Read wanga 2 AKAKHALE 8 Bible Online

2 AKAKHALE 8 - wanga bible

2 AKAKHALE 8

¹Omuruchi Solomoni yabukula oluhoono lwemiyika amakhumi kabili khulwa okhumbakha Ihekalu nende inzuye yoburuchi.

²Yombakha khandi obuyia amatookho komuruchi Hiramu yali niyamuhelesia mana naruma Abaisiraeli okhutsia okhumenyamwo.

³Khandi yatiila eshialo shia Hamatsi nende Zaba;

⁴Mana niyombakha amasiisi kelitookho lia Palimira eliali mushitsiimi. Yombakha obuyia amatookho koosi akali Hamatsi akali kokhubikha ebindu.

⁵Solomoni yombakha obuyia amatookho kano; Betsi Horoni eliemukulu nende Betsi Horoni eliemwalo akali nebilibwa ebinyala okhwikalwa nende amasiisi amarambi.

⁶Yombakha halala nende litookho lia Baalatsi, nende amatookhoke koosi aka yabikhangamwo ebindubie, nende koosi aka yali niyarechekhamwo tsifarasitsie namakaarike. Yahesia lichomolie liokhumbakha mu Yerusalemu, Lebanoni, nende mushialo shiosi eshia yarukanga.

⁷Abandu boosi aba Abaisiraeli balekha okhwira, abasikala abalamu khuba Hiti, Abamori, Abaperisi, Abahiwi nende Abayebusi bano boosi shibali abokhuluyia lwa Abaisiraeli tawe.

⁸Abolwibulo lwabwe abasikala mushialo, aba Abaisiraeli balayeera ta, Solomoni yabakhola okhuba abakholibe, mana abetsukhulu babwe bashilinji bario okhuula olwa leelo.

⁹Nebutswa Abaisiraeli Solomoni shiyabakhola okhuba abakholi ta habula bakhalabana mwihe shinga abakhongo belihe, abokhuyila amakaari nende abokhuyila tsifarasi.

¹⁰Solomoni yali nabandu ebikhumi bibili namakhumi karano abasinjililanga emilimo chiobumbashi.

¹¹Solomoni yareera omukhasiwe, owali omukhaana womuruchi wa Misiri, okhurula mwitookho lia Daudi namuyila munzu ya yali niyamumbashila. Yaboola mbu, “Omukhasi wanje shianyala okhumenya munzu yoburuchi yomuruchi Daudi wa Isiraeli tawe, shichila habundu hosi aha lisanduku lieindakano lienjilakhwo nahatakatifu.”

¹²Solomoni yakholela OMWAMI Nyasaye emisango khushimalilo shiemisango shia yali niyombakha imbeli weihekalu.

¹³Yakholelaho emisango emisambe okhulondana shinga olwa amalako ka Musa kaboolanga buli khunyanga tsindakatifu tsino mbu; tsisabato; Amasabo komwesi nikulabile, nende Amasabo kataru ka buli muyika mbu, lisabo liomukaate kubulamwo limela, lisabo lielichesa, nende lisabo liamatili.

¹⁴Okhulondana namalako ka papawe Daudi yali niyaraho, Solomoni yaloosia milimo echia buli nyanga, echia abesaaliisi nende Abalawi bakhoyele okhukhola, abakhonyelelanga abesaaliisi okhwimba tsinyimbo nende okhukhola emilimo chiabwe. Khandi yaloosia abalindi bomuhekalu mumikanda khulwa okhukhola emilimo chiabwe chia buli nyanga khubuli eshilibwa okhulondana nende amalako ka Daudi omundu wa Nyasaye yali niyaraho.

¹⁵Shibalekhakhwo okhulonda kata elala khumalachilisio komuruchi Daudi yali niyalaka khubesaaliisi, kata khubalawi mushindu shiosi tawe, kata aka yali niyalaka khumabishilo.

¹⁶Emilimo chia Solomoni echiobumbashi chiali nichihwele, okhurula khunyanga yomuse okwa Ihekalu kwombakhwa okhuula khukhuhwa khwobumbashi bweihekalu eyo. Kho obumbashi bwa Ihekalu eya OMWAMI Nyasaye nibuhwa burio obulayi.

¹⁷Mana omuruchi Solomoni natsia Ezionigeberi nende Elatsi amatookho akokhunyanza inzakhanyu akali mushialo shia Edomu.

¹⁸Mana omuruchi Hirani namurumila tsimeeli hasi wamalako kabakhongobe beene, abali nibamanya obulayi okhukhola emilimo mutsimeeli etsio. Batsiyila khumaatsi halala nende abakhongo bomuruchi Solomoni okhuula mushialo shia Ofiri, mana nibakalukha nibachinjile Solomoni itsahabu eyishila tsikilo ebikhumila likhumi nabirano (15,000).