Read wanga NEHEMIA 12 Bible Online

NEHEMIA 12 - wanga bible

NEHEMIA 12

¹Bano nibo abesaaliisi nende Abalawi abachelela okhurula mubuhambe nibali nende Zerubabeli omusiani wa Shealitieli nende Yeshwa Omwisaaliisi Omukhulundu. Abesaaliisi abo bali Seraya, Yeremia, Ezira

²Amaria, Maluki, Hatushi,

³Shekania, Rehumu Meremotsi,

⁴Ido, Ginetsoni, Abiya

⁵Miyamini, Moadia, Biliga

⁶Shemayia, Yoyaribu, Yedaya,

⁷Salu, Amoki, Hilikia nende Yedaya. Abo boosi bali abemilisi mubesaaliisi bashiabwe boosi mutsinyanga tsia Yeshwa.

⁸Abalawi bali Yeshwa, Bunuyi, Kadimieli, Sherebia, Yuda, nende Matahia halala nende abashie basinjilila obwimbi bwetsinyimbo tsiokhukhupa orio.

⁹Abalondakhwo bano bembanga nibongulanila nende Abalawi: Bakibukia, Uni nende Abalawi bashiabwe.

¹⁰Yeshwa yebula Yoyakimu, naye Yoyakimu niyebula Eliashibu. Eliashibu yebula Yoyada,

¹¹naye Yoyada niyebula Yonatsani. Yonatsani yebula Yadua.

¹²Mutsinyanga tsia Yoyakimu yali Omwisaaliisi Omukhulundu, abesaaliisi bano nibo abali abemilisi ba abebiliibwa babwe: Meraya yali omwimilisi wa abeshiliibwa shia Seraya. Hanania yali omwimilisi wa abeshiliibwa shia Yeremia.

¹³Meshulemu yali omwimilisi wa abeshiliibwa shia Ezira. Yehonani yali omimilisi wa abeshiliibwa shia Amaria.

¹⁴Yonatsani yali omwimilisi wa abeshiliibwa shia Maluki. Naye Yosefu yali omwimilisi wa abeshiliibwa shia Shekania.

¹⁵Adina yali omwimilisi wa abeshiliibwa shia Harimu. Helikayi yali omwimilisi wa abeshiliibwa shia Meremotsi.

¹⁶Zekaria yali omwimilisi wa abeshiliibwa shia Ido. Meshulamu yali omwimilisi wa abeshiliibwa shia Ginetsoni.

¹⁷Zikiri yali omwimilisi wa abeshiliibwa shia Abiya. Pilitayi yali omwimilisi wa abebiliibwa bia Miniamini nende Moadia.

¹⁸Shamua yali omwimilisi wa abeshiliibwa shia Biliga. Yehonatsani yali omwimilisi wa abeshiliibwa shia Shemayia.

¹⁹Matenayi yali omwimilisi wa abeshiliibwa shia Yoyaribu. Uzi yali omwimilisi wa abeshiliibwa shia Yedaya.

²⁰Kalayi yali omwimilisi wa abeshiliibwa shia Salu. Eberi yali omwimilisi wa abeshiliibwa shia Amoki.

²¹Hashabia yali omwimilsi wa abeshiliibwa shia Hilikia. Naye Nathaneli yali omwimilisi wa abeshiliibwa shia Yedaya.

²²Ameera ka abemilisi abetsinzu tsia Abalawi nende etsia abesaaliisi mutsinyanga tsia Abesaaliisi Abakhongo bano kahandikwa nikabiikhwa. Akene ngakano mbu: Eliashibu, Yonatsani nende Yadua. Amahandiko kano kamalilisibwa okhuhandikwa olwa Dariasi yali nali omuruchi wa Perisia.

²³Ameera kabemilisi ba abetsinzu tsia Abalawi, okhuula mutsinyanga tsia Yonatsani omwitsukhulu wa Eliashibu, kahandikwa mushitabu shiamakhuwa komutsinyanga.

²⁴Abalawi barebwa mumikanda nibali hasi wobwimilisi bwa Hashabia, Sherebia, Yeshwa, Binuyi nende Kadimieli. Abandu emikanda chibili khu buli eshise betsoomia Nyasaye nibongulanila nende okhukhupila Nyasaye orio nibalonda amebaalo kahaanwa nende omuruchi Daudi omundu wa Nyasaye.

²⁵Abalondakhwo bano nibo abali abalindi ba Ihekalu, abaheebwa omulimo kwobulindi bwetsinzu tsiamabiikho, akali habiliibwa bieihekalu: Matania, Bakabukia, Obadia, Meshulamu, Talimoni nende Akubu.

²⁶Abandu abo bakhalabananga mutsinyanga tsia Yoyakimu, omusiani wa Yeshwa, owali omusiani wa Yozadaki, nende mutsinyanga tsia omukafuna Nehemia nende etsia Ezira, owali omwisaaliisi khandi omuhandichi wamalako.

²⁷Olwa lisiisi lielitookho lia Yerusalemu liaahulwa, Abalawi bareerwa okhurula buli habundu hosi mu Yuda, ewa bali nibamenya kho mbu, basanjilane halala mumwikhoyo kwelisabo elo nende okhwimba tsinyimbo tsiokhukhupa orio nende tsinyimbo tsiokhwimba nebikhuli, amatungu nende amachieng'i.

²⁸Abembi Abalawi bakhung'asibwa okhurula wa bali nibamenya, mutsingongo tsibotokhaane litookho lia Yerusalemu nende mumatookho ka Netofa,

²⁹Betsi Giligali, Geba nende Azimawetsi.

³⁰Olwa abesaaliisi nende Abalawi bali nibamalile okhwisiiya abeene, basiiya khandi abandu, ebiliibwa nende lisiisi.

³¹Mana neniinia abemilisi ba Yuda khwisiisi ikulu, ne nebara okhwimilila emikanda emikhongo chibili chiokhuchenda nibemba nibakhupila Nyasaye orio, nibabotokhana litookho. Omukanda kwambeli kwachenda nikutsia omukhono omusaatsa khwisiisi nikuhenjile khushiliibwa shilangwa mbu Eshiliibwa shia Amasingo.

³²Hoshaya nende inusu yabemilisi ba Yuda babalondakhwo inyuma.

³³Abalondakhwo bali abesaaliisi Azaria, Ezira, Meshulamu,

³⁴Yada, Benjamini, Shemayia nende Yeremia,

³⁵halala nende abesaaliisi nibakhupanga tsitarumbeta. Abalondakhwo bali Zekaria omusiani wa Yonatsani, oweshiliibwa shia Asafu nende

³⁶abeshiliibwa shiabwe bano: Shemayia, Azareli, Milalayi Gilalayi, Maayi Natsaneli, Yuda nende Hanani. Boosi bakhupanga obukhana obufwanana nende obwomuruchi Daudi omundu wa Nyasaye. Bemililungwa nende Ezira omwechesia wa Amalako.

³⁷Olwa boola Hashiliibwa shilangwa mbu Eshiliibwa shia Isebele, baniinila khumaniinilo nibatsia Mwitookho lia Daudi ne nibatsia nibabira inzuye yoburuchi nibasinjilila Hashiliibwa shilangwa mbu Eshiliibwa shia Amaatsi, ahambi nende lisiisi liebukwe welitookho.

³⁸Omukanda kwakhabili kwabembi kwachenda khwisiisi ikulu nikutsia olubeka lwomukhono mukhasi, nasi nende inusu ya abemilisi ba Yuda nikhubalondakhwo. Khwachenda nikhubira omunara okulangwa mbu Omunara kwa Amaika okhuula khwisiisi Libambalifu.

³⁹Khandi nikhutsia okhuula khu Eshiliibwa shia Efuraimu, Eshiliibwa shia Yeshana, Eshiliibwa shia Tsinyeni, Omunara kwa Hananeli, nende Omunara kwa Eshikhumi (100), okhuula khushiliibwa shilangwa mbu Eshiliibwa shia Amakondi. Khwasinjilila khu Eshiliibwa shia Abalindi beihekalu.

⁴⁰Emikanda chibili chiabembi abakhupanga orio abo, batsia mubwikhalo bwabwe munzu ya Nyasaye. Siesi halala nende inusu ya abemilisi,

⁴¹khwali halala nende abesaaliisi balondakhwo bano nibakhupanga tsitarumbeta tsiabwe: Eliakimu, Maaseya, Miniamu, Mikaya, Elioenayi, Zekaria nende Hanania,

⁴²nibalondwakhwo nende Maaseya, Shemayia, Eliazari, Uzi, Yehohanani, Malikiya, Elamu nende Ezeri. Abembi abo bemba obutinyu nomwoyo omukhongo nibemiliilwe nende Yezirahia.

⁴³Khunyanga eyo, abandu bahaana emisango eminji nibekhoya, shichila Nyasaye yali nabasaangaasiye muno. Abakhasi halala nende abaana boosi bekhoya muno. Oluyoka lwomwikhoyo kwali mu Yerusalemu lwahulilikha okhuula ehale muno.

⁴⁴Mubise ebio abandu baahulwa okhusinjilila tsinzu tsiebiachi, ewa ebihaanwa nende ebiamo biambeli nende eshitonye shielikhumi, ebiahaanungwa buli omuyika biabiikhungwa. Abandu bareeranga ebihaanwa mutsinzu tsiebiachi okhurula mumikunda echili hambi namatookho khulwa abesaaliisi nende Abalawi shinga olwa Lilako lilachilisia. Abandu ba Yuda bali nibachamisibwa nende obukhalabani bwabesaaliisi nende Abalawi,

⁴⁵shichila bakholanga emilukha chiokhusiiya abandu nende echindi echia Nyasaye yalachilisia. Abembi nende abalindi ba Ihekalu boosi khandi bakholanga emilimo chiabwe okhulondana nende amalako komuruchi Daudi nende omusianiwe Solomoni.

⁴⁶Kata kario okhurula khale, mutsinyanga tsiomuruchi Daudi nende omwimbi Asafu, baliho abemilili babembi, abembanga tsinyimbo tsiokhwitsoomia nende okhukhupila Nyasaye orio.

⁴⁷Mutsinyanga tsia Zerubabeli nende isie Nehemia khwali nikhuli abasinjilili, abandu ba Isiraeli boosi bahaananga ebihaanwa biabwe bia buli lwosi khulwa okhukhoonya abembi nende abalindi ba muhekalu. Abandu bahaana emisango emitakatifu khulwa Abalawi, nabo Abalawi bahelesia abesaaliisi eshichelo shialachilisibwa.