Read wanga 2 AKAKHALE 35 Bible Online

2 AKAKHALE 35 - wanga bible

2 AKAKHALE 35

¹Omuruchi Yosia yalia lisabo elia Pasaka Yerusalemu khulwa okhuhelesia OMWAMI Nyasaye oluyali, mana khunyanga yekhumi nakhane khumwesi kwambeli nibeera ebimeme bia Pasaka.

²Mana nahelesia abesaaliisi emilimo chiabwe echia bakhoyele okhukhola muhekalu, mana nabatinyilisia mbu bachikhole obulayi.

³Mana naboolela Abalawi, abali abeechesia ba Isiraeli, khandi abali nibehaana khu OMWAMI Nyasaye ari, “Mure lisanduku lieindakano litakatifu muhekalu yomuruchi Solomoni omusiani wa Daudi yombakha. Shimwitsa okhulichinganga buli habundu ta, habula mukhalabanile OMWAMI Nyasaye.

⁴Mubukule obwiyangu bwenywe muhekalu okhulondana nende ebilibwa bienywe nende emilimo chia mwalachilsibwa nende omuruchi Daudi nende omwanawe Solomoni,

⁵mana mwiloosie kho mbu balala khwinywe babeho abokhukhoonya buli abeinzu yabandu Abaisiraeli.

⁶Okhuula mwire ebimeme bia pasaka. Kho mwisiiye abeene mana mukaasie emisango kho Abaisiraeli bashienywe baloonde amalachilisio ka OMWAMI Nyasaye yahaana okhubirira khu Musa.”

⁷Yosia yabukula okhurula mumianduchie amakondi ebikhumila amakhumi kataru (30,000) nende tsimbusi nende tsisurusi ebikhumila bitaru (3,000) nahelesia abandu baliho khulwa ebihaanwa bielisabo lia Pasaka.

⁸Abemilisibe boosi khandi bahelesia abandu, Abalawi nende abesaaliisi ebihaanwa mukhuchama. Hilikia, Zekaria nende Yeheli abali abasinjilili ba Ihekalu ya Nyasaye bahelesia abesaaliisi ebimeme biamakondi nende ebietsimbusi ebikhumila bibili nende ebikhumi bisasaba (2,600) nende tsisurusi ebikhumi bitaru (300) khulwa okhukholela lisabo lia Pasaka.

⁹Abemilisi ba Abalawi bano, Konania, nabasiani babwe Shemayia nende Netsaneli, Hashabia, Yeyieli, nende Yozabadi boosi bahaana ebimeme biamakondi nende ebietsimbusi ebikhumila birano (5,000) nende tsisurusi ebikhumi birano (500) khulwa Abalawi okhukholela omusango.

¹⁰Olwa bali nibamalile okhuloosia buli shia shindu, abesaaliisi nende Abalawi basinjila mubwiyangu bwabwe shinga olwa bali nibalachilisibwe nende omuruchi.

¹¹Olwa ebimeme ebio biali nibisinzilwe, Abalawi babibaaka nabo abesaaliisi nibahanya amatsayi kabio khushimalilo shiemisango.

¹²Mana nibakabulila abandu okhulondana nende abomukanda kwabeinzu ebihaanwa biomusango omusambe, kho mbu babihaane okhulondana nende amalako akahandikwa mushitabu shia Musa. Mana khandi nibakhola malala ako khulwa tsing'ombe.

¹³Basamba tsinyama tsielisabo lia Pasaka khumulilo shinga olwa balachilisibwa, ne nibatekha ebihaanwa ebitakatifu mutsinyungu, mutsiyamunyu nende mubifuria, mana nibakabila abandu bwangu bwangu.

¹⁴Olunyuma lwa ako, Abalawi bekaasilia abeene eshiokhulia nende khulwa abesaaliisi bomulwibulo lwa Haroni shichila bali nibakholilenje emisango chiokhusambwa nichihwela elala nende echiamasinya okhuula mushilo hakari. Kho Abalawi nibekasilia abeene eshiokhulia nende eshiabesaaliisi abolwibulo lwa Haroni.

¹⁵Abakhupi bobukhana abalondakhwo bano abeshilibwa shia Asafu mulwibulo lwa Lawi bali mubwiyangu bwabwe obwa barebwamwo okhulondana nende amalako komuruchi Daudi; Asafu, Hemani, nende Yedutsuni omulakusi womuruchi. Abalindi bomubilibwa bia Ihekalu shibarulakhwo mubwiyangu bwabwe ta, shichila Abalawi bashiabwe babarecheshela lisabo lia Pasaka.

¹⁶Kho shinga lwomuruchi Yosia yali nalachilisiye buli shiashindu shiekholekha inyanga eyo khulwa okhwinamila OMWAMI Nyasaye, nibetsulilanga lisabo lia Pasaka nende okhukhola emisango emisambe khushimalilo shiemisango.

¹⁷Khulwa tsinyanga musafu Abaisiraeli boosi abaliho balia lisabo lia Pasaka nende eliomukaate okubulamwo limela.

¹⁸Okhuchaachila mutsinyanga tsiomulakusi Samweli lisabo lia Pasaka shiliali niliakholwakhwo liri nanwa tawe. Abulakhwoho omuruchi yesi khu abarukanga, owakholakhwo lisabo lia Pasaka shinga liomuruchi Yosia yakhola halala nende abesaaliisi, Abalawi nende abandu ba Yuda nende aba Isiraeli tawe.

¹⁹Lisabo lino liakholwa mumuyika kwekhumi namunane okwomuburuchi bwa Yosia.

²⁰Olunyuma lwa Yosia okhukhola amakhuwa kano koosi khulwa Ihekalu, omuruchi Neko wa Misiri yemilila abelihe okhutsia okhulwanila habundu ahalaangwa mbu Kakemishi ahambi nende omwalo kwa Yufurate. Omuruchi Yosia yateema okhumwikalila,

²¹nebutswa Neko yamurumila abarume nibamuboolela bari, “Lihe lia enwananga lino shililikhwo khwiwe omuruchi wa Yuda tawe. Isie shienzitsile okhulwana iwe leelo tawe, habula okhulwana abasuku banje, naye Nyasaye yambooleele mbu ekhole bwangu. Nyasaye ali halala ninasi, kho olanzikalila tawe, nokhola orio OMWAMI Nyasaye alakhusasia.”

²²Nebutswa Yosia yaloba okhuhulila ka Nyasaye yamuboolela okhubirira mumuruchi Neko; kho yamala niyefwanania omundu wundi ne natsia aha obulwani bwali mushikuri shia Mekido.

²³Olwa bali nibalwananga omuruchi Yosia yafumirwa nende obura okhurula khu Omumisiri. Yosia naboolela abakhongobe ari, “Rusie hano, efumirwe obululu muno.”

²⁴Mana nibamurusia mwikaarilie ne nibamura mwikaari lindi ne nibamuyila Yerusalemu ewa yafwila. Yayabilwa mubilindwa biabaruchi. Abandu ba Yuda boosi nende aba Yerusalemu nibamwikhuula.

²⁵Omulakusi Yeremia yakaasia olwimbo lwokhwikhuula omuruchi Yosia. Mana nishiba eshiima Muisiraeli okhuula olwa leelo khulwa abakhupi bobukhana abasaatsa nende abakhasi okhwimba olwimbo luno nibekhuulanga Yosia. Olwimbo luno lunyoolekhanga mutsinyimbo tsietsinzikhuulu.

²⁶Amakhuwa kandi koosi aka Yosia yakhola, obwihaanibwe khu OMWAMI Nyasaye, obuhulilibwe khu Amalako,

²⁷nende akobulamubwe okhurula mukhuchaaka okhuula khukhumalilikha koosi kahandikwa mushitabu shiabaruchi ba Isiraeli nende Yuda.