Read wanga 2 AKAKHALE 6 Bible Online

2 AKAKHALE 6 - wanga bible

2 AKAKHALE 6

¹Mana omuruchi Solomoni nasaaya naboola ari, “OMWAMI Nyasaye, iwe waahula okhumenya mumaleesi nende mushiilima.

²Ne bulaano ekhumbashiile Ihekalu yoluyali habundu aha olamenyanga inziayo.”

³Olwa abandu ba Isiraeli boosi bali nibashisinjiileho, omuruchi yashiukhana ne nabalaamila tsikhabi.

⁴Ne naboola ari, “OMWAMI Nyasaye wa Isiraeli yetsoomibwe! Ye wumalile okhuhesia aka yasuubisia khumuruchi Daudi papa wanje, olwa yamuboolela ari,

⁵‘Okhurula khunyanga yandarusia abandu banje Misiri okhuula olwa leelo shindayahulakhwo litookho liosi mushialo shia Isiraeli shinga habundu hokhumbakha Ihekalu khulwa okhwinamilwamwo tawe. Khandi shindayahulakhwo omundu yesi okhuba omwimilisi wabwe tawe.

⁶Nebutswa bulano emalile okhwahula Yerusalemu okhuba habundu ha betsa okhunzinamilangaho, nawe Daudi okhuba omuruchi wabandu banje ba Isiraeli.’ ”

⁷Solomoni natsiililila okhuboola ari, “Papa wanje Daudi yenya mumwoyokwe okhumbakha Ihekalu khulwa okhwinamilamwo OMWAMI Nyasaye wa Isiraeli;

⁸Nebutswa OMWAMI Nyasaye yamuboolela ari, ‘Wali habwene mumwoyokwo olwa wenya okhunzumbashila Ihekalu.

⁹Nebutswa shiolichiumbakha ta, habula omwanawo omusiani owamatsayiko keene niye oulinzumbashila Ihekalu.’ ”

¹⁰“Bulano OMWAMI Nyasaye amalile okhuhesia obusuubisiebwe, isie ndakalukha mushilenje shia papa shinga omuruchi wa Isiraeli, khandi enzumbashiile OMWAMI Nyasaye wa Isiraeli Ihekalu eyokhumwinamilamwo.

¹¹Erenjeeshe muhekalu tsana eyo lisanduku lieindakano, eya OMWAMI Nyasaye yakaasia nabandu ba Isiraeli.”

¹²Mana Solomoni natsia imbeli wabandu nasinjila khushimalilo shiemisango nakalikha amakhonoke mwikulu nasaaya.

¹³Solomoni yali niyombakha omushinji kwomukasa kwokhusinjilangakhwo, ne niyara hakari mulwanyi omushinji okwo kwali nobuchikha obuhelana nende obubambukhu nabwo bwali tsimita tsibili nende ebitonye bibili khumita, ne oburambi bwakwo okhutsia ikulu bwali imita ndala nende ebitonye bitaru khumita. Solomoni yanina khumushinji okwo ne nasikama hasi, aha buli mundu yanyalilwa okhumulola, ne nachinguula amakhonoke ikulu

¹⁴Mana nasaaya naboola ari, “OMWAMI Nyasaye wa Isiraeli, abulaho omunyasaye wundi shinga iwe mwikulu nende khushialo. Iwe olindanga indakanoyo nende abandubo, mana obamanyie obuheelibwo olwa bamenya nibakhuhulilanga nomwoyo kwosi.

¹⁵Ohesiye obusuubisie bwa wasuubisia papa wanje Daudi, olwa leelo luno amakhuwa koosi koosiibwe.

¹⁶Kho OMWAMI Nyasaye wa Isiraeli, olinde khandi obusuubisie bundi obwa wasuubisia papa wanje olwa wamuboolela mbu buli lwosi mulala khubolwibulolwe alabetsangaho shinga omuruchi wa Isiraeli, nikaba mbu, balalonda amalako koko shinga olwa Daudi mwene yakalonda.

¹⁷Khulweshio OMWAMI Nyasaye wa Isiraeli, lekha bulano koosi aka wasuubisia omukhalabaniwo Daudi koosibwe.

¹⁸“Ne Nyasaye anyala okhumenya mushialo halala nabandu toto? Kata likulu liosi shiliakhakhuhela ta, kho Ihekalu yenzumbashe yino yakhakhuhela yirie?

¹⁹OMWAMI Nyasaye, Nyasaye wanje, isie endi omukhalabaniwo. Recheresia amasaayo kanje mana wukholile akekhusabanga.

²⁰Olindenje Ihekalu yino eshilo neshiteere. Iwe omwene wetsuba mbu hano niho aha nawinamilungwe. Kho wurecheresinjia olwa ekhusaaya nehenjile khu Ihekalu yino.

²¹Orecheresinjie amasaayo kanje nende kabandubo Abaisiraeli olwa basaaya nibahenjile khu Ihekalu yino. Okhurecheresinjie mana okhubeele tsimbabasi noli inangowo mwikulu.

²²“Olwa omundu yonoonela owashie, ne nibamurakhwo eshitsubo, nibamwitsubia khushimalilo shiemisango muhekalu yino,

²³kho omurecheresia noli mwikulu mana omukhalachile. Oyaasinjie nokhalachila abakhalabanibo habwene; ohelesinjie oweshikha eshinyasio, naye oubula eshikha nomuleshela.

²⁴“Abandubo Abaisiraeli nibaba nibahulwa nabasuku babwe shichila mbu bakhwonooneele, mana bakhukalushile nibetsa muhekalu yino, nibetutuyia nibakhusaaya mbu obaleshele,

²⁵OMWAMI Nyasaye nochama obarecheresie noli mwikulu. Obaleshele obwonooni bwabwe mana obakalusie mushialo shia wabahelesia bo halala nende abakuuka babwe.

²⁶“Noba niwakhekalila ifula okhukwa shichila abandubo bakhwonooneele, ne nibaba nibeyama obwonooni bwabwe mana bashiukhane nibahenga khu Ihekalu yino nibetuutuyia nibakhusaaya.

²⁷OMWAMI Nyasaye nochama orecheresie abakhalabanibo abandu Abaisiraeli mana obaleshele obwonooni bwabwe noli mwikulu. Khandi obechesie okhukholanga aka habwene. Kho nolwa iwe OMWAMI Nyasaye olabakwisilia ifula khwiloba lilio lino elia wahelesia abandubo okhuba obulaame bwabwe bweinziayo.

²⁸“Inzala niyakhaba mushialo noho olumbe noho kata ebirakwa nibiakhonoonekha khulwa obushindu obunji noho okhusasibwa netsisiche, noho kata abandubo nibaba nibaseerwa nabasuku babwe, noho obulwale noho olufu nibiakhanyolekha mubo,

²⁹orecheresie okhuhaba khwabwe. Omundu yesi khubandubo ba Isiraeli niyakhachinguula amakhonoke khulwa okhusaaya khwiwe muhekalu yino khulwa eshibeela mumwoyokwe,

³⁰orecheresie okhusaayakhwe. Obarecheresinjie noli nangowo mwikulu mana obabeele tsimbabasi. Iwe wenyene niwe oumanyile amapaaro komukari komundu. Okholele buli mundu shinga lwokwanile,

³¹kho abandubo bakhurie khandi bakhuhulile khulwa tsinyanga tsiosi etsia bamenya mushialo shia wahelesia abakuuka befwe.

³²“Olwa omundu omucheni owamenya mushialo shiehale ahulilakhwo shinga lwoli omukhongo khandi owamaani, khandi shinga olwa buli lwosi werechekha okhukhola likhuwa, mana niyetsa nakhusaaya muhekalu yino,

³³nochama orecheresie okhusaayakhwe. Noli mwikulu wa wamenya omurecheresie mana omukholele akaba nakhusabile; kho abandu boosi abali mushialo muno bakhumanye khandi bakhuhulile shinga olwa abandubo Abaisiraeli bakholanga. Mana balamanya mbu Ihekalu yekhumbashile yino, nimwo omwa okhoyile okhwinamilwa.

³⁴“Noba nolaka abandubo okhutsia mwihe okhuseera abasuku babwe, nabo nibakhakhusaaya hosi aha baba nibali nibahenjile khwitookho lino elia waahula nende khu Ihekalu yino eya ndakhumbashiile iwe,

³⁵orecheresie okhusaaya khwabwe. Obarecheresie noli mwikulu mana obanyalile okhuhula.

³⁶“Abandubo nibakhakhwonoonela, okhuba bulaho oulonoonanga ta, mana muburumabwo oleshe abasuku babwe babahule, khandi babayile mubuhambe mushialo shiehale, kata eshialo eshio nishiakhaba eshiehale muno,

³⁷nochama orecheresie okhusaaya khwabandubo. Ne nibakheyama obwonooni bwabwe nibali mushialo eshiehale eshio, nibakhusaaya nibeyama obwonooni bwabwe nende amabi ka bakhola, ohulile okhusaaya khwabwe OMWAMI Nyasaye.

³⁸Ne nikakhaba mbu nibali mushialo eshio bakheyama obwonooni bwabwe mubwatoto khandi mubulunjishi, mana bakhusaaye nibahenjile mushialo shino eshia wahelesia abakuuka babwe, nende khwitookho lino elia waahula nende khu Ihekalu yino eya ndakhumbashiile iwe,

³⁹nochama orecheresie akhusaaya khwabwe. Noli inangowo mwikulu abarecheresie babeele tsimbabasi khandi obaleshele obwonooni bwabwe.

⁴⁰“Kho bulano Nyasaye wanje, okhuhenjekhwo mana ohulile amasaayo akahaanungwa muhekalu yino.

⁴¹Bulano OMWAMI Nyasaye obuushe, ne noli nelisanduku lieindakano elimanyinjia obunyalibwo winjile muhekalu yino mana omenyemwo inziayo. Ohelesie abesaaliisibo ikhabi mukosi aka bakholanga, nabo abandubo boosi basaangaale khulwa obulayibwo khubo.

⁴²OMWAMI Nyasaye, olaloba omuruchi wa waahula ta. Witsulile obuheelibwo obwa wamanyia omukhalabaniwo Daudi.”