Read wanga EZIRA 9 Bible Online

EZIRA 9 - wanga bible

EZIRA 9

¹Olunyuma lwamakhuwa ako koosi, abemilisi ba Abaisiraeli betsa nibamboolela bari, “Abaisiraeli, abesaaliisi, nende Abalawi shibeyahuule okhurula khubandu bomumahanga ka bamenyilemwo, aka Amoni, Moabu, Misiri, Kanani, Hiti, Perizi, Yebu nende Amori tawe. Bakholanga amakhuwa keshisinyo shinga olwa abandu bomumahanga ako bakholanga.

²Abayahudi bateshinjia abakhasi bomumahanga ako, khulweshio abandu boluyia olutakatifu lwa Nyasaye betsokaasiye nende abandu bomumahanga kandi. Abemilisi nende abaruchi nibo abambeli mushifwabi eshio.”

³Olwa ndahulila amakhuwa ako, ndarandula tsingubo tsianje, nekhuunyula liswi lianje nende tsindefu tsianje, mana nindikhala hasi nimbeleele muno.

⁴Abandu boosi batiilwa noburi olwa bahulila aka Nyasaye wa Isiraeli yali niyaboola okhulondana nende eshifwabi shiabandu abali nibacheleele okhurula mubuhambe. Nibachaaka okhukhung'ana ewa ndali, nasi nenziiliila okhwikhala hasi mushibeela okhuula khubwile, khubise biokhukhola omusango kwokhubwile.

⁵Olwa ebise biokhukhola omusango kwokhubwile biola, ndasinjila okhurula ewa ndali mushibeela, neshiili mutsingubo tsianje etsiali nitsiranduushe etsio, ndasikama hasi nesaaya nenjiinguulile amakhono kanje imbeli ewa OMWAMI Nyasaye, Nyasaye wanje.

⁶Ndasaaya nemboola endi, “Iwe OMWAMI Nyasaye, nakeshifwimbwa murwe isie okhuchiinguula omurwe kwanje imbeliwo. Obwonooni bwefwe bwimeetile, khandi bwinjiihe okhushila ifwe beene, buulile mwikulu.

⁷Okhurula mutsinyanga tsiabakuuka befwe, ifwe abandubo khwakholile obwonooni obunji. Ne khulwa obwonooni bwefwe, ifwe abeene, abaruchi befwe, nende abesaaliisi befwe, khwahaanwa mumakhono kabaruchi bamahanga kandi, nikhwirwa, nikhunuulwa emiandu chiefwe, khandi nikhuyilwa mubuhambe. Mana okhuula olwaleelo khushili neshifwimbwa murwe.

⁸Ne bulano, OMWAMI Nyasaye, Nyasaye wefwe, khulwa eshisekhwo wakhuhonokosiye mana nochila abandi mwifwe nikhuhonokokha okhurula mumbohe, nikhumenya mumulembe habundu hatakatifu hano. Mushilenje shiobuhambe, wakhuhelesiye omulembe nende obulamu obuyia.

⁹Khwali abahambe, nebutswa shiwakhulekha mubuhambe tawe. Wakhola abaruchi ba Perisia okhukhulolela eshisa nende okhukhulekhuula mbu, khutsiililile okhumenya nende okhumbakha obuyia Ihekaluyo, eyali niyasasibwa khandi mbu, khunyoole obulindwi obulayi mu Yuda nende Yerusalemu.

¹⁰“Kho OMWAMI Nyasaye, nishiina eshia khwakhaboola olunyuma lwamakhuwa kano? Okhuba khwakholile obukhayi khumalako koko,

¹¹aka wakhuhelesia okhubirila mubakhalabanibo abalakusi. Bakhuboolela mbu, eshialo shia khwali nikhutsitsanga okhumenyamwo neshimayanu, okhuba neshialo shietsulamwo eshifwabi nende obumayanu.

¹²Khulweshio bakhukaya okhuteeshania ninabo. Khandi mbu khuleshe okhukhaaba omulembe kata emiandu chiabwe, kho mbu, khube abamaani khandi kho mbu khulie ebiamo ebilayi bieshialo eshio, khandi khushileshele abaana befwe inziayo.

¹³Nebutswa, kata mumakhuwa kekholeeshe koosi olwa khwanyoolile eshinyasio khulwa obwonooni nende obuyiiri bwefwe, khumanyile mbu, iwe, Nyasaye wefwe watitiyiyie eshinyasio shia khwali nikhukwanile okhunyoola, mana nokhulekha okhuba mwoyo khandi.

¹⁴Mana toto khandi khulafunaka amalako koko khulwa okhuteeshania nende abandu abamayanu bano? Nikhuba nikhukhola khurio, olasinyikha mana okhumulule, shialabaho oulatong'aho naliho mwoyo noho okhuhonokokha tawe.

¹⁵MWAMI Nyasaye wa Isiraeli, oli omulunjishi, kho khwahonokooshe nikhutong'aho nikhuli mwoyo. Khufuchilila mbu, khuli abonooni imbeliwo, abulaho ouli omulunjishi oukhoyile okhwitsa imbeliwo tawe.”