Read wanga 2 AKAKHALE 34 Bible Online

2 AKAKHALE 34 - wanga bible

2 AKAKHALE 34

¹Yosia yali nali nemiyika munane olwa yemekhwa okhuba omuruchi wa Yuda, mana naruka nali mu Yerusalemu khulwemiyika amakhumi kataru na mulala.

²Yakhola amakhuwa amalayi imbeli wa OMWAMI Nyasaye, yalonda komuruchi Daudi kuukanyene yakholanga, mana nalonda amalako ka Nyasaye koosi obulayi.

³Mumuyika kwa munane okwomuburuchibwe olwa yali nashili omubukha yachaaka okhwinamila Nyasaye wa Daudi kuukanyene yenamilanga. Ne mumuyikakwe kwekhumi nakhabili yachaaka okhulikulula habundu aha abamahanga benamilanga, ebifwanani biomunyasaye mukhasi Ashera nende ebifwanani bindi biosi.

⁴Yasinjilila abandube okhulikulula ebimalilo biemisango ewa omunyasaye Baali yenamilungwa, khandi nakwisia hasi ebimalilo biemisango ebiobubane bwasambilungwakhwo ebiali ahambi yaho. Mana nibatubula ebifwanani biomunyasaye Ashera nende ebifwanani bindi biosi mana nibasalaasia olufu lwebifwanani ebio khubilindwa biabandu abali nibabikholela emisango.

⁵Khandi nasamba amakumba kabesaaliisi abamahanga khubimalilo biemisango ebia benamilangakhwo. Ne khulwa okhukhola kano yakhola Yuda nende Yerusalemu okhuba hasiiyikhu khandi.

⁶Yakhola amakhuwa amalala ako khumatookho ka Manase, Efuraimu, Simeoni nende kata okhuula khu aka Nafutali nende khu akasasikha koosi akali nikakabotokhana.

⁷Yalikulula ebimalilo biemisango biosi nende ebifwanani biomunyasaye Ashera mana natubula ebifwanani ebio nibikwa olufu, khandi naremaka mubitonye ebimalilo biemisango biokhusambilakhwo obubane ebiali mu Isiraeli biosi. Mana nakalukha Yerusalemu.

⁸Mumuyika kwekhumi namunane okwa muburuchibwe, olunyuma lwokhusiiya eshialo shia Yuda nende Ihekalu, omuruchi Yosia yaruma Shafani omusiani wa Azaria, Maaseya omwimilisi welitookho lia Yerusalemu, nende Yoashi omusiani wa Yohazi omuhandichi okhutsia okhukaasia obuyiakha Ihekalu ya OMWAMI Nyasaye.

⁹Batsia khu Hilikia Omwisaaliisi Omukhulundu mana nibamuhelesia amapesa akali nikahaanilwe muhekalu ya Nyasaye, aka Abalawi abali abalindi bemiliango bali nibasolole okhurula khuboluyia lwa Manase, Efuraimu, nende abandu bandi abasikala Muisiraeli, nende okhurula khubandu ba Yuda, Benjamini nende abemenyani ba Yerusalemu.

¹⁰Mana nibara amapesa ako mumakhono kabandu bataru abo abali nibaahulwa okhusinjilila emilimo chiokhukaasia obuyiakha Ihekalu ya OMWAMI Nyasaye, nabo nibarunga abandu abakholanga emilimo echio.

¹¹Barunga ababaatsi betsimbao nende abombashi khulwa okhukula amachina nende tsimbao etsiekhonyelwa khulwa okhukula tsinzu tsiabaruchi ba Yuda bali nibalekha nitsisasikha.

¹²Abandu bakhola emilimo echio bali abasuubilwa muno. Basinjililwa nende Abalawi bane bano; Yahatsi nende Obadia abomulwibulo lwa Merari, nende Zekaria nende Meshulamu abomulwibulo lwa Kohatsi. Abalawi abali abakhupi abalayi bobukhana,

¹³basinjilila emilimo echio chiosi. Balala khubo bali abahandichi, abemilisi nabandi abalindi bebilibwa.

¹⁴Olwa bali nibarusinjia amapesa mumabishilo, omwisaaliisi Hilikia yanyoola eshitabu shia Amalako ka OMWAMI Nyasaye, eshiali nishiahaanwa okhubirira khu Musa.

¹⁵Mana omwisaaliisi Hilikia naboolela omuhandichi Shafani ari, “Enyoolile eshitabu shia Amalako muhekalu ya OMWAMI Nyasaye.” Mana nashihaana khu Shafani.

¹⁶Naye Shafani nashiyila khumuruchi namuboolela ari, “Khukholile amakhuwa koosi aka wakhulachilisia.

¹⁷Khubukule amapesa koosi akabikhwa muhekalu mana khukahaanile khu abakholi bemilimo nende abasinjilili babwe.”

¹⁸Mana nameeta okhuboolela omuruchi ari, “Omwisaaliisi Hilikia yambelesiye eshitabu.” Mana Shafani nashisooma obutinyu imbeli womuruchi.

¹⁹Olwa omuruchi yahulila amakhuwa komushitabu eshio, yarandula tsingubotsie muburi.

²⁰Mana nahaana amalako kano khu Hilikia, Ahikamu omusiani wa Shafani, nende Abudoni omusiani wa Mika, nende khumuhandichi Shefani, nende khu Asaya omukholi womuruchi nababoolela ari,

²¹“Tsie mureebe okhurula khu OMWAMI Nyasaye khulwa isie, nende khulwa abandu abasikala mu Isiraeli nende mu Yuda khamakhuwa kahandikwa mushitabu shinyooleeshe shino. OMWAMI Nyasaye akhusinyishiile muno khulwa okhubela abakuuka befwe shibalonda lilakolie ta, khandi shibakhola akeshitabu shino shiboolanga mbu kakholwe tawe.”

²²Kho Hilikia nende abandi abo nibatsia okhuboola nende omulakusi omukhasi mbu Hulida, owali omukhasi wa Shalumu omusiani wa Tokhatsi omwitsukhulu wa Hasira, owalindanga tsikanzu tsiabesaaliisi, yamenyanga mu Yerusalemu mulukongo lwakhabili. Bamuboolela akali nikekholeeshe,

²³naye nababoolela mbu batsie baboolele omuruchi,

²⁴oburume buno okhurula khu OMWAMI Nyasaye bari, “Enzia okhuhelesia Yerusalemu nende abandu balio boosi eshinyasio shiebilaamo biobusi ebili mushitabu shiabasoomeele omuruchi.

²⁵Abandu bano bandobile khandi bakholeele abanyasaye bandi emisango, ne khulwa okhukhola kano basikusiye liruma lianje.

²⁶Ne khulwa omuruchi oumurumile khwisie, isie OMWAMI Nyasaye, Nyasaye wa Isiraeli emboola mbu, iwe wahulila amakhuwa kahandikwa mushitabu,

²⁷mana niwiyama obwonoonibwo, khandi niwituutuyia imbeli wanje, warandula tsingubotsio mushibeela olwa wahulila shinga ndali nenzitsanga okhuhelesia Yerusalemu nende abamenyani bamwo eshinyasio. Embuliile amasaayoko,

²⁸ne eshinyasio shienziokhureera khu Yerusalemu nende khubandu balio shishilabaho ta, okhuula lwolaba nomalile okhufwa. Ndalakhulekha ofwe mumulembe.” Mana abandu abo nibakalukha khumuruchi Yosia noburume obwo.

²⁹Omuruchi Yosia yalanga halala abemilisi boosi ba Yuda nende Yerusalemu,

³⁰mana boosi halala nibatsia muhekalu nibali nende abesaaliisi nende Abalawi, halala nende abandu bandi boosi abayinda nende abatakha. Mana omuruchi nabasoomela obutinyu nali imbeli wabwe eshitabu shieindakano, eshiali nishinyooleeshe muhekalu.

³¹Mana omuruchi nasinjila mubwiyangubwe ne nakhola indakano imbeli wa OMWAMI Nyasaye mbu, alahulilanga OMWAMI Nyasaye, nalonda amalakoke nende amalachilisioke nomwoyokwe kwosi, nende amapaaroke koosi nende okhukhola koosi akahandikwa mushitabu eshio.

³²Mana nakhola abandu ba Benjamini nende abandu bandi boosi abali nibaliho mu Yerusalemu okhusuubisia mbu balalinda indakano eyo. Kho abandu ba Yerusalemu nibalonda amalachilisio keindakano ya bali nibakaasiye nende Nyasaye wabakuuka babwe.

³³Mana omuruchi Yosia nasasia ebifwanani bieshisinyo biali mushialo shiabandu ba Isiraeli; Ne khulwa oluhoono lwa Yosia yaliho mwoyo yatsuuba abandube okhukhalabanila OMWAMI Nyasaye wabakuuka babwe.