Read wanga NEHEMIA 2 Bible Online

NEHEMIA 2 - wanga bible

NEHEMIA 2

¹Inyanga yindi mumwesi kwa Nisani[3] mumuyika kwamakhumi kabili kwomuburuchi bwa Aritashasita, ndabukula idivai nemuhelesia mumakhonoke. Shindaali nindalolekhakhwo imbeliwe nembeleele tawe.

²Kho omuruchi niyareeba ari, “Mbushiina nobeelela muno, ne shioli omulwale ta? Endola nobeeleele muno.” Ndali noburi,

³nebutswa ndamukalusia endi, “Omuruchi, oyindile inziayo! Ndakhalekha endie okhubeelela olwa litookho liabakuuka banje bayabilwamwo liasasibwa khandi ebiliibwa bialio biosi biasasibwa nomulilo?”

⁴Mana omuruchi Aritashasita niyareeba ari, “Nishiina eshia wenya?” Ndasaaya Nyasaye womwikulu,

⁵mana nemboolela omuruchi endi, “Omwami, nemba nekhuchamisiye khandi nengoosiibwe imbeliwo, chama ukholele akekhusaba. Chama enzie mushialo shia Yuda, mwitookho liabakuuka banje bayabilwamwo eliumbashe obuyia.”

⁶Naye omuruchi niyareeba ari, (omukhayewe yali niyekhaale hambi ninaye), “Olamalayo tsinyanga tsianga, ne nochelele liina?” Mana omuruchi nafuchilila elia ndali nemureebile, nasi nemuboolela inyanga yanje eyokhuchelela.

⁷Mana nemusaba mbu, afuchilile yambelesie tsibarwa okhuyilila abakhongo bolukongo luli mumbo womwalo kwa Yufurate, nitsibareebanga mbu, bafuchilile embiriremwo nenzia mushialo shia Yuda.

⁸Ndamusaba khandi ibarwa okhuyilila Asafu, omusinjilili wemitsuru chiomuruchi, okhumulachilisia mbu, yambelesie tsimbao tsiebiliibwa bielisiisi liolukoba lwelitookho, nende etsiokhumbakha amasiisi kelitookho, nende inzu yanje yokhumenyamwo. Omuruchi yafuchilila koosi aka ndali nemusabile, shichila Nyasaye yali ninasi.

⁹Omuruchi niyambelesia balala khubakhongo belihe nende omukanda kwabelihe abachendelanga khutsifarasi okhutsia ninasi, kho nenzia mumbo womwalo kwa Yufurate. Mana nehaanayo tsibarwa etsio khubakhongo abolukongo olwo.

¹⁰Nebutswa olwa Sanibalati, okhurula mwitookho lia Betsi Horoni nende Tobia, omukhongo womulukongo lwa Amoni bahulila mbu, omundu undi yetsile okhukholela Abaisiraeli amalayi, basinyikha muno.

¹¹Ndatsia Yerusalemu, ne nimbayo khulwa tsinyanga tsitaru.

¹²Shindaboolelakhwo omundu yesi yesi aka Nyasaye yali niyambooleele okhukholela litookho lia Yerusalemu tawe. Olundi mushilo hakari, ndabuukha nembukula batiiti khubandu bali nibetsile ninasi, nenzia ninabo elwanyi. Shindabukulakhwo omuruko kwosi kwosi ta, habula isishili ya ndali nindiitsiilekwo yonyene niyo eya ndabukula.

¹³Ndarula mwitookho elo mushilo nembirila mushiliibwa shilangwa mbu Eshiliibwa shia Libanda, nenzia elubeka lwemulambo okhuula musebele eyilangwa mbu Isebele eya Okuyokha, ninzia okhuula khushiliibwa eshilangwa mbu Eshiliibwa shia Amakokha. Shinga ndachendanga, ndalambuulanga amasiisi kelitookho akakwisibwa khandi nende ebiliibwa, ebiali nibiasasibwa nomulilo.

¹⁴Ne elubeka lwebukwe lwelitookho, ndatsia emasaba okhuula khusebele nende kwitiba liomuruchi. Nebutswa isishili ya ndali nenjendelangakhwo shiyanyalilwa okhubira tawe.

¹⁵Kho nekholomokha mwibanda lia Kidironi nelambuula lisiisi. Nengalushila khunjila ya ndali nindiitsiilekhwo, eyibiriranga mushiliibwa shilangwa mbu Eshiliibwa eshia Libanda.

¹⁶Abulaho omwimilisi wa habundu yaho, owamanyakhwo ewa ndali nembeelenje noho aka ndali nekholilenje tawe. Okhuula khushise eshio, ndali neshili okhuboolelakhwo Abayahudi bashianje, abesaaliisi, abemilisi, abakhongo kata omundu yesi yesi owakhanyalile okhukhoonya omulimo kwobumbashi tawe.

¹⁷Mana nebaboolela endi, “Lolekhwo amatinyu ka khulimwo, Yerusalemu liakwisibwa khandi ebiliibwa bialio biasambwa nomulilo. Yitse, khumbashe obuyia lisiisi lia Yerusalemu, kho khuleshe okhutsiililila okhufwimbibwa omurwe.”

¹⁸Khandi ndababoolela shinga olwa OMWAMI Nyasaye yali nabelenje ninasi khandi niyakhoonyile. Nebaboolela khandi akomuruchi yali niyambooleele. Bosi nibafuchilila nibaboola bari, “Chende khuchaache okhumbakha Yerusalemu obuyia!” Mana niberechekha okhuchaaka okhumbakha.

¹⁹Olwa Sanibalati Omuhoroni nende Tobia omukhongo wa Amoni nende Omwarabu oulangwa mbu Geshemu bamanya aka khwali nikhwirechekhanga okhukhola, bakhutseshelela nibaboola bari, “Nishiina eshia mukholanga eshio? Toto mwenyanga okhukholela omuruchi induli noho?”

²⁰Nasi nebakalusia endi, “Nyasaye womwikulu alachila khunyalilwe mumilimo chiefwe. Khuli abakhalabanibe, ne khutsia okhuchaaka okhumbakha. Nebutswa inywe mubulakhwo omukabo kwosi kwosi mu Yeresalemu, khandi shimulikhwo nomukabo khumilukha chalio chiosi tawe.”