Read wanga EZIRA 8 Bible Online

EZIRA 8 - wanga bible

EZIRA 8

¹Abalondakhwo bano nibo abemilisi babebiliibwa biabandu abachelela mu Yerusalemu ninasi mutsinyanga tsioburuchi bwomuruchi Aritashasita:

²Mubolwibulo lwa Finehasi, yali Gerishomu, mubolwibulo lwa Itsamari, yali Danieli. Mubolwibulo lwa Daudi yali Hatushi,

³owomulwibulo lwa Shekania. Mubolwibulo lwa Paroshi, yali Zakaria, owali halala nende abasaatsa eshikhumi shilala nende amakhumi karano (150) abeshiliibwashie.

⁴Mubolwibulo lwa Pahatsi-Moabu, yali Eliehoenayi omusiani wa Zerahia, halala ninaye bali abasaatsa ebikhumi bibili (200).

⁵Mubolwibulo lwa Zatu, yali Shekania, owa Yahazieli, halala ninaye bali abasaatsa ebikhumi bitaru (300).

⁶Mubolwibulo lwa Adini, yali Ebedi, omusiani wa Yonatsani, halala ninaye bali abasaatsa amakhumi karano (50).

⁷Mubolwibulo lwa Elamu, yali Yeshayia, omusiani wa Atsalia, halala ninaye bali abasaatsa amakhumi musaafu (70).

⁸Mubolwibulo lwa Shefatia, yali Zebadia omusiani wa Mikaeli, halala ninaye bali abasaatsa amakhumi munane (80).

⁹Mubolwibulo lwa Yoabu, yali Obadia omusiani wa Yahieli, halala ninaye bali abasaatsa ebikhumi bibili nende ekhumi namunane (218).

¹⁰Mubolwibulo lwa Bani, yali Shelomitsi, omusiani wa Yosifia, ne halala ninaye bali abasaatsa eshikhumi nende amakhumi kasasaba (160).

¹¹Mubolwibulo lwa Bebai, yali Zakaria, omusiani wa Bebayi, halala ninaye bali abasaatsa amakhumi kabili nende munaane (28).

¹²Mubolwibulo lwa Azigadi, yali Yohanani omusiani wa Hakatani, halala ninaye bali abasaatsa eshikhumi nende ekhumi (110).

¹³Mubolwibulo lwa Adonikamu, abachelela olunyuma, ameera kabwe kali, Elifeleti, Yeueli, nende Shemayia, halala ninabo bali abasaatsa amakhumi kasasaba (60).

¹⁴Mubolwibulo lwa Bigwayi, yali Utsayi nende Zakuri, halala ninabo bali abasaatsa amakhumi musaafu (70).

¹⁵Ndakhung'asia abandu boosi halala hamwalo kutsitsanga mwitookho lia Ahawa, ne nikhukhupaho ikambi khulwa tsinyanga tsitaru. Ndakhabilisia Abalawi mumukanda okwo, nebutswa ndanyoolamwo butswa abesaaliisi bonyene.

¹⁶Mana nerumana mbu, balaanje abemilisi shienda bano mbu: Eleazari, Arieli, Shemayia, Elinatsani, Yaribu, Elinatsani, Natsani, Zekaria, nende Meshulamu. Khandi balanga Yoyaribu nende Elinatsani abali abandu bobuchesi.

¹⁷Mana nebaruma khu Ido, omwimilisi wabandu abolukongo lwa Kasifia. Nebaboolela mbu, bamulachilisie Ido halala nende abakhalabani bashie abomuhekalu bakhurumile abandu bokhukhalabana muhekalu ya Nyasaye.

¹⁸Ne khulwa obukoosia bwa Nyasaye, obwali khwifwe, Ido nende abashie bakhurumila Sherebia, omundu owamanya emilimo obulayi, owomuluyia lwa Lawi, oweshiliibwa shia Mali, halala nende abasianibe nende abasiani babwe, boosi halala bali abandu ekhumi nende munane.

¹⁹Khandi bakhurumila Hashabia nende Yeshaya oweshiliibwa shia Merari, halala nende abasiani babwe nabakhaana babwe, boosi halala bali abandu amakhumi kabili.

²⁰Okhumeetakhwo, bakhurumila abasaatsa ebikhumi bibili nende amakhumi kabili (220), omukanda kwabakhalabani bomuhekalu, aba Daudi nende abakhongobe baahula khulwa okhukhoonyelela Abalawi. Ameera kabwe boosi kahandikwa.

²¹Mana nikhuli khumwalo kwa Ahawa okwo, ndahaana lilako mbu, buli mundu ahonje inzala nende okhwituutuyia imbeli ewa OMWAMI Nyasaye wefwe, nikhumusaaya mbu, akhwimilile khandi akhulinde muluchendo, ifwe nende abaana befwe nende emiandu chiefwe.

²²Okhuba ndafwimbwa omurwe okhureeba omuruchi mbu, okhuhelesie abasikaari halala nende abokhutsifarasi abokhukhulinda okhurula khubasuku khuluchendo lwefwe, shichila khwali nikhumalile okhuboolela omuruchi mbu, obukoosia bwa Nyasaye wefwe bubetsanga khubuli mundu oumukhaabanga, nebutswa oburumabwe nende eshinyasioshie bibetsanga khu buli mundu oumulekhanga.

²³Kho khweyima eshiokhulia nikhusaaya Nyasaye mbu, akhulinde, naye nahulila amasaayo kefwe.

²⁴Mana nindaahula abemilisi abali abesaaliisi ekhumi nababili. Mubo bali Sherebia, Hashabia nende abasiani babwe ekhumi.

²⁵Mana nenjela nende okhubahelesia ifetsa, itsahabu, nende ebikaye biomuruchi, abachetsiyibe, abakhongobe, nende Abaisiraeli bali nibahaanile khulwa emilimo chiomuhekalu.

²⁶Ebindu bia ndachela nimbahelesia biali, ifetsa tsitaani amakhumi kabili nende tsibili (22) nende ebikaye eshikhumi shilala (100) ebieifetsa ebiobusiro buhela tsikilo amakhumi musafu (70), itsahabu tsikilo ebikhumila bitaru nende ebikhumi bine (3,400).

²⁷Ebikaye bieitsahabu amakhumi kabili (20), ebiobusiro buhela tsikilo munane (8), nende ebikaye bibili ebiomukasa omweleleshe kwobukusi shinga itsahabu.

²⁸Olunyuma nemboolela abeemilisi babesaaliisi abo endi, “Inywe muli abatakatifu aba OMWAMI Nyasaye, ebikaye bino biosi nebitakatifu. Nayo ifetsa nende itsahabu nebihaanwa biabandu bahaanile mukhuchama khu OMWAMI Nyasaye, Nyasaye wabakuuka benywe.

²⁹Mubilinde obulayi okhuula olwa muula muhekalu. Ebweneyo, mubichele imbeli wabakhongo babesaaliisi nende Abalawi, nimuli mubisika biabwe ebili muhekalu Yerusalemu.”

³⁰Kho abesaaliisi nende Abalawi abo nibabukula ifetsa, itsahabu nende ebimanulwa ebio khulwa okhubiyila muhekalu Yerusalemu.

³¹Khunyanga yekhumi nakhabili (12), eyomumwesi kwambeli, khwarula khumwalo kwa Ahawa nikhutsia Yerusalemu. Nyasaye wefwe yali halala ninefwe nakhuterera okhurula khubasuku bokhunjila.

³²Olwa khwola Yerusalemu, khwahuluukha khulwa tsinyanga tsitaru.

³³Ne khunyanga yakhane, khwatsia muhekalu nikhuchela ifetsa, itsahabu nende ebikaye ebio, mana nikhubihaana khumwisaaliisi Meremotsi, omusiani wa Uria. Yali halala nende Eliazari omusiani wa Finehasi, nende Yozabadi omusiani wa Yeshwa, nende Noadia omusiani wa Binuyi, Abalawi.

³⁴Buli shindu shiabalwa nishichelwa khandi nishihandikwa.

³⁵Boosi abali nibacheleele okhurula mubuhambe bareera ebihaanwa okhuba emisango emisambe khu Nyasaye wa Isiraeli. Bahaana tsisurusi ekhumi natsibili khulwa Isiraeli yoosi, amakondi amamiiku amakhumi shienda nende kasasaba (96), nende ebimeeme biamakondi amakhumi musafu nende musafu (77). Khandi bahaana tsimbusi ekhumi natsibili khulwa okhwisiiya abeene okhurula khubwonooni. Emiruko chino chiosi chiahaanwa shinga omusango omusambe khu OMWAMI Nyasaye.

³⁶Khandi bahaana ibarwa yomuruchi yali nahandichiile abemilisi nende abakhongo bolukongo oluli injelekha womwalo kwa Yufurate. Abemilisi nende abakhongo abo bakhoonyelela Abaisiraeli khandi nibahaana obukhoonyi khulwa Ihekalu ya Nyasaye.