Read wanga EZIRA 5 Bible Online

EZIRA 5 - wanga bible

EZIRA 5

¹Mana abalakusi babili, Hagai nende Zekaria omusiani wa Ido, balakula muliira elia OMWAMI Nyasaye wa Isiraeli khu Abayahudi abali mu Yuda nende mu Yerusalemu.

²Mana Zerubabeli omusiani wa Shealitieli nende Yeshwa omusiani wa Yozadaki nibachaaka okhumbakha inzu eya OMWAMI Nyasaye obuyia mu Yerusalemu, nakhoonywa nende abalakusi bandi aba OMWAMI Nyasaye.

³Ne mubwangu bwene obwo, Tetanayi, omukafuna wolukongo oluli injelekha womwalo kwa Yufurate nende Shetsari-bozeni nende abashiabwe nibetsa nibareeba abombashi bari, “Ni wiina owamuheelesiye obulekhuule okhumbakha inzu yino nende okhumalilisia obumbashi buno?”

⁴Nibabareeba khandi bari, “Ni beena abombakhanga inzu yino?”

⁵Nebutswa Nyasaye yali nali nende abemilisi ba Abayahudi abo, kho abemilisi ba Perisia nibalasinjisia obumbashi obwo ta, okhuula olwa barumila omuruchi Dario likhuwa khandi okhuula olwa bali nibanyoolile likalusiolie mubuhandiche.

⁶Ibarwa tsana ya Tatenai omwimilisi wolukongo oluli mumbo womwalo kwa Yufurate, nende Shetsari-bozenayi, nende abashiabwe, bahandichila omuruchi Dario yali yiri,

⁷“Yule khumuruchi Dario, onyoole emilembe.

⁸Omwami, khwikomba okhukhumanyia mbu khwatsiile mulukongo lwa Yuda, khu Ihekalu ya Nyasaye omukhongo, nikhunyoola mbu, yumbakhungwa obuyia namachina amakhongo, nako amasiisi kayo karebungwamwo ebitiisi ebikhongo biemisaala. Emilimo echio chikholungwa neshinani eshikhoongo khandi chitsiilililanga bwangu muno.

⁹Khwareeba abemilisi babwe mbu bakhuboolele owabaheelesia obulekhuule okhumbakha obuyia Ihekalu eyo.

¹⁰Khandi khwabareeba mbu bakhuboolele ameera kabwe kho mbu, khukhumanyie abemilisi babwe ababemilila okhukhola emilimo echio.

¹¹Nabo nibakhukalusia bari, ‘Ifwe khuli abakhalabani ba Nyasaye womwikulu nende eshialo, ne khumbakhanga obuyia inzu eya OMWAMI Nyasaye, eyali niyombakhwa khale niyimalilisibwa nende omuruchi omukhongo wa Isiraeli.

¹²Nebutswa, abakuuka befwe babuusia liruma lia Nyasaye womwikulu, naye nabahaana mumakhono ka Nebukadineza omuruchi wa Babeli. Yasasia inzu eyo nende okhuyila abandu mubuhambe Babuloni.

¹³Nebutswa mumuyika kwambeli kwoburuchi bwa Koreshi omuruchi wa Babuloni, Koreshi yalachilisia mbu, Ihekalu yumbakhwe obuyia.

¹⁴Khandi yakalusia ebimanulwa ebieitsahabu nende ebieifetsa ebiomunzu ya Nyasaye, ebia Nebukadineza yali niyarusiamwo, nabiyila munzu yabanyasaye aba Babuloni. Koreshi yabihaana khu Sheshibaza owa yemekha okhuba omwisaaliisi wolukongo lwa Yuda.

¹⁵Omuruchi yamulachilisia mbu, abibukule mana abikalusie munzu ya OMWAMI Nyasaye mu Yerusalemu, khandi mbu, yombashe inzu yomumuse kwali kwayo kwambeli.

¹⁶Kho Sheshibaza niyeetsa ne nakhupa omuse kwayo, obumbashi butsiilililanga okhuurula olwenolo okhuula bulano, nebutswa Ihekalu yishili okhumalilisibwa.’

¹⁷Bulano, omuruchi nochama lachilisia mbu, oburunilisi bukholwe mubitabu bioburuchi bwa Babuloni okhumanyilisia nikali mbu, omuruchi Koreshi yalachilisia mbu, Ihekalu yumbakhwe obuyia mu Yerusalemu. Mana okhumanyie akokhalaka khumakhuwa kano.”