe betsa nibamwira netsinganga tsiabwe.

²²Kho munjila yino OMWAMI Nyasaye yahonokosia omuruchi Hezekia nende abandu ba Yerusalemu okhurula mumakhono komuruchi Senakeribu wa Asiria. Mana nalekha abandu okhumenya mumulembe nabamenyani babwe boosi abali mumahanga akali hambi ninabo.

²³Mana abandu abanji nibetsa Yerusalemu nibareera ebihaanwa khu OMWAMI Nyasaye nende khumuruchi Hezekia, okhurula olwene olwo Hezekia yahelesibwa oluyali olukhongo nabandu boosi.

²⁴Mutsinyanga etsio omuruchi Hezekia yachaaka okhulwala mana naba ahambi okhufwa. Ne yamala nasaya khu OMWAMI Nyasaye, naye OMWAMI Nyasaye namuhelesia eshilolelo mbu atsia okhuhona.

²⁵Nebutswa Hezekia yali neisunga inyinji eyamukhola kata nalakhupilakhwo OMWAMI Nyasaye orio muno khu koosi aka OMWAMI Nyasaye yali namukholeele. Kho kano kakhola oburuma bwa OMWAMI Nyasaye okhwitsa khuye, nende khubandu ba Yuda nende aba Yerusalemu.

²⁶Nebutswa Hezekiah nabandu ba Yerusalemu betuutuyia, kho OMWAMI Nyasaye shiyahelesia abandu eshinyasio ta, okhuula olwa Hezekiah yafwa.

²⁷Omuruchi Hezekia yali omuyinda muno mana abandu boosi nibamuhelesia oluyali. Yalaka mbu ebiachi biumbakhwe, ebiokhubikhamwo itsahabuye, ifetsa, amachina kobukusi, amarashi, ebikhumba nende ebindu ebiobukusi.

²⁸Khandi yali nende ebiachi ebiokhubikhamwo imele, idivai, nende amafura komuseituni; khandi yali nende ebitioli bietsing'ombetsie, nende ebiko biamakondi.

²⁹Okhumeeta khubino, Nyasaye yamuhelesia amakondi, nende tsing'ombe nende obuyinda obunji kho niyombakha amatookho amanji.

³⁰Omuruchi Hezekia niye owekalalila amaatsi kisebele ya Gihoni, ne nakahenjia okhubirira mumutaro okhutsia okhuula mukari welisiisi lia Yerusalemu. Hezekia yanyalilwa mukosi aka yakholanga,

³¹kata olwa abarumwa ba Babuloni betsa okhureebelesia khumakhuwa kokhuchenya akali nikekholeeshe mushialo, Nyasaye yalekhanga Hezekia okhukhola shinga olwa yenya khulwa okhumuteema nende okhumanyilisia akali mumwoyokwe.

³²Amakhuwa kandi koosi aka omuruchi Hezekia yakhola nende okhwihaanakhwe khu OMWAMI Nyasaye nahandikwa mumalolelo komulakusi Isaya omusiani wa Amozi, nende mushitabu shiamakhuwa kobulamu bwabaruchi ba Yuda nende Isiraeli.

³³Hezekia yafwa mana nayabilwa elubeka lwemukulu lwebilindwa biabaruchi. Abandu ba Yuda nende aba Yerusalemu boosi bamuhelesia oluyali olukhongo olwa yafwa. Omusianiwe mbu Manase niye owakalukha mushilenjeshie okhuba omuruchi.