Read wanga EZIRA 4 Bible Online

EZIRA 4 - wanga bible

EZIRA 4

¹Mana olwa abasuku ba Yuda nende Benjamini bahulila mbu, abahambe abali nibacheleele bachaachile okhumbakha Ihekalu eya OMWAMI Nyasaye, Nyasaye wa Isiraeli,

²betsa khu Zerubabeli nende khubemilili abebiliibwa nibababoolela bari, “Chame khumukhoonye okhumbakha, shichila fwesi khwinamilanga Nyasaye wenywe shinga olwa mukholanga, khandi khumukholelanga emisango okhurula mutsinyanga tsia Esari-hadoni omuruchi wa Asiria, owakhureera okhumenya hano.”

³Nebutswa Zerubabeli, Yeshwa nende abemilisi bebiliibwa bia Isiraeli babakalusia bari, “Shikhwenyakhwo obukhoonyi bwenywe bwokhumbakha Ihekalu eya OMWAMI Nyasaye wefwe tawe. Ifwe abeene khulachiumbakha shinga olwa Koreshi, omuruchi wa Perisia yakhulachilisia.”

⁴Mana abandu beene eshialo eshio nibafwisia Abayahudi emioyo nende okhubatofusia kho mbu, baleshe okhutsiililila nende obumbashi obwo.

⁵Khandi bahelesia abakhalabani bomuruchi wa Perisia eshiomufusi kho mbu, bafukule abombashi. Batsiililila okhukhola bario okhuula mutsinyanga tsioburuchi bwa Koreshi nende obwa Dario.

⁶Mukhuchaaka khwoburuchi bwa Ahasuwero, abasuku babandu bamenyanga mu Yuda nende mu Yerusalemu bahandika ibarwa nibabenjilililanga itookho.

⁷Khandi mutsinyanga tsioburuchi bwa Aritashasita omuruchi wa Perisia, Bishilamu, Mitsiredatsi, Tabeeli nende abeetsa babwe, bahandichila omuruchi Aritashasita ibarwa. Ibarwa eyo yahandikwa mu Oluaramu mana niyikalulwa.

⁸Khandi Rehumu omukhongo wabelihe nende Shimushayi omuhandichi wolukongo bahandika ibarwa eyilondakhwo yino khumuruchi Aritashasita,

⁹“Eyirula khumukhongo Rehumu, omuhandichi Shimushayi, abashiefwe, abayaasi, nende abemilisi, nende abandu ba Perisia boosi, abandu abarula Ereki, Babuloni nende Susa mushialo shia Elamu,

¹⁰halala nende abandu bamahanga kandi bomuruchi woluyali Osinapari yahuuyia okhurula mumataala kabwe nabayila mwitookho lia Samaria nende mutsimbeka tsili injelekha womwalo kwa Yufurate.”

¹¹Ibarwa tsana yaboola yiri, “Yule khumuruchi Aritashasita, ifwe abakhalabanibo abali mulukongo luli injelekha womwalo kwa Yufurate, khukhurumila amashiesio.

¹²Khwenya mbu iwe omuruchi omanye mbu, Abayahudi betsa yino okhurula mutsingongo tsindi etsili hasi woburuchibwo bakalukha Yerusalemu, ne bulano bombakhanga obuyia litookho lieinduli khandi limayanu elo. Bamalilisinjia okhumbakha amasiisi nende okhukaasia omuse.

¹³Bulano Omwami, khwenya omanye mbu, litookho lino niliba niliumbakhwa obuyia, mana amasiisi kalio kamalilisibwe, abandu shibalarunga obushuru ta, nayo indubiyo yoburuchi yilatong'a eshikhaya.

¹⁴Ne khulwa okhuba ifwe khuliitsanga okhurula khwiwe, shikhwakhachama okhulola iwe nofwolwa tawe. Khulweshio khukhurumiile likhuwa

¹⁵kho mbu, olachilisie barunilisie mubitabu biamakhuwa kabakuukabo. Nokhola orio, olanyoola mbu litookho lino lialinji lieinduli buli lwosi khandi lianyasinjia okhurula mutsinyanga tsia bakuukabo, litookho lino lianyasinjia abaruchi nende abemilisi bolukongo. Khandi abandu balio, buli lwosi balinji abatinyu bokhuruka. Amakhuwa kano niko akachila litookho lino nilikwisibwa likunda.

¹⁶Khulweshio khukhumanyia iwe omuruchi mbu, litookho lino niliba niliumbakhwa obuyia mana amasiisi kalio kamalilisibwe, shinonyalilwekhwo okhuruka olukongo oluli mumbo womwalo kwa Yufurate tawe.”

¹⁷Mana omuruchi nabarumila likalusio lino ari, “Yule khumukhongo Rehamu, omuhandichi Shimushayi, nende khubashiabwe abamenya mutsingongo etsili mumbo womwalo kwa Yufurate, munyoole amashiesio.

¹⁸“Ibarwa ya mwakhurumiile yakaluulwe mana niyisomwa obulayi imbeli wanje.

¹⁹Nasi ndahaanile lilako mana oburunilisi nibukholwa, ne kanyooleeshe mbu, okhurula khale, litookho lia Yerusalemu lino liakholanga obukhayi khubaruchi, khandi ni litookho lietsulamwo abakhayi nende abandu beinduli.

²⁰Khandi abaruchi bamaani balinjiho mu Yerusalemu abarukanga olukongo lwa mumbo womwalo kwa Yufurate nibasololanga abushuru, oburoosi nende emirungo chindi.

²¹Khulweshio, murusie lilako mbu, abandu abo baleshe okhumbakha obuyia litookho elo okhuula olwa isie mwene ndilihaana lilako khandi.

²²Khole murio mubwangu, shinzenya okhunyoolakhwo obusasishi bwosi bwosi muburuchi bwanje tawe.”

²³Mana olwa ibarwa okhurula khumuruchi Aritashasita yino yasoomelwa Rehumu, Shimushayi nende abashiabwe, baanguya nibatsia Yerusalemu ne nibanichilisia Abayahudi okhulekha okhumbakha litookho obuyia.

²⁴Kho emilimo khuhekalu ya Nyasaye mu Yerusalemu nichisinjisibwa okhuula khumuyika kwakhabili kwoburuchi bwa Dario, omuruchi wa Perisia.