Read wanga 2 AKAKHALE 33 Bible Online

2 AKAKHALE 33 - wanga bible

2 AKAKHALE 33

¹Manase yali nali nemiyika ekhumi nachibili olwa yemekhwa okhuba omuruchi wa Yuda, mana naruka mu Yerusalemu khulwemiyika amakhumi karano nachirano.

²Yakhola obwonooni imbeli wa OMWAMI Nyasaye nalondanga ebiima biabamahanga ba OMWAMI Nyasaye yali yaloonda okhurula mushialo olwa Abaisiraeli bali nibenjilangamwo.

³Yombakha khandi habundu hachingukhu aha abamahanga benamilanga abanyasaye babwe aha Hezekiah samwana yali niyasasia. Yombakha ebimalilo biemisango biokhwinamilakhwo omunyasaye Baali, khandi nakaasia ebifwanani biomunyasaye mukhasi Ashera, mana khandi niyenamila tsing'ining'ini.

⁴Yombakha ebimalilo ebiemisango ebiebamahanga muhekalu, omwa OMWAMI Nyasaye yali niyaboola mbu nimwo omwa akhoyile okhwinamilungwa inziayo.

⁵Khandi yombakha ebimalilo ebiemisango mutsinyanyi tsibili tsiomuhekalu khulwa okhwinamila tsing'ining'ini.

⁶Yahaana abaanabe abasiani khulwa omusango omusambe mwibanda lia Hinomu. Yakhola obulakusi nende obulosi, khandi yatsitsanga khubafumu nende khubetsinyengo. Yakhola obwonooni obukhongo imbeli wa OMWAMI Nyasaye, nakhola OMWAMI Nyasaye okhutiilwa neliruma.

⁷Yabukula eshifwanani shiomunyasaye eshia yali nakaasiye nashirenjekha muhekalu, eya Nyasaye yali niyaboolela Daudi nende Solomoni omusianiwe ari, “Hano mu Yerusalemu, muhekalu yino, niho habundu eha enzahule okhurula mulihanga elia Isiraeli liosi okhuba habundu wekhoyile okhwinamilwa.

⁸Ne abandu ba Isiraeli nibaba nibalonda amalachilisio kanje koosi nende okhulinda amalako koosi akomukhalabani wanje Musa yabahelesia, kho shiemba ndafuchilila mbu paloondwe okhurula mushialo shia ndahelesia abakuuka babwe tawe.”

⁹Manase yemilila abandu ba Yuda nende aba Yerusalemu okhukhola obwonooni obunji okhushila bwabamahanga ka OMWAMI Nyasaye, aba OMWAMI Nyasaye yaloonda okhurula mushialo olwa abandube bali nibenjilangamwo bakhola.

¹⁰OMWAMI Nyasaye yachetsiyinjia Manase nende abandube nebutswa shibamuhulilanga tawe.

¹¹Kho OMWAMI Nyasaye yabareerera abemilisi abelihe lia Abasiria okhubaseera. Batiila Manase nibafumira nebibambo, nibamuboha neminyololo ne nibamuyila Babuloni.

¹²Ne olwa yali nali mukhunyakhana okhwo yetuutuyia, imbeli wa OMWAMI Nyasaye wabakuukabe mana namusaya mbu amukhoonye.

¹³Nyasaye yahulila amasaayo ka Manase mana namufuchilila okhukalukha Yerusalemu okhuruka abandu khandi kano kakhola Manase okhumanya mbu OMWAMI Nyasaye niye Nyasaye.

¹⁴Olunyuma lwa kano, Manase yameeta oburambi bwelisiisi lielwanyi eliali elubeka lwebukwe lwelitookho lia Daudi, okhuchaachila mwibanda ahambi nende isebele ya Gihoni eyili elubeka lwemasaba okhuula khushilibwa shietsinyeni, okhutsia okhuula habundu welitookho ahalaangwa mbu Ofeli. Khandi yaraho omwimilisi welihe, owa buli omukanda kwabelihe mubuli litookho eliasirwa mu Yuda.

¹⁵Yarusia muhekalu ebifwanani biabanyasaye abacheni nende eshifwanani eshia yali niyarenjekhamwo, khandi nasasia ebimalilo biemisango biali khushikulu shia Ihekalu yali, nende habundu hundi hosi mu Yerusalemu; yayila ebindu bino biosi elwanyi welitookho mana nabisukuna ehale.

¹⁶Yakaasia obuyiakha eshimalilo shiemisango aha OMWAMI Nyasaye yenamilungwa, mana nakholelakhwo emisango chiokhureera omulembe nende eshiokhukhupa orio. Yalachilisia abandu ba Yuda boosi okhwinamila OMWAMI Nyasaye wa Isiraeli.

¹⁷Kata nikali mbu abandu batsiililila okhukhola emisango habundu hundi hoosi ahokhwinamila, bachihaananga khu OMWAMI Nyasaye yenyene.

¹⁸Amathuwa kandi koosi aka Manase yakhola, namasaayo ka yasaayanga khu Nyasaye nende amakhuwa koosi kabalakusi bamuboolela muliira lia OMWAMI Nyasaye wa Isiraeli, kahandikwa mushitabu shiamakhuwa kobulamu bwabaruchi aba Isiraeli.

¹⁹Amasaayo akomuruchi nende amakalusio ka Nyasaye khuko, nende aka obwonooni bwa yakhola nashili okhwikalukhasia; amabi ka yakhola habundu ha yakaasia khulwa abamahanga okhwinamilangaho abanyasaye babwe, ebifwanani biomunyasaye Ashera bia yakaasia nende ebifwanani bia yenamilanga, kano koosi kahandikwa mushitabu shiakobulamu bwabalakusi.

²⁰Manane yafwa mana nayabilwa hango womuruchi, ne omusianiwe mbu Ammoni nakalukha mushilenjeshie okhuba omuruchi.

²¹Ammoni yali nali nemiyika amakhumi kabili nachibili olwa yemekhwa okhuba omuruchi wa Yuda, mana naruka nali mu Yerusalemu khulwemiyika chibili.

²²Yakhola obwonooni imbeli wa OMWAMI Nyasaye shinga olwa Manase samwana yakhola. Ammoni yenamila ebifwanani biosi ebia samwana yali niyakaasia, khandi nabikholela emisango.

²³Nebutswa shiyayetuutuyia nende okhukalushila OMWAMI Nyasaye shinga olwa Manase samwana yakhola tawe, habula yatsiililila butswa okhukhola obwonooni obunji kata okhushila obwa samwana yakhola.

²⁴Abakhalabani ba Ammoni balosia masilisi shinga olwa bakhamwira, mana nibamwirira munzuye yoburuchi.

²⁵Mana abandu beshialo shia Yuda nibeera boosi abali niberire Ammoni, ne nibemekha Yosia omusianiwe okhuba omuruchi.