Read wanga EZIRA 3 Bible Online

EZIRA 3 - wanga bible

EZIRA 3

¹Olwa omwesi kwomusafu kwola, Abaisiraeli nibali mumatookho kabwe, abandu boosi bakhung'ana halala mu Yerusalemu.

²Mana Yeshwa, omusiani wa Yozadaki, nali nabesaaliisi bashie, nende Zerubabeli omusiani wa Shealitieli, nende abekhobe nibachaaka okhumbakha obuyia eshimalilo eshiemisango eshia OMWAMI Nyasaye wa Isiraeli. Eshimalilo shiemisango eshio shiali eshiokhumalilakhwo emisango emisambe, shinga olwa kahandikwa mumalako ka Musa, owali omundu wa Nyasaye.

³Kata kario nibali nende indenga khulwa abandu bali nibamenya mubialo ebio ninabo, bombakha eshimalilo shiemisango habundu washio ne nibamalilakhwo emisango emisambe khulwa OMWAMI Nyasaye emisango chiosi echiomumabwibwi nende echiokhubwile.

⁴Mana shinga kahandikwa, nibalia lisabo liamatili nibakhola emisango chia buli lwosi shinga olwa chiali nichikhoyile okhukholwa.

⁵Ne olunyumakhwo, bahaana emisango emisambe chia buli lwosi, emisango chia buli khumwesi omutoro nende emisango chiamasabo koosi aka OMWAMI Nyasaye yaahula, nende biosi ebiomundu achama okhuhaanila OMWAMI Nyasaye.

⁶Kata nibali nibashili okhukhupa omuse kwa Ihekalu, bachaaka okhuhaanila OMWAMI Nyasaye emisango emisambe khunyanga yambeli yomwesi kwa musafu.

⁷Abandu bahaana amapesa kokhurunga abombashi bamachina nende ababaatsi, khandi nibahaana ebiokhulia, ebiokhunywa nende amafura khu Abasidoni nende Abatiro kho mbu, bareere emisaala chiemisiita okhurula Lebanoni. Emisaala echio chiarerwa okhubirira khunyanza okhuula Yopa. Ako koosi kekholekha shinga lwomuruchi Koreshi wa Perisia yali naboolile.

⁸Mana omulimo okwo nikuchaaka mumwesi kwakhabili mumuyika kwakhabili nibamalile okhuula ewa Ihekalu yali mu Yerusalemu. Zerubabeli omusiani wa Shealitieli, nende Yeshwa omusiani wa Yozadaki nende abaana babwe abesaaliisi, Abalawi nende boosi abachelela mu Yerusalemu okhurula mubuhambe bakhoonya okhukhola omulimo okwo. Baahula Abalawi abemiyika amakhumi kabili (20) okhutsia ikulu, okhusinjilila obumbashi bweihekalu eyo.

⁹Yeshwa nabaanabe nende abekhobe, nende Kadimieli nabaanabe (abeshiliibwa shia Yuda), nende abaana ba Henadadi nende abekho babwe boosi basinjilila obumbashi obuyia bweihekalu eyo.

¹⁰Ne olwa abombashi bachaaka okhukhupa omuse kweihekalu eya OMWAMI Nyasaye, abesaaliisi nibefwalile ebifwalo biabwe betsa nibali netsinzika, nabo Abalawi aboluyia lwa Asafu nibali nende ebikhuli, babukula obwiyangu bwabwe, nibetsoomia OMWAMI Nyasaye shinga olwa Daudi omuruchi wa Isiraeli yali niyalachilisia.

¹¹Bemba nibetsooomia OMWAMI Nyasaye nibakalushila bari, “Okhuba OMWAMI Nyasaye nomulayi, obuheelibwe khu Isiraeli nobweinziayo.” Abandu boosi betsoomia OMWAMI Nyasaye nomwoyo omukhongo nende amaani koosi, okhuba omuse okweihekalu eya OMWAMI Nyasaye kwali nikuchaachilwe.

¹²Nebutswa, abanji khubesaaliisi, Abalawi nende abemilisi abebiliibwa, abali nibalolakhwo Ihekalu yambeli, bekhuula obululu olwa balola omuse kweihekalu eyo nikumbakhwa. Nebutswa abandu bandi bakhupa tsingalakala mubusaangaafu.

¹³Kho kata abandu shibanyalilwa okhwahukhasia obuyoka obwobusaangaafu nende obwokhwikhuula ta, okhuba obuyoka bwali obunji khandi bwahulilikha okhuula ehale.