Read wanga 2 AKAKHALE 7 Bible Online

2 AKAKHALE 7 - wanga bible

2 AKAKHALE 7

¹Olwa omuruchi Solomoni yamala okhusaaya, omulilo kwekha hasi okhurula mwikulu ne nikusamba emisango chiali nichihaanilwe, nabwo obulafu obukhongo bwokhubaho okhwa OMWAMI Nyasaye nibwitsula muhekalu yosi.

²Abesaaliisi bakhaywa okhwinjila muhekalu eyo shichila obulafu bwokhubaho okhwa OMWAMI Nyasaye bwali nibwitsulemwo.

³Olwa abandu ba Isiraeli balola omulilo nikwikha okhurula mwikulu, nabwo obulafu bwokhubaho okhwa OMWAMI Nyasaye nibwitsula muhekalu boosi basikama hasi khumushinji kwamachina nibenamila Nyasaye nende okhumwitsoomia khulwa obulayibwe nende obuheelibwe bweinziayo.

⁴Mana Solomoni nende abandu nibakholela OMWAMI Nyasaye emisango.

⁵Omuruchi Solomoni yahaana emisango chietsing'ombe ebikhumila amakhumi kabili nabibili (22,000) nende amakondi ebikhumila eshikhumi namakhumi kabili (120,000) okhuba shinga omusango kwokhwishia. Kho nilwo lwomuruchi halala nabandu boosi baahula ehekalu.

⁶Abesaaliisi basinjila mubwiyangu bwabwe, nabo Abalawi nibasinjila nibahengane ninabo, boosi nibetsoominjia OMWAMI Nyasaye nobukhana bwokhwimbilamwo tsinyimbo bwomuruchi Daudi yali niyahaana. Mana nibemba olwimbo nibaboola bari, “Obuheelibwe nabweinziayo!” Shinga butswa olwa bali nibalakwa okhukhola nomuruchi Daudi. Abesaaliisi bakhupa tsinzika tsiabwe nabo abandu bandi nibasinjiile.

⁷Omuruchi Solomoni nasiiya khulwa okhwahula hakari holwanyi, olwali imbeli weihekalu, mana nahaanilaho emisango chiokhusambwa nichihwela elala nende echieimele nende amasinya kemisango chiokhureera omulembe. Yakhola ario shichila eshimalilo shiemisango shiomukasa eshia yali nakaasiye shishiakhahelilekhwo emisango echio chiosi tawe.

⁸Omuruchi Solomoni halala nabandu Abaisiraeli boosi balia lisabo liamatili khulwa tsinyanga musafu. Omukanda omukhongo kwa abandu kwaliho okhurula khunjila ikhongo ya Hamatsi emasaba okhutsia okhuula khulwakho lwa Misiri emulambo.

⁹Bali nibamalile tsinyanga musafu nibaahulilanga OMWAMI Nyasaye eshimalilo shiemisango khandi etsindi musafu nibaliitsanga lisabo liamatili. Mana khunyanga yokhumalilikha nibaba nomukhung'ano kwokhwikala.

¹⁰Ne khunyanga yalondakhwo eyamakhumi kabili nende khataru khumwesi kwamusafu omuruchi Solomoni yaseebula abandu nibenyokha. Boosi basangalila tsikhabi etsia OMWAMI Nyasaye yali nahelesiye abandube ba Isiraeli, nende khu Daudi nende khu Solomoni.

¹¹Olwa omuruchi Solomoni yali namalile okhumbakha Ihekalu nende inzuye yoburuchi, namalile okhuhesia lichomolie obulayi,

¹²OMWAMI Nyasaye yamuloleshela mushilo. Mana namuboolela ari, “Embuliile okhusaayakhwo, khandi efuchilile Ihekalu yino okhuba habundu hokhuhaanila isie emisango.

¹³Buli lwosi olwa nandikalilenje ifula okhulekha okhukwa, noho olwa eruma tsisiche okhulia ebiraache, noho kata olwa eruma olumbe khubandu banje;

¹⁴mana abandu banje abalangungwa eliira lianje, nibaba nibasaaya khwisie, nibeyama obwonooni bwabwe nende okhwikalukhasia okhurula khubumayanu bwabakholilenje, kho nasi ndalabarecheresia nendi mwikulu, nebaleshela obwonooni bwabwe nende okhukhola eshialo shiabwe okhuba eshiobuyinda khandi.

¹⁵Ndalalinda Ihekalu yino khandi nerecheresinjie amasaayo koosi akahaanilwamwo,

¹⁶shichila emalile okhuchiahula nende okhuchisiiya okhuba habundu hekhoyile okhwinamilwa khulwa inziayo. Ndalachilindanga nende okhuchiheela buli lwosi.

¹⁷Noba nolakhalabanila nomwoyokwo kwosi shinga olwa Daudi papawo yakhola, nolinda amalako kanje nende okhukhola koosi aka ndakhulachilisia,

¹⁸kho nasi ndalakhola aka ndasuubisia papawo Daudi, olwa ndaboola mbu, eshialo shia Isiraeli buli lwosi shiakharukungwe nende omundu okhurula mulwibulolwe.

¹⁹Nebutswa iwe halala nabandubo nimulekha okhulonda amalako kanje aka ndamuhelesia, ne nimwinamila abanyasaye bandi,

²⁰kho emba ndalamurusia mushialo shia ndamuhelesia, nende okhulekha Ihekalu yino, eya emalile okhwahula okhuba habundu hekhoyile okhwinamilwa. Ndalachikhola okhuba habundu hokhuchaywa nende okhutseshelelwa nabandu boosi.

²¹“Kata olwa bulano Ihekalu yino yitsoomibungwa, olwene olwo abandu boosi abalibira aha yili balihuka nibereeba bari, ‘Shichila shiina OMWAMI Nyasaye nakhola kano khushialo nende khuihekalu yino?’

²²Ne abandu bakhakalusie bari, ‘Kali shichila mbu balekha OMWAMI Nyasaye wabwe owarusia abakuuka babwe Misiri. Bahulilanga nende okhwinamila abanyasaye bandi. Niko akachila OMWAMI Nyasaye nareera khubo amasira kano.’ ”