Read wanga NEHEMIA 4 Bible Online

NEHEMIA 4 - wanga bible

NEHEMIA 4

¹Olwa Sanibalati yahulila mbu, ifwe Abayahudi khwali nikhuchaachile okhumbakha lisiisi obuyia, yakhusinyishila muno ne nachaaka okhukhutseshelela.

²Nali imbeli wabashie nende imbeli wabelihe ba Abasamaria, yaboola ari, “Abayahudi abateshele bano bakholanga shiina? Bateemanga okhumbakha litookho obuyia noho? Baparaanga mbu, khulwa okhumala emisango banyala okhumala omulimo okwo kwosi khunyanga ndala noho? Banyala okhukaasia amachina kokhumbakha okhurula mubituuli biamachinjini akasambwa nikalikulukha ako noho?”

³Tobia Omuamoni yali nasinjiile hambi ninaye, ne naboola ari, “Bombakhanga shiina? Kata libwe niliniinakhwo nilibungulusia hasi lisiisi lia bombakhanga elo!”

⁴Ndasaaya nemboola endi, “Iwe OMWAMI Nyasaye, hulilakhwo shinga olwa khuchaaywa! Khola amanyeko ako kabakalushe abeene. Okhole banuulwe buli eshia bali ninashio mana bayilwe mubuhambe mushialo eshicheni.

⁵Shiolababeela tsimbabasi kata okhwibilila obwonooni bwabwe ta, shichila bakhunyechile ifwe abombashi.”

⁶Mana nikhutsiililila okhumbakha lisiisi, ne bwangu bwene niliula inusu yoburambi bwalio, shichila abandu bombakha nomwoyo kwosi.

⁷Nebutswa olwa Sanibalati, Tobia, Abaarabu, Abaamoni nende Abaashidodi bahulila mbu, khwali nikhutsiilililanga obulayi nobumbashi bwelisiisi lia Yerusalemu, khandi mbu tsinzafwa tsiali khumasiisi tsiali nitsiikalungwa, basinyikha muno.

⁸Kho basanjilana boosi halala mbu, betse baseere Yerusalemu mana balikoyaasie.

⁹Nebutswa khwasaaya Nyasaye wefwe, nikhuraho abandu okhulinda litookho eshilo neshiteere.

¹⁰Abandu ba Yuda beyiniakana nibaboola bari, “Amaani akokhuchinga amachinjini amasiro kahwele, nako amachinjini tsana kashili butswa amanji. Nakhunyale khurie okhumbakha lisiisi inyanga yino?”

¹¹Abasuku befwe bapaara mbu, shikhulabalola kata okhumanyakhwo eshindu shiosi shiosi ta, okhuula olwa bakhuulakhwo nibakhwira nende okhusinjisia emilimo chiefwe.

¹²Abayahudi bali nibamenya mubasuku befwe betsa akhandi ekhumi nibakhuchetsiyinjia nibaboola bari, “Balamuseera okhurulila tsimbeka tsiosi.”

¹³Kho ndahelesia abandu tsinganga, amafumo, nende obuyingo, mana nibaraho okhulondana nende abiliibwa biabwe namukongo welisiisi liali nilishiumbakhungwa.

¹⁴Ndalola mbu, abandi bariire, kho nemboolela abandu abo, abemilisi babwe nende abakhongo babwe endi, “Shimularie abasuku befwe ta. Mwitsulile shinga olwa OMWAMI Nyasaye wefwe ali omukhongo khandi owamarisia, mana mulwanile abekho benywe, abaana benywe abasiani nende abakhaana bamwebula, abakhasi benywe nende amataalakenywe.”

¹⁵Abasuku befwe bahulila mbu, khumanyile aka bali nibarechekhanga okhukhukholela, khandi nibamanyilisia mbu, Nyasaye yali nafukuule aka bali niberecheeshe okhukhola. Mana fwesi nikhukalukha nikhutsiililila okhumbakha obuyia lisiisi, buli mundu khumulimokwe.

¹⁶Okhurula inyanga eyo, inusu yabandu banje bombakhanga lisiisi, nayo inusu yabandu bandi nibasinjila okhubalinda nibemanuule amafumo, ebikhumba, obuyingo nende ebitsengwa. Abakhongo befwe nibakhoonya abandu ba Yuda boosi,

¹⁷abali nibombakhanga lisiisi. Abachinganga ebindu biokhumbakha bachinganga nomukhono mulala, nakwo okundi nikutiilile eshimanulwa.

¹⁸Khandi buli omumbashi yabohanga olukanga khukhukunyu olwa aba nakhola emilimo. Nebutswa owokhukhupa olwika yalinji ahambi ninasi.

¹⁹Mana nemboolela abandu nende abakhongo babwe nende abemilisi babwe endi, “Emilimo neminji khandi chisalaanile buli habundu khwisiisi, chikholanga buli mundu naba ehale okhurula khuwashie.

²⁰Hosi hosi aha muhulila olwika nilukhupwa, mwitseho khube halala. Nyasaye wefwe alakhulwanila!”

²¹Kho buli inyanga mumabwibwi obukwe nibusheba okhuula khubwile, tsing'ining'ini nitsirula, inusu khwifwe bakholanga emilimo khwisiisi nabo abandi inusu nibasinjiile namafumo okhukhulinda.

²²Mubise ebio ndaboolela abandu bali nibasinjiliile emilimo mbu, mushilo, bo halala nende abakhoonyi babwe bakonenje nibali meeso mu Yerusalemu kho mbu, khunyale okhulinda litookho mushilo ne mushiteere nikhukhola emilimo.

²³Isie omwene noho abashianje kata abalindi banje shikhwafwalulakhwo tsingubo tsiefwe mushilo tawe. Ne buli mundu yalinji neshimanulwashie mumukhono, kata olwa yatsitsanga okhwenda amaatsi.