Read wanga 2 AKAKHALE 9 Bible Online

2 AKAKHALE 9 - wanga bible

2 AKAKHALE 9

¹Omuruchi mukhasi wa Sheba yahulila khu ifuma yomuruchi Solomoni, yakaasia oluchendo niyetsa Yerusalemu okhumuteema namareebo amatinyu. Yetsa nomukanda omukhongo kwabalindibe nende tsingamia nitsichinjile ebindu bieshiuya eshilayi, itsahabu inyinji nende amachina kobukusi. Olwa yabukaana nende Solomoni, yamureeba amareebo koosi akali mumwoyokwe.

²Omuruchi Solomoni yamukalusia amareebo koosi aka yamureeba. Libulaho eliali litinyu khuye okhwinoosia.

³Olwa omuruchi mukhasi wa Sheba yalola obuchesi bwa Solomoni khandi nalola inzuye yoburuchi eya yali niyombakha,

⁴nalola ebiokhulia ebiarenjekhungwa imbeli womuruchi, tsinzu tsiabakhongobe bamenyangamwo, obuloosie bwabakholi bomunzuye halala nende tsingubo tsiabwe tsiabafwalanga, nalola khandi shinga olwa abatendibe befwalanga, khutsinyanga tsiamasabo, halala nende emisango emisambe chia yahananga muhekalu, yahwa amaani mana nahuka muno.

⁵Kho yamala aboolele omuruchi Solomoni ari, “Aka ndahulile khwiwe nendi mushialo shianje khubikholebio nende obuchesibwo nakatoto!

⁶Nebutswa shindakasuubila ta, okhuula lwomwene ndayetsile niikalola netsimoni tsinje. Kata kario aka ndahulila khwiwe, shikali kata inusu ya akobuchesi bubwo tawe! Iwe oli nobuchesi okhushila kata bwabandu baboolanga.

⁷Abo abakhukhalabanilanga nabeikhabi! Abakhongobo abasinjilanga imbeliwo buli lwosi nibarechelesia obuchesibwo nabeikhabi!

⁸OMWAMI Nyasayewo yetsoomibwe! Ye wumanyisiye shinga olwa achamisibungwa ninawe khulwa okhukhwemekha omuruchi, okhuruka abandube muliiralie. Khulwa okhubeela ye waheela abandube Abaisiraeli niyenyanga okhubalinda inziayo, yakhwemekha iwe okhuba omuruchi wabwe inziayo, kho mbu oralisie amalako nende obulunjishi.”

⁹Mana nahelesia omuruchi Solomoni ebihaanwa bia yali namurereere, nabio biali itsahabu eyishila tsikilo ebikhumila bine, nende ebindu bieshiuya eshilayi ebinji halala nende amachina akobukusi. Ebindu ebieshiuya eshilayi bishili okhubakhwoho ebishila ebiomuruchi mukhasi wa Sheba yareerera omuruchi Solomoni.

¹⁰Abakholi bomutsimeeli bomuruchi Hiramu nende abomuruchi Solomoni bali nibareera itsahabu okhurula Ofiri, khandi nibareera amachina kobukusi nende tsimbao tsiomusaala kwomuferesi.

¹¹Solomoni yekhoonyela tsimbao etsio okhukaasia ebininilo biomuhekalu nende ebiomunzuye yoburuchi, nende khulwa okhukaasia amatungu, nende obukhana khulwa abembibe. Ebindu shinga ebio shibiali nibialolekhakhwo mushialo shia Yuda tawe.

¹²Omuruchi Solomoni yahelesia omuruchi mukhasi wa Sheba buli shindu shia yamusaba. Ebio biali okhumeeta khubindu ebia yamuha okhushila bia yamureerera. Mana omuruchi mukhasi oyo nende abalindibe nibenyokha nibakalukha mushialo shia Sheba.

¹³Buli khumuyika omuruchi Solomoni yanyoolanga tsikilo ebikhumila amakhumi kabili nabitaru (23,000) tsieitsahabu,

¹⁴okhumeeta khubushuru bwarungungwa nabakhala obwokhukalukhasania amapesa. Khandi abaruchi ba Arabia halala nende abakafuna betsingongo tsia Abaisiraeli boosi khandi bamureereranga ifetsa nende itsahabu.

¹⁵Omuruchi Solomoni yakaasia ebikhumba ebikhongo ebikhumi bibili, buli shilala khubio shiahomelwakhwo itsahabu eyinyala okhuhela hambi tsikilo musafu.

¹⁶Khandi yakaasia ebikhumba bindi ebitiiti ebiahomelwakhwo itsahabu eyinyala okhuhela hambi tsikilo tsitaru. Ebikhumba ebio biosi yabibikha munzu ikhongo yali mumutsuru kwa Lebanoni.

¹⁷Omuruchi khandi yakaasia eshifumbi shioburuchi okhurula khumeeno keinzofu, mana shiosi nishihomwa neitsahabu inzeleleshe.

¹⁸Eshifumbi eshio shiali nebininilo bisasaba ebiokhushiulakhwo, khandi shiokhulambisiakhwo ebilenje shiolanga khushifumbi eshio, shiosi khandi shiahomwakhwo itsahabu. Eshifumbi eshio shiali namakhono khutsimbeka tsiashio tsiombi, ne eshifwanani shieitalanyi shiali khutsimbeka tsiosi tsieshifumbi eshio.

¹⁹Ebifwanani likhumi nabibili bietsitalanyi biali khubininilo ebio, eshifwanani shilala khubuli olubeka lwa buli eshininilo. Eshifumbi shioburuchi shindi shinga eshio shiali nishishili okhubakhwoho mumahanga koosi.

²⁰Ebikombe biomuruchi Solomoni biosi biakaasibwa okhurula khutsahabu, khandi ebindu biokhulilakhwo munzu ikhongo eyali mumutsuru kwa Lebanoni biakaasibwa okhurula khutsahabu inzeleleshe. Shibulaho eshiakaasibwa okhurula khufetsa, shichila ifetsa shiyabukulungwa okhuba eshindu shiobukusi munyanga tsiomuruchi Solomoni tawe.

²¹Omuruchi yali netsimeeli tsinyinji etsielemanga khunyanza etsiayilungwa nabandu Hiramu. Ne olunyuma lwa buli emiyika chitaru okhuhwa, tsimeeli etsio tsiakalukhanga nitsichinjile itsahabu, ifetsa, ameeno keinzofu, tsinguche nende amashene.

²²Omuruchi Solomoni yali omuyinda khandi omuchesi okhushilakhwo omuruchi wundi yesi owokhushialo.

²³Abaruchi bandi boosi betsanga okhumureeba amakhuwa kobuchesi, khandi nibenyanga okhuhulila obuchesi bwa Nyasaye yali niyamuhelesia.

²⁴Buli omuruchi owetsanga, yareereranga Solomoni ebihaanwa mbu, ebimili bieifetsa, ebieitsahabu, tsingubo, ebimanulwa bielihe, ebindu bieshiuya eshilayi, tsifarasi nende tsipuri. Kano katsiilililanga buli khumuyika.

²⁵Omuruchi khandi yali netsinzu ebikhumila bine (4,000) etsie tsifarasi nende amakaarike. Khandi yali nende tsifarasi ebikhumila likhumi nabibili (12,000) etsiokhwilushilakhwo. Tsindala khutsio yali niyatsibikha Yerusalemu, netsindi niyabikha mumatookho akahukhane.

²⁶Yali omuruchi wamaani okhushila abandi boosi okhurula khumwalo kwa Yufurate okhuula khushialo shia Abafilisiti nende okhuula khulwakho lwa Misiri.

²⁷Munyangatsieifetsa yali inyinji mu Yerusalemu shinga amachina, nachio emisaala chiemisiita chiali eminji shinga emisaala chiemikhuyu hasi webikulu bia Yuda.

²⁸Tsifarasi tsiomuruchi Solomoni tsiakulungwa amapesa okhurula mushialo shia Misiri nende ebialo bindi biosi.

²⁹Amakhuwa kobulamu bwa Solomoni okhurula khukhuchaaka okhuula khukhumalilikha kahandikwa mushitabu shiamakhuwa kobulamu bwomulakusi Natsani, mubulakusi bwa Ahiya wa Shilo, nende khandi mumalolelo kaomulakusi Iddo, akaboolanga khandi khukoburuchi bwomuruchi Yeroboamu wa Isiraeli.

³⁰Solomoni yaruka Isiraeli yoosi nali Yerusalemu khulwemiyika amakhumi kane.

³¹Mana nafwa ne nayabilwa mwitookho lia Daudi; mana omusianiwe mbu Rehoboamu nakalukha mushilenjeshie shinga omuruchi.