Read wanga NEHEMIA 3 Bible Online

NEHEMIA 3 - wanga bible

NEHEMIA 3

¹Lisiisi lielitookho liombakhwa liri nanwa: Eliashibu Omwisaaliisi Omukhulundu nende abesaaliisi bashie bombakha obuyia eshiliibwa eshilangwa mbu Eshiliibwa shia Amakondi. Bashisaayila nibashiahula, ne nibasinjisia emiliango chiashio mubwikhalo bwashio. Bashiahula okhuchaachila khumunaara okulangwa mbu Omunara kwa Eshikhumi (100), nende khumunaara okulangwa nbu Omunara kwa Hananeli.

²Abandu beshialo shia Yeriko nibo abombakha obuyia lisiisi lialondakhwo. Naye Zaka omusiani wa Imuri niyombakha obuyia lisiisi lialondakhwo.

³Abolwibulo lwa Hasena bombakha obuyia lisiisi lieshiliibwa eshilangwa mbu, Eshiliibwa shia Tsinyeni. Basinjisia ebitiisi nende emiliango mubwikhalo bwabio khandi nibakhomakhwo obupata nende emiyinjilo, ebiokhwikala eshiliibwa eshio.

⁴Meremotsi omusiani wa Uria, omwitsukhulu wa Hakozi niye owombakha obuyia lisiisi lialondakhwo. Meshulamu omusiani wa Berekia khandi owali omwitsukhulu wa Meshezabeli yombakha obuyia lisiisi lialondakhwo. Zadoki Omusiani wa Bana yombakha obuyia eshibanga shialondakhwo.

⁵Abandu ba Tekoa nibo abombakha obuyia lisiisi lialondakhwo, nebutswa abandu boluyali, abomwitaala elo baloba okhukhola emilimo chiamakhono echio hasi wabasinjilili babwe.

⁶Yoyada omusiani wa Pasea nende Meshulamu omusiani wa Besodeya bombakha obuyia eshiliibwa eshilangwa mbu, Eshiliibwa Eshikhulu, nibasinjisia ebitiisi biashio, nende emiyinjilo, nibakhoma emiliango nende ubupata bwokhwikala emiliango echio.

⁷Melatia okhurula Gibeoni, Yadoni okhurula Meronotsi nende abandu ba Gibeoni nende aba Mizipa bombakha obuyia lisiisi lialondakhwo okhuula hango womuruchi wolukongo lwa Mumbo womwalo kwa Yufurate.

⁸Uzieli omusiani wa Arihayia omwiraanyi weitsahabu yombakha obuyia lisiisi lialondakhwo. Hanania, owakaasinjia amafura akeshing'aari yombakha obuyia lialondakhwo okhuula khwisiisi libambuukhu.

⁹Refayia omusiani wa Huri, owarukanga inusu yeshipaari shia Yerusalemu yombakha obuyia lisiisi lialondakhwo.

¹⁰Yedaya omusiani wa Harumafu yombakha obuyia lisiisi lialondakhwo.

¹¹Malikiya omusiani wa Harimu nende Hashubu omusiani wa Pahatsi-Moabu bombakha obuyia lisiisi lialondakhwo khandi nibombakha omunaara okulangwa mbu Omunaara kwa Amayika.

¹²Shalumu omusiani wa Haloheshi, owarukanga inusu yeshipaari shindi shia Yerusalemu, yombakha obuyia lisiisi lialondakhwo. Abakhaanabe bakhonyelela emilimo echio.

¹³Hanuni nende abamenyanga mwitookho lia Zanoa bombakha obuyia lisiisi lia eshiliibwa eshilangwa mbu Eshiliibwa shia Libanda. Basinjisia emiliango mubwikhalo bwachuio mana nibakhoma obupata nende emiyinjilo khulwa okhwikalanga ebiliibwa ebio, khandi bombakha obuyia lisiisi elihela tsimita ebikhumi bine nende amakhumi kane (440) okhuula khushiliibwa shilangwa mbu Eshiliibwa shia Amasingo.

¹⁴Malikiya omusiani wa Rekabu, owarukanga eshipaari shia Betsi Hakeremu, yombakha obuyia eshiliibwa shilangwa mbu Eshiliibwa shia Amasingo. Yasinjisia emilingo mubwikhalo bwachio ne nakhomakhwo obupata nende emiyinjilo chiokhwikalanga eshiliibwa eshio.

¹⁵Shalumu omusiani wa Kolihoze, owali omuruchi weshipaari shia Mizipa, niye owombakha obuyia Eshiliibwa shilangwa mbu Eshiliibwa shia Isebele. Yekalaho emiliango nachisinjisia mubwikhalo bwachio ne nakhomakhwo obupata nende emiyinjiilo. Yombakha obuyia lisiisi lielitiba lingwa mbu Litiba lia Shela, eliali hambi khumukunda kwomuruchi, okhuula khumaniinilo kabeshelangakhwo okhurula khwitookho lia Daudi.

¹⁶Nehemia omusiani wa Azibuki, owarukanga inusu yeshipaari shia Betsizuri niye owombakha obuyia lisiisi lialondakhwo, okhuula khushilindwa shia Daudi, khwitiba nende okhuula mukambi yabelihe bamenyangamwo.

¹⁷Abalawi balondakhwo bano nibo abombakha obuyia ebibanga bielisiisi ebinji bilondakhwo bino: Rehumu, omusiani wa Bani niye owombakha lisiisi lialondakhwo, Hashabia, owarukanga inusu yeshipaari shia Keyila niye owombakha lisiisi lialondakhwo mushilenje shiabandu beshipaarishie okhumbakha.

¹⁸Bawayi, omusiani wa Henadadi, owarukanga inusu yindi yeshipaari shia Keyila niye owombakha lisiisi lialondakhwo.

¹⁹Ezeri omusiani wa Yeshwa, owali omuruchi wa Mizipa niye owombakha lisiisi lialondakhwo elihengaane nende inzu yebimanulwa, okhuula habundu ahalisiisi likotoshelanga.

²⁰Baruki omusiani wa Zabayi niye owombakha lisiisi lialondakhwo okhuula habwinjililo bweinzu ya Eliashibu, Omwisaaliisi Omukhongo.

²¹Meremotsi, omusiani wa Uria khandi owali omwitsukhulu wa Hakozi niye owombakha lisiisi lialondakhwo okhurula hamuliango okhuula khundulo khweinzu ya Eliashibu.

²²Abesaaliisi balondakhwo bano nibo abombakha obuyia lisiisi lialondakhwo: Abesaaliisi abamenyanga hambi nende Yerusalemu bombakha lisiisi lialondakhwo.

²³Benjamini nende Hashubu bombakha obuyia lisiisi lialondakhwo, eliali imbeli wetsinzu tsiabwe. Azaria omusiani wa Maseyia khandi owali omwitsukhulu wa Anania yombakha lisiisi lialondakhwo, eliali imbeli weinzuye.

²⁴Binuyi, omusiani wa Hanadadi yombakha lisiisi lialondakhwo, okhuchaachila khunzu ya Azaria okhuula khukoona yelisiisi elo.

²⁵Palali, omusiani wa Uzayi niye owombakha lisiisi lihengaane nende ikoona nende omunara okutsobelilanga nikuhenjile ikulu weinzu yomuruchi, okuli hambi nende olwanyi lwabalindi. Naye Pedayia, omusiani wa Paroshi

²⁶nende abakhalabani bomuhekalu, abali nibamenya khushikulu shia Ofeli nibombakha lisiisi lialondakhwo okhuula habundu ahahengaane nende eshiliibwa shilangwa mbu Eshiliibwa shia Amaatsi, eshili ebukwe womunara omurambi kwabalindi beihekalu.

²⁷Abandu ba Tekoa bombakha lisiisi lialondakhwo, eliali liakhabili okhurula habundu ahahengaane nende omunara omukhongo khandiomurambi kwabalindi beihekalu, okhuula khwisiisi liali hambi nende Ofeli.

²⁸Abesaaliisi bombakha lisiisi liali emukulu weshiliibwa shilangwa mbu Eshiliibwa shia Ifarasi. Buli omwisaaliisi yombakhanga lisiisi elihengaane nende inzuye.

²⁹Zadoki, omusiani wa Imeri yombakha obuyia lisiisi lialondakhwo, eliali imbeli weinzuye. Shemayia omusiani wa Shekania, owali omulindi weshiliibwa shilangwa mbu Eshiliibwa shia Ebukwe yombakha lisiisi lialondakhwo.

³⁰Hanania, omusiani wa Shelemia nende Hanani, omusiani wa khasasaba wa Zalafu bombakha lisiisi lialondakhwo, eliali lisiisi liabwe liakhabili okhumbakha. Meshulamu, omusiani wa Berekia yombakha lisiisi lialondakhwo, eliali imbeli weinzuye.

³¹Malikiya omwiraanyi weitsahabu yombakha lisiisi lialondakhwo okhuula khunzu yekhoonyelungwa nabakhalabani bomuhekalu nende abakholi bobukhala, eyali imbeli weshiliibwa shilangwa mbu Eshiliibwa Eshikhongo, eshiali hambi khushisika shiomukoona shiemasaba.

³²Aberaanyi beitsahabu nende abakholi abobukhala bombakha lisiisi liokhumalilisia, okhuchaachila khushisika eshiali mukoona okhuula khushiliibwa shilangwa mbu Eshiliibwa shia Amakondi.