Read wanga NEHEMIA 13 Bible Online

NEHEMIA 13 - wanga bible

NEHEMIA 13

¹Khunyanga eyo, basooma eshitabu shia Amalako ka Musa nomwoyo omukhongo, basooma tsinyaali mumahandiko ako etsiboolanga mbu, omundu yesi yesi Omuamoni noho Omumoabu, shialafuchililwakhwo okhumenya halala nende Abaisiraeli, abandu ba Nyasaye tawe.

²Kano kali kario shichila abandu ba Amoni nende aba Moabu baloba okhuhelesia Abaisiraeli ebiokhulia nende amaatsi, olwa bali khuluchendo nibarula Misiri. Nebutswa barunga Balaamu amapesa okhulaama eshilaamo shiobubi khu Abaisiraeli, nebutswa naye Nyasaye wefwe nakalukhasia eshilaamo eshio okhuba tsikhabi.

³Olwa abandu ba Isiraeli bahulila lilako elo nilisoomwa, balonda abandu betsimbia tsindi tsiosi okhurula mumukanda kwabwe.

⁴Omwisaaliisi Eliashibu, owali niyaahulwa okhusinjilila tsinzu tsiamabiikho ako muhekalu, yali omwitsa wa Tobia khulwa oluhoono olurambi.

⁵Yafuchilila Tobia okhwikhoonyela eshisika eshikhoongo shiamabiikho, eshiali nishiakaasibwa khulwa okhubiikhanga ebihaanwa bieimele, obubane, ebindu biekhoonyelungwa muhekalu, ebihaanwa biabesaaliisi nende eshitonye shielikhumi shieimele, idivai nende amafura kemiseituni, ebiahaanungwa khu Abalawi, abembi nende abalindi beihekalu.

⁶Ne olwa ako koosi kali nikekholanga, isie Nehemia shindali nendi mu Yerusalemu ta, shichila mumuyika kwamakhumi kataru nachibili, olwa omuruchi Aritashasita yali omuruchi wa Babuloni, ndali nengaluushe khuye okhumuboolela shinga olwa amakhuwa kali. Olunyumakhwo, yafuchilila isie okhukalukha,

⁷mana nengalukha Yerusalemu. Nendiyo endio, ndesundukha okhunyoola mbu, Eliashibu yali niyafuchilila Tobia okhwikhoonyela eshisika shilala muhekalu.

⁸Ndasinyikha muno, mana nefuuba elwanyi ebindu bia Tobia ebiali mushisika eshio.

⁹Ndalachilisia mbu ebisika ebio okhuula bisiiywe, ne ebindu biokhwikhoonyelwa muhekalu, ebihaanwa ebieimele nende obubane bikalusibwe.

¹⁰Ndanyoola khandi mbu, abembi bomuhekalu nende Abalawi bandi bali nibakaluushe okhurula Yerusalemu nibatsiile okhukhola emilimo mumikunda chiabwe, shichila abandu shibahaananga ebiokhulia ebibahela tawe.

¹¹Ndahalabila abemilisi abo khulwa okhukhaywa okhuhendela Ihekalu. Mana nengalusia Abalawi nende abembi muhekalu, nibara khandi khumilimo chiabwe.

¹²Mana abandu ba Isiraeli boosi nibachaaka khandi okhureera mubisika biamabiikho ka Ihekalu eshitonye shielikhumi shieimele, idivai indoro nende amafura kemiseituni.

¹³Ndakhola omwisaaliisi Shelemia, Zadoki omwechesia wamalako nende Omulawi mbu, Pedayia okhuba abasinjilili ba ebisika biamabiikho ebio, ne nekhola Hanani omusiani wa Zakuri, owali omusiani wa Matania okhuba omulondi wabwe, shichila abandu bano balolungwa okhuba abobwatoto. Baahulwa okhuba abasinjilili bokhukabulila abashiabwe ebiokhulia.

¹⁴Iwe Nyasaye wanje, unzitsulile khulwa amalayi ka ndakhola khulwa Ihekaluyo nende khulwa okhukhukhabanila iwe.

¹⁵Mutsinyanga tsiene tsana etsio, ndalola abandu ba Yuda nibatinyanga emitsabibu khunyanga ya Isabato. Abandu bali nibaniininjia emisiko chieimele, idivai, emitsabibu nende amakhuyu khu tsisishili tsiabwe khulwa okhubiyila Yerusalemu. Ndabakaya obutinyu mbu, shibalakusiakhwo eshindu shiosi shiosi khunyanga ya Isabato tawe.

¹⁶Abandu bandi okhurula mwitookho lia Tiro, abali nibamenya Yerusalemu, bareera tsinyeni nende emiandu chindi eminji nibakusilia abandu befwe mwitookho khunyanga ya Isabato.

¹⁷Ndahalabila abemilisi ba Abayahudi nemboola endi, “Lolekhwo obwonooni bwa mukholanga! Mufwolanga inyanga ya Isabato.

¹⁸Kano niko akachila Nyasaye nahelesia abakuuka benywe eshinyasio, olwa yalekha litookho lino nilisasibwa. Nenyu bulano mutsiilililanga okhuyakula liruma lia Nyasaye khu Isiraeli, khulwa okhufwola inyanga ya Isabato.”

¹⁹Kho nendachilisia mbu, ebiliibwa bielitookho biosi okhuula biikalungwe olwa Isabato yiba niyulanga, bwangu bwene olweliuba liba niliyeelanga, ne bileshe okhwikulwa okhuula olwa Isabato yiba niyihwele. Ndaraho abakhalabani banje okhulinda khubiliibwa okhulola mbu, eshindu shiosi shiosi shishireerwakhwo mwitookho khunyanga ya Isabato tawe.

²⁰Lulala noho khabili, abobukhala bwebindu bietsimbia tsiosi beyalisinjia elwanyi welisiisi lia litookho lia Yerusalemu eshilo shieinyanga ya Chirano.

²¹Nebutswa ndabakaya nebasiomela endi, “Mbushiina nimwiyalisia elwanyi welisiisi? Nimwitsukhana mwakalushila okhukhola murio, emba ndalamutiila namaani.” Okhurula inyanga eyo shibayetsakhwo khandi khunyanga ya Isabato tawe.

²²Mana nendachilisia Abalawi okhwisiiya abeene nende okhutsia okhulinda ebiliibwa bielitookho khulwa okhulinda inyanga ya Isabato okhuba indakatifu. Iwe Nyasaye wanje, nzitsulilakhwo khulwa kano khandi mana undolele tsimbabasi okhulondana nende obuheelibwo obunji.

²³Okhumeetakhwo khandi munyanga tsienetsio, ndanyoola abandu bandi ba Yuda nibateeshia abakhasi okhurula Ashidodi, Amoni nende Moabu.

²⁴Inusu yabaana babwe baboolanga olusungo lwa Ashidodi, noho olundi khutsia abandu bandi. Ne abaana abo shibali nibamanya okhuboola oluyahudi tawe.

²⁵Ndabahalabila khandi nebalaamila eshilaamo shiobubi. Ndanywekha balala khu abasaatsa abo nende okhubakhwesa liswi liabwe. Ndabakhola okhwitsuba eshitsubo muliira lia Nyasaye mbu, shibakhateeshaniekhwo khandi nende abandu abetsinzibulo tsindi, bo abeene noho kata abaana babwe tawe.

²⁶Ndababoolela endi, “Abakhasi betsimbia tsindi nibo abachila Solomoni omuruchi wa Isiraeli niyonoona. Omuruchi undi shiyalikhwoho mumahanga kandi shinga ye tawe. Nyasaye yamuheela muno, ne namukhola okhuba omuruchi weshialo shia Isiraeli shiosi, nebutswa yesi khandi yenjila mubwonooni khulwa abakhasi betsimbia tsindi.

²⁷Kho mwenya fwesi khulonde imelo yenywe mana khulobe okhuhulila Nyasaye wefwe khulwa okhuteeshia abakhasi abetsimbia tsindi noho?”

²⁸Mulala khubasiani ba Yoyada omusiani wa Eliashibu, Omwisaaliisi Omukhongo, yateeshia omukhaana wa Sanibalati okhurula mwitookho lia Betsi Horoni. Khulweshio ndaloonda Yoyada okhurula mu Yerusalemu.

²⁹Iwe Nyasaye wanje, yitsulila abandu abo shichila bafwola omulimo kwobwisaaliisi nende Indakano ya wakhola nende abesaaliisi nende Abalawi.

³⁰Mana nesiiya abesaaliisi nende Abalawi okhurula khumakhuwa koosi aketsimbia tsindi, nebakaba emilimo, buli mulala omulimokwe.

³¹Ndalachilisia mbu tsikhwi etsiokhwikhoonyela khulwa okhusamba emisango tsireerungwe khubise ebikhoyeele nende khandi mbu, abandu bareere imele yambeli nende ebiamo biambeli okhwenga. Iwe Nyasaye wanje unzitsulile khulwa ako koosi, mana ukholele amalayi.