Read wanga 2 AKAKHALE 4 Bible Online

2 AKAKHALE 4 - wanga bible

2 AKAKHALE 4

¹Omuruchi Solomoni yakaasia eshimalilo shiemisango shiomukasa, oburambi bwashio bwahelana nende obuchikha bwashio obwali tsimita shienda, ne okhutsia ikulu shiali noburambi buhela tsimita tsine nende inusu.

²Khandi nakaasia litanji liamaatsi liomukasa elieingara, eliali noburambi bwokhutsia hasi tsimita tsibili nende ebitonye bibili khumita, ne liali tsimita tsine nebitonye bine khumita okhurula khululika eyi okhuula khululika lundi eyi, ne okhulibotokhana liosi liali tsimita likhumi natsitaru nende ebitonye bibili khumita.

³Ne okhulibotokhana liosi elwanyi khumunwa khwalio, khwaliho netsinyaali tsibili etsiokhuling'ona, olunyaali lulala lwali ikulu wolundi. Okhung'onibwa tsana khwali okhwetsisurusi tsibili, natsio nitsilomba eshindu shilala nelitanji tsana elo.

⁴Litanji elo liekhala khumikongo chietsisurusi tsieitsahabu likhumi natsibili etsiahenga elwanyi, mbu buli tsitaru khutsio tsiahenga elubeka lulala.

⁵Tsimbafu tsielilanji elo tsiali nobusiro obuhela etsimilimita amakhumi musafu natsirano. Olulika lwalio lwali shinga olulika lweshikombe olwekanya nilurula elwanyi mana nilufwana shinga eshimuli shielitanye. Litanji elo liachinganga amaatsi akahela tsilita ebikhumila amakhumi kasasaba (6,000).

⁶Khandi nakaasia tsingaraya likhumi, tsirano tsiarenjekhwa elubeka lwemulambo weihekalu, natsio etsindi tsirano nitsiarenjekhwa elubeka lwemasaba weihekalu eyo. Tsingaraya etsio tsiekhonyelungwa khulwa okhwosia ebitonye biemiruko chiasambungwa khulwa omusango. Nebutswa amaatsi akali mwitanji likhongo kali kabesaaliisi okhwisinga.

⁷ Yakaasia khandi ebichibi bietsitaha likhumi bieitsahabu okhulondana nende omufwano okwalakwa. Mana nabirenjekha muhekalu, birano elubeka lwemulambo nabio birano bindi elubeka lwemasaba.

⁸Khandi nakaasia tsimesa likhumi natsirenjekha muhekalu, narenjekha tsirano elubeka lwemulambo netsindi tsirano elubeka lwemasaba. Mana khandi nakaasia tsindaabo tsieitsahabu eshikhumi shilala (100).

⁹Omuruchi khandi nakaasia olwanyi olukhongo khulwa abesaaliisi, nende olundi olwomukari. Emiliango chiomubilibwa hakari watsio chiafuunikhwa nomukasa.

¹⁰Ne nara litanji liamaatsi ahambi mukona we Ihekalu khulubeka lwebukwe lwemulambo.

¹¹Hiramu khandi nakaasia tsinyungu, emiikho, nende ebikaye. Mana namalilile okhukaasia ebindu biosi ebia yali niyasuubisia okhukaasilia omuruchi Solomoni muhekalu eya Nyasaye.

¹²Kho yakaasia, tsisiilo tsibili, nende tsikofia khutsio etsiali shinga ebikaye, nende amang'ole keminyololo echiabaatswa khukofia iya buli siilo.

¹³Khandi yakaasia amakomamanga komukasa ebikhumi bine (400) nikalosibwa mutsinyaali tsibili okhubotokhana tsikofia etsiokhutsisiilo etsio.

¹⁴Khandi nakaasia ebichibi likhumi halala nende tsingaraya tsiabio;

¹⁵Nende litanji liamaatsi nende tsisurusi ekhumi natsibili etsiali mulwalo lwalio.

¹⁶Khandi nakaasia tsinyungu, emiikho, nende obuuma bwokhuliila; nende ebindu bindi ebifwana birio. Ebindu biosi ebia Huramu omusitsa wobwiranyi yakaasilia omuruchi Solomoni khulwa okhwikhoonyelwa muhekalu eya OMWAMI Nyasaye biarula khumukasa okurutilwe.

¹⁷Omuruchi yalaka mbu bilonjelwe mwitoyi elili hakari wa Sakotsi nende Zareda mwibanda lia Yorodani.

¹⁸Kho ebindu ebinji biakasibwa, mana kata shiyaliho owakhamanyilisiye obusiro obwomukasa kwosi okwekhonyelwa tawe.

¹⁹Omuruchi Solomoni khandi yakaasia ebimanulwa biosi ebiomuhekalu okhurula khutsahabu nibio; eshimalilo shiemisango nende tsimesa tsiemikaate echihaanilungwa Nyasaye.

²⁰Ebichibi bietsitaha nende tsitaha tsieitsahabu inzeleleshe etsiaashilanga imbeli wa Habundu Hatakatifu muno shinga olwa kaloosibwa.

²¹Ebimuli biokhung'onwa, tsitaha, nende amahana, biosi biakaasibwa okhurula khutsahabu inzeleleshe.

²²Amahana kokhusimilia tsitaha, ebikaye, nende tsisahani, nende ebikaye biobubane nende ebifuria ebiokhuchinjilakhwo amanda komulilo. Ebindu bino biosi biakaasibwa okhurula khutsahabu inzeleleshe. Emiliango chielwanyi we Ihekalu nende emiliango chia Habundu Hatakatifu muno chiafuunikhwa nende itsahabu.