Read wanga 2 AKAKHALE 36 Bible Online

2 AKAKHALE 36 - wanga bible

2 AKAKHALE 36

¹Abandu ba Yuda bemekha Yehoahazi omusiani wa Yosia okhuba omuruchi mu Yerusalemu.

²Yehoahazi yali nali nemiyika amakhumi kabili nachitaru olwa yemekhwa okhuba omuruchi wa Yuda, mana naruka nali mu Yerusalemu khulwemiesi chitaru.

³Omuruchi Neko wa Misiri yamurusia khuburuchi namukhola omuhambe khandi nakhola abandu ba Yuda okhurunga obushuru bweifetsa tsikilo ebikhumila musafu nebikhumi birano (7,500), nende itsahabu tsikilo ebikhumi musafu natsirano.

⁴Neko yemekha Eliakimu omusiani wabwe Yehoahazi okhuba omuruchi wa Yuda nende Yerusalemu, mana nakalukhasia eliiralie okhuba Yehoyakimu. Nebutswa Neko yabukula Yehoahazi ne namuyila Misiri.

⁵Yehoyakimu yali nemiyika amakhumi kabili kachirano olwa yemekhwa okhuba omuruchi wa Yuda, mana naruka nali mu Yerusalemu khulwemiyika ekhumi namulala. Yakhola obwonooni imbeli wa OMWAMI Nyasayewe.

⁶Omuruchi Nebukadineza wa Babuloni yaseera Yuda mana natiila Yehoyakimu ne namuyila Babuloni namuboyile neminyololo.

⁷Nebukadineza yabukulakhwo emiandu chia Ihekalu ne nachiyila munzuye yoburuchi ya Babuloni.

⁸Amakhuwa kandi koosi aka Yehoyakimu yakhola, halala namakhuwa amabi ka yakholanga, kahandikwa mushitabu shiabaruchi ba Isiraeli nende ba Yuda. Omusianiwe mbu Yehoyakini niye owakalukha mushilenjeshie okhuba omuruchi.

⁹Yehoyakini yali nemiyika ekhumi namunane olwa yemekhwa okhuba omuruchi wa Yuda, mana naruka nali mu Yerusalemu khulwemiesi chitaru netsinyanga ekhumi. Yesi khandi yakhola obwonooni imbeli wa OMWAMI Nyasaye.

¹⁰Mukhuchaaka khwomuyika omuruchi Nebukadineza yatiila Yehoyakini mana namuyila Babuloni nali omubohe, khandi nabukula emiandu chi Ihekalu. Mana Nebukadineza niyemekha Zedekia samwana Yehoyakini omutiiti okhuba omuruchi wa Yuda nende Yerusalemu.

¹¹Zedekia yali nemiyika amakhumi kabili namulala olwa yemekhwa okhuba omuruchi wa Yuda, mana naruka nali mu Yerusalemu khulwemiyika ekhumi namulala.

¹²Yesi khandi yonoona imbeli wa OMWAMI Nyasaye ne shiyayetuutuyia olwa yahulila amakhuwa komulakusi Yeremia olwa yamuboolela amakhuwa ka OMWAMI Nyasaye tawe.

¹³Zedekia yakholela omuruchi Nebukadineza induli owali niyamunichilisia okhwitsuba muliira lia Nyasaye mbu alaba omuhulili. Zedekia yali womwoyo omutinyu khandi naloba okhwiyama obwonoonibwe nende okhukalukha khu OMWAMI Nyasaye wa Isiraeli.

¹⁴Okhumeetakhwo abemilisi ba Yuda, nende abesaaliisi nende abandu boosi balekha okhuba abasuubilwa khu OMWAMI Nyasaye nibalonda ebiima bieshisinyo biosi ebia abamahanga kho nibafwabia Ihekalu ya OMWAMI Nyasaye eya OMWAMI Nyasaye omwene yali nachisiiyile.

¹⁵OMWAMI Nyasaye wabakuuka babwe yatsiililila okhubarumila likhuwa okhubirira mubalakusi okhubachetsiyia shichila yenyanga okhubahonokosia halala nende Ihekalu.

¹⁶Nebutswa batseshelela abarumwa ba Nyasaye abo, nibachaaya amakhuwake khandi nibalechelesia abalakusi abo, okhuula mukhumalilikha lwoburuma bwa OMWAMI Nyasaye khubandube bwali obunji mbu kata abulaho owakhehonokosiye tawe.

¹⁷Kho OMWAMI Nyasaye yabareerera omuruchi wa Babuloni, owabaseera mana niyeera abaraaka ba Yuda abali kata muhekalu. Shiyabelelakhwo omundu yesi abe omuraaka kata omukofu, omusaatsa kata omukhasi, omulwale kata omulamu tawe. Nyasaye yabahaana boosi khu Nebukadineza.

¹⁸Omuruchi wa Babuloni oyo yayaaya omwandu kwa Ihekalu kwosi, halala nende omwandu kwomuruchi nende okwa abemilisibe.

¹⁹Basamba Ihekalu nende litookho lia Yerusalemu liosi, nibasamba tsinzu tsiabaruchi tsiosi nende okhusasia eshindu shiosi eshialimwo.

²⁰Yabukula abandu boosi abasikala nibehonokokha okhufwa nabayila mubuhambe Babuloni, ewa bamukhalabanila halala nabasianibe shinga abasumba okhuula lwoburuchi bwa Pashia bwachaaka.

²¹Kho aka OMWAMI Nyasaye yali niyamala khale okhurumbula okhubirira mumulakusi Yeremia nikosibwa mbu, “Eshialo shiakhasikale likunda nishilalimwakhwo ta khulwemiyika amakhumi musafu khulwa okhurunga amahulukho komusabato ka balaalonda tawe.”

²²Mumuyika kwambeli kwa Koreshi wa Pashia yali omuruchi, OMWAMI Nyasaye yakhola aka yali niyarumbula khale okhubirira mumulakusi Yeremia okhuusibwa. Yakhola Koreshi okhuhaana lilako lino nende okhuliruma mubuhandiche mbu lisoomwe nomwoyo omukhongo habundu hosi mushialo shia yarukanga.

²³“Kano niko aka Koreshi omuruchi wa Pashia aboola mbu, OMWAMI Nyasaye, Nyasaye womwikulu yakholile isie okhuruka eshialo shiosi, khandi yanzahule isie okhumumbashila Ihekalu Yerusalemu mu Yuda. Kho inywe aba muli abandu ba Nyasaye mutsie ebweneyo, naye OMWAMI Nyasaye wenywe abe ninenywe.”