Read wanga EZIRA 6 Bible Online

EZIRA 6 - wanga bible

EZIRA 6

¹Mana omuruchi Dario nalachilisia mbu, oburunilisi bukholwe mubitabu bioburuchi, ebiabikhwa Babuloni.

²Kho eshitabu eshikanye nishinyoolekha mwitookho lia Ekibatana, elili mulukongo lwa Media. Ne shiali nishiahandikwamwo shiri,

³“Mumuyika kwambeli kwomuburuchibwe, omuruchi Koreshi yalachilisia mbu, inzu eya OMWAMI Nyasaye yumbakhwe obuyia mu Yerusalemu, mana yilaba habundu habandu okhumalila emisango nende ahokhukholela emisango emisambe. Inzu eyo yilaba eyoburambi obuhela tsimita amakhumi kabili namusafu (27), khandi obuchikha tsimita amakhumi kabili namusafu (27).

⁴Amasiisi kombakhwe aketsinyaali tsitaru etsiamachina amakhongo khulunyaali lulala olwetsimbao. Nabwo oburunji bwemilimo echio chiosi bularula mwibiishilo liomuruchi.

⁵Khandi ebimanulwa bieitsahabu nende ifetsa ebiomuruchi Nebukadineza yareera mu Babuloni okhurula muhekalu Yerusalemu, bikalusibweyo bibiikhwe habundu wabio munzu eya OMWAMI Nyasaye.”

⁶Mana Dario naruma amakalusio ari, “Yule khumwimilisi Tatenai, Shetsari-bozenayi nende abemilisi bashienywe abali mumbo womwalo kwa Yufurate. Shimulatsiekhwo wa Ihekalu eyo yili tawe.

⁷Khandi muleshe emilimo chiobumbashi bwayo chitsiililile, shimulachiikalilekhwo tawe. Leshe omwimilisi wa Yuda nende abemilisi ba Abayahudi bombashe obuyia inzu ya Nyasaye habundu wayo.

⁸Okhumeetakhwo, emulachilisia mbu, mubakhoonye okhuchiumbakha obuyia. Emirungo chiobumbashi bwayo chihaanwe obulachweya ta, okhurula mwibiishilo liomuruchi, okhurula mundubi yebihaanwa biomulukongo lwa mumbo womwalo kwa Yufurate.

⁹Ne buli nyanga, obulachweya ta, muhelesie abesaaliisi ba Yerusalemu ebindu biosi ebia beenya, mbu: tsihunwa, amakondi, ebimeeme biemisango emisambe chia Nyasaye womwikulu, ingano, omunyu, idivai nende amafura.

¹⁰Kano kekholeshe kario kho mbu, bakholele Nyasaye womwikulu, emisango echikwanile khandi baasabile isie nende abaana banje tsikhabi.

¹¹Khandi emeeta okhulachilisia mbu, omundu yesi yesi ouloba okhuloonda lilako lino, omukuulo kutsomolwe okhurula khuzuye mana kubaatswe ne kurungwe muye, nayo inzuye yikholwe eshipiitsi shiamakokha.

¹²Ne Nyasaye waahula Yerusalemu okhuba habunduwe habandu okhwimwinamila arusieho omuruchi yesi yesi noho lihanga liosi liosi elikhola obukhayi khwilako lino noho okhuteema okhusasia inzu eya OMWAMI Nyasaye eyili Yerusalemu. Isie Dario ehaanile lilako lino, kho okhuula likholwe neshinani shiosi.”

¹³Kho Tetanayi, omukhongo wolukongo oluli mumbo womwalo kwa Yufurate, nende Shetsari-bozenayi nende abemilisi bashiabwe bakhola neshinani shiosi shinga lwomuruchi Dario yali nalachilisiye.

¹⁴Abemilisi ba Abayahudi batsiililila obulayi nende emilimo echiobumbashi bweihekalu, nibatsuubwa nende omulakusi Hagai nende Zekaria, omusiani wa Ido. Bamalilisia obumbashi bweihekalu shinga olwa bali nibalachilisibwe nende Nyasaye wa Isiraeli, khandi nende omuruchi Koreshi, omuruchi Dario, nende omuruchi Aritashasita aba Perisia.

¹⁵Mana Ihekalu eyo niyimalilisibwa khunyanga yakhataru yomwesi kwa Adari mumuyika kwa khasasaba, okwoburuchi bwa Dario.

¹⁶Mana Abaisiraeli, abesaaliisi, Abalawi halala nende abandu boosi abachelela okhurula mubuhambe, nibaahula nende okhusaayila Ihekalu eyo nomwikhoyo omukhongo.

¹⁷Ne khulwa okhuchiahula, abandu bahaana tsisurusi eshikhumi, amamiiku ebikhumi bibili, ebimeeme biamakondi ebikhumi bine khulwa omusango kwokhurusiaho obwonooni, nende tsimbusi tsikhole ekhumi natsibili, ikhole ndala khubuli oluyia lwa Isiraeli.

¹⁸Ne nibaraho abesaaliisi nende Abalawi mumikanda chiabwe khulwa okhukhalabana muhekalu ya OMWAMI Nyasaye mu Yerusalemu okhulondana nende amalako kahandikwa mushitabu shia Musa.

¹⁹Khunyanga yekhumi nakhane eyomwesi kwambeli, abandu abachelela okhurula mubuhambe balia lisabo lia Pasaka.

²⁰Abesaaliisi nende Abalawi bali nibesiiyile, kho boosi bali abasiiye. Mana Abalawi nibasinza ebimeeme bia Pasaka khulwa abandu boosi abali nibacheleele okhurula mubuhambe, khulwa abesaaliisi nende khulwabwe abeene.

²¹Abalia lisabo lia Pasaka elo bali Abaisiraeli boosi abali nibachelela okhurula mubuhambe nende abali nibalekha okhwinamila ebifwanani biabandu bamahanga kandi boosi, ne nibenamilanga OMWAMI Nyasaye, Nyasaye wa Isiraeli.

²²Ne khulwa tsinyanga musafu, abandu balia nomwikhoyo lisabo liemikaate chibulamwo limela. OMWAMI Nyasaye yali nabakholile okhuba nomwikhoyo khandi nakholile omuruchi wa Asiria okhuchamisibwa ninabo, mana nabakhoonya emilimo chiokhumbakha obuyia inzu ya OMWAMI Nyasaye, Nyasaye wa Isiraeli.