Read wanga NEHEMIA 11 Bible Online

NEHEMIA 11 - wanga bible

NEHEMIA 11

¹Abemilisi ba abandu bamenyanga mu Yerusalemu, nabo abandu bandi abatong'a bakhupilwa ikha, khulwa okhwahula abeinzu ndala okhurula mubuli abetsinzu ekhumi, khulwa okhutsia okhumenya mwitookho litakatifu lia Yerusalemu. Nabo abandi boosi nibamenya mumatookho nende mumataala kandi.

²Abandu betsoomia omundu yesi yesi oweyinia butswa okhumenya mu Yerusalemu.

³Ne mumataala kandi nende mumatookho, Abaisiraeli, Abesaaliisi, Abalawi, abakhalabani bomuhekalu, nende abomulwibulo lwabakhalabani ba Solomoni bamenya mumikunda chiabwe nende mumataala kabwe abeene. Akalondakhwo kano niko ameera kabemilisi bolukongo lwa Yuda, abamenyanga mu Yerusalemu.

⁴Abomuluyia lwa Yuda bali: Atsaya omusiani wa Uzia, owali omusiani wa Zakari, omusiani wa Amaria, owali omusiani wa Shefatia, owali omusiani wa Mehalaleli, owomulwibulo lwa Perezi.

⁵Naye Maaseya, omusiani wa Baruki, owali omusiani wa Kolihoze, owali omusiani wa Hazayia, omusiani wa Adaya, omusiani wa Yogaribu omusiani wa Zekaria owomulwibulo lwa Shela.

⁶Abomulwibulo lwa Perezi, abamenyanga mu Yerusalemu boosi bali abasaatsa beitswoni ebikhumi bine nende amakhumi kasasaba namunane (468).

⁷Aboluyia lwa Benjamini bali: Salu, omusiani wa Meshulamu, owali omusiani wa Yoeli, owali omusiani wa Pedayia, owali omusiani wa Kolaya owali omusiani wa Maaseya, owali omusiani wa Itsieli, owali omusiani wa Yeshaya.

⁸Gabayi nende Salayi bali abekho ba Salu bahambi. Aboluyia lwa Benjamini boosi, abamenyanga mu Yerusalemu bali abandu ebikhumi shienda, amakhumi kabili nende munane (928).

⁹Yoeli omusiani wa Zikiri niye owali omwimilisi wabwe, naye Yuda omusiani wa Hosenwa yali owakhabili mubukhongo mwitookho elo.

¹⁰Aboluyia lwabesaaliisi bali: Yedaya omusiani wa Yoyaribu, Yakini,

¹¹Seraya omusiani wa Hilikia, omusiani wa Meshulamu, omusiani wa Zadoki, omusiani wa Merayotsi omusiani wa Ahitubu, owali Omwisaaliisi Omukhongo.

¹²Abeshiliibwa shiabesaaliisi boosi abakhalabananga Muhekalu bali ebikhumi munane nende amakhumi kabili nababili (822). Oundi yali Adaya, omusiani wa Yerohamu omwitsukhulu wa Pelalia. Abakuukabe bandi bali Zekaria, Pashuhuri nende Malikiya.

¹³Abandu ebikhumi bibili nende amakhumi kane nababili (242) abeshiliibwa shino bali abemilisi abetsinzu. Amashisayi, omusiani wa Azareli, omusiani wa Ahizayi. Abakuukabe bali Meshilemotsi, nende Imeri.

¹⁴Balimwo abandu eshikhumi shilala amakhumi kabili namunane abali bomushiliibwa shino, abali abalwani abalulu muno. Omwimilisi wabwe yali Zabudieli, omusiani wa Hagedolimu.

¹⁵Nabo Abalawi abali nibamenya mu Yerusalemu bali: Shemayia omusiani wa Hashubu, omwitsukhulu wa Azirikamu. Abakuukabe bali Hashabia, nende Buni.

¹⁶Shabetsayi nende Yozabadi bali abemilisi babili ba Abalawi, abali abasinjilili bemilimo chielwanyi wa Ihekalu.

¹⁷Matania omusiani wa Mika, omwitsukhulu wa Zabudi omusiani wa Asafu, yemilila abembi bomuhekalu nibemba amasaayo kokhukhupa orio. Bakibukia niye owali omukhoonyeleli wa Matania. Abuda omusiani wa Shamua, omusiani wa Galali, omusiani wa Yedutsuni.

¹⁸Boosi bali Abalawi ebikhumi bibili nende amakhumi munane nabane (284), abali nibamenya mwitookho litakatifu lia Yerusalemu.

¹⁹Abalindi ba Ihekalu bali: Akubu, Talimoni nende abekho babwe, boosi bali abandu eshikhumi shilala nende amakhumi musafu nababili (172).

²⁰Abandu ba Isiraeli bandi, abesaaliisi nende Abalawi abatong'a nibamenya mumikunda chiabwe abeene mumatookho kandi nende amataala kandi ka Yuda.

²¹Abakhalabani bomuhekalu bamenya mushitonye shia Yerusalemu eshilangwa mbu, Ofeli, ne bakholanga emilimo chiabwe hasi wobwimilisi bwa Ziha nende Gishipa.

²²Omwimilisi omukhongo wa Abalawi abamenya mu Yerusalemu yali Uzi, omusiani wa Bani. Abakuukabe bali Hashabia, Matania, nende Mika. Ne Uzi yali mulala khubolwibulo lwa Asafu, abali abasinjilili bobwimbi bwomulaamo kwomuhekalu.

²³Kaliho amalako okhurula khumuruchi, akenoosinjia shinga olwa abeshiliibwa bakhoyile okhwimilila tsinyimbo Muhekalu buli lwosi.

²⁴Petsahia, omusiani wa Meshezabeli, oweshiliibwa shia Zera, owomuluyia lwa Yuda, niye owali omukobosheli khumuruchi mumakhuwa kabandu koosi.

²⁵Abandu abanji bamenyanga mumataala akali ahambi nemikunda chiabwe. Aboluyia lwa Yuda bamenya mu Kiriatsi Ariba, Diboni, nende Yekabuzeeli nende mubipaari ebili hambi nende amatookho ako.

²⁶Abandi bali nibamenya mumatookho ka Yeshwa, Molada, Betsipeleti,

²⁷mu Hazarishwali nende mu Beerisheba nende mubipaari bialibotokhana.

²⁸Bamenya mumatookho ka Zikilagi, akali Mekona nende ebipaari biako,

²⁹mu Enirimoni, mu Zora, mu Yorimutsi,

³⁰mu Zanoa, mu Adulamu nende ebipaari bili hambi namatookho ako. Bamenya mu Lakishi nende khumikunda echili hambi yaho, nende mu Azeka nende ebipaaari bialio. Kano kamanyia mbu, abandu ba Yuda bamenya mushialo hakari wa Beerisheba elubeka lwemulambo nende Libanda lia Beni Hinomu elubeka lwemasaba.

³¹Abandu boluyia lwa Benjamini bamenya mumatookho ka Geba, Mikimashi, Ayi, Betseli nende ebipaari biali hambi yaho bino:

³²Anatsotsi, Nobu, Anania,

³³Hazori, Rama, Gitayimu,

³⁴Hadidi, Zeboimu, Nebalati,

³⁵Loti nende Ono libanda liabafundi.

³⁶Omukanda kundi kwa Abalawi abali nibamenyile mushialo shia Yuda, balachilisibwa okhumenya nende abandu boluyia lwa Benjamini.