Read wanga EZIRA 7 Bible Online

EZIRA 7 - wanga bible

EZIRA 7

¹Olunyuma lwamakhuwa ako, mutsinyanga tsioburuchi bwa Aritashasita omuruchi wa Perisia, yaliho omusaatsa undi weliira mbu, Ezira omusiani wa Serayia, omusiani wa Azaria, omusiani wa Hilikia,

²omusiani wa Shalumu, omusiani wa Zadoki, omusiani wa Ahitubu,

³omusiani wa Amaria, omusiani wa Azaria, omusiani wa Merayotsi,

⁴omusiani wa Zerahia, omusiani wa Uzi, omusiani wa Buki,

⁵omusiani wa Abishua, omusiani wa Finehasi, omusiani wa Eleazari, omusiani wa Haroni omwisaaliisi omukhulundu.

⁶Ezira uno yarula Babuloni niyetsa Yerusalemu, ne yali omwibaali owobumanyilisi obunji mumalako ka Musa, aka OMWAMI Nyasaye, Nyasaye wa Isiraeli yahaana. Omuruchi yamuhelesia buli shindu shia yenya, shichila OMWAMI Nyasaye yali ninaye.

⁷Mumuyika kwa musafu kwomuburuchi bwa Aritashasita, Ezira yarula Babuloni niyetsa Yerusalemu, ne yetsa nende abesaaliisi, Abalawi, abembi, abalindi bebiliibwa nende abakhalabani abomuhekalu.

⁸Boola Yerusalemu khunyanga yambeli yomwesi kwa kharano mumuyika kwa musafu, okwoburuchi bwa Aritashasita.

⁹Nyasaye yabanyalila oluchendo olulayi olwa bali nibasumukha Babuloni khunyanga yambeli yomwesi kwambeli.

¹⁰Ezira yali niyarakhwo omwoyo okhusoma nende okhukhola amalako ka OMWAMI Nyasaye nende okhwechesia abandu ba Isiraeli okhuloonda amalako ako.

¹¹Yino niyo ibarwa yomuruchi Aritashasita yahelesia omwisaaliisi Ezira khandi omwibaali, omundu wobumanyilisi obunji mumalako nende amalachilisio ka OMWAMI Nyasaye yahelesia abandube ba Isiraeli.

¹²“Eyirula khumuruchi Aritashasita, yule khumwisaaliisi Ezira, omwibaali mumalako ka Nyasaye womwikulu. Onyoole amashesio.

¹³Ehaanile lilako mbu, muburuchi bwanje bwosi, Omuisiraeli yesi yesi, abe omwisaaliisi, noho Omulawi owenya okhutsia ninawe Yerusalemu omulekhuule okhutsia.

¹⁴“Isie halala nende abakofu banje beshiina musafu, khukhuruma mbu, otsie orunilisie mu Yerusalemu nende mu Yuda omanyilisie nikali mbu, abandu balindanga obulayi Amalako ka Nyasayewo, aka waheebwa.

¹⁵Bukula ebihaanwa bieitsahabu nende ifetsa ebia isie nende abeshiina shianje khuhaaniile Nyasaye wa Isiraeli, owa Ihekaluye yili mu Yerusalemu.

¹⁶Khandi obukule ifetsa nende itsahabu eyolabunjelesia okhurula mulukongo lwa Babuloni lwosi nende ebihaana bia Abaisiraeli nende abesaaliisi babwe bahaana khulwa inzu eya OMWAMI Nyasaye wabwe eyili Yerusalemu.

¹⁷Wikhoonyele amapesa ako obulayi khulwa okhukula tsisurusi, amamiiku, ebimeeme biamakondi, imele, nende idivai, mana mubihaane khushimalilo shiemisango eshili muhekalu Yerusalemu.

¹⁸Ne ifetsa nende itsahabu eyitong'a mwikhoonyele iwe nende abashio khu shiosi eshia muba nimwenya eshichamisia Nyasaye wenywe.

¹⁹Ebihaanwa biosi ebiohebwa khulwa obukhalabani bweihekalu ya Nyasayewo eyili Yerusalemu okhuula omuhaanile.

²⁰Noba niwenya eshindu shindi shiosi khulwa Ihekalu, oli omulekhuule okhushibukula okhurula mwibiishilo liomuruchi.

²¹Isie omuruchi Aritashasita, ehaana lilako khubabiishi bomuruchi boosi abali mulukongo oluli injelekha womwalo mbu, shiosi shiosi eshia Ezira, noho omwisaaliisi noho omwechesia wa amalako ka Nyasaye womwikulu yenya, mumuhelesie khandi mubwangu obulachweya tawe.

²²Mulamuhelesia okhuula khushichelo eshihela tsikilo tsieifetsa ebikhumila bitaru nende ebikhumi bine (3,400), tsikilo tsieingano ebikhumila ekhumi (10,000), tsilita ebikhumila bibili (2,000) etsia idivai, tsilita ebikhumila bibili (2,000) tsiamafura akemiseituni nende omunyu kwosi okwa yenya.

²³Buli shindu shia Nyasaye womwikulu yalaka mbu, shihaanwe khulwa Ihekaluye, okhuula shihaanwe shiosi, kho aleshe okhusinyikha khulwa isie noho khulwa abaana banje tawe.

²⁴Khandi khumumanyia mbu, shimulasololakhwo obushuru bwosi bwosi okhurula khubesaaliisi, Abalawi, abembi, abalindi noho okhurula khumundu yesi yesi oukhalabananga muhekalu yino tawe.

²⁵Nawe Ezira, wikhoonyele obuchesi bwoli ninabwo obwa Nyasayewo yakhuhelesia, mana waahule abemilisi nende abakhalachi bebiina abalemililanga abandu boosi abali injelekha womwalo kwa Yufurate okhulondana nende Amalako ka Nyasayewo. Ne omundu yesi yesi oulamanyile amalako ako ta, okhuula omwechesie.

²⁶Ne omundu yesi yesi oukhaya okhukhola amalako ka Nyasayewo nende akomuruchi, okhuula ahebwe eshinyasio shiokhwirwa, noho okhuloondwa okhurula mubashie, noho okhunuulwa emianduchie noho okhurebwa mumbohe.”

²⁷Mana Ezira naboola ari, “OMWAMI Nyasaye yetsoomibwe, Nyasaye wabakuuka befwe, owakholile omwoyo kwomuruchi okhuchama okhusiiya Ihekalu ya OMWAMI Nyasaye eyili Yerusalemu.

²⁸Khulwa obuheelibwe oburalilu, engoosiibwe imbeli womuruchi, nende abachetsiyibe, nende abakhongo bomuburuchibwe. Ndooma ikholo, shichila OMWAMI Nyasaye wanje yali ninasi, mana nekhung'asia abemilisi ba Abaisiraeli kho mbu, khutsie ninabo.”