Read wanga NEHEMIA 5 Bible Online

NEHEMIA 5 - wanga bible

NEHEMIA 5

¹Olunyumakhwo, abandu abanji abasaatsa nende abakhasi beyiniakana muno khulwa Abayahudi bashiabwe.

²Balala khubo baboola bari, “Ifwe okhuula khuhebwe imele eyokhulia inyinji, kho mbu khubeho mwoyo, shichila ifwe abeene nende abaana befwe abasiani nabakhaana khuli abanji.”

³Nabo abandi khubo nibaboola bari, “Khunichilisibungwa okhuhaana emikunda chiefwe okhuba omusingo, emikunda chiemitsabibu, nende tsinzu tsiefwe khulwa okhunyoola imele yikhuhela mutsinyanga tsieinzala.”

⁴Abandi khubo khandi baboola bari, “Khwiholile amapesa okhurunga obushuru khumuruchi khulwa emikunda chiefwe, nende emikunda chiemitsabibu.

⁵Ne khuli abandu boluyia lulala, olwa Abayahudi, abaana befwe bali butswa shinga ababwe. Nebutswa ifwe khunichilisibungwa okhukhola abaana befwe okhuba abasumba. Balala khubaana befwe abakhaana bamalile okhukusibwa okhuba abasumba. Shikhuli nobukhoonyi bwosi bwosi ta, shichila emikunda chiefwe nende emikunda chiefwe chiemitsibibu chimalile okhubukulwa okhurula khwifwe.”

⁶Nasi olwa ndahulila okhwiyiniakana khwabwe nende amakhuwa ako ndasinyikha.

⁷Nendola mbu, okhuula ekholekhwo eshindu. Ndahalabila abomunzu yoburuchi nende abakhongo babandu, nebaboolela endi, “Mubanzanga injelesio okhurula khubayahudi bashienywe mbushiina!” Kho nenaanga omukhung'ano omukhongo khulwa okhukaasia amakhuwa ako,

⁸nebaboolela endi, “Ifwe khwateemile shinga olwa khunyala okhununula Abayahudi bashiefwe, abali nibakusibwa khubarende. Nebutswa inywe bulano mukusinjia Abayahudi bashienywe kho mbu, ifwe khubakule.” Abemilisi abo nibaholeela tsi, shibaalikhwo nende elia baboola tawe.

⁹Mana nemboola endi, “Mukholanga amakhuwa amabi! Mukhoyile okhuhelesia Nyasaye oluyali nende okhukhola akobulunjishi. Shimulakhola abasuku befwe nende abamahanga kandi okhuba neshifune shiokhukhunyeka ifwe tawe.

¹⁰Okhumeetakhwo, isie mwene, nende abasiani befwe nende abakhalabani banje khwahosia abashiefwe amapesa nende imele. Ne shikhulabarunjiakhwo injelesio tawe.

¹¹Leelo luno mubakalusilie emikunda chiabwe chiemisabibu, emiseituni nende tsinzu tsiabwe. Mubakalusilie obukhumi obwamapesa kabwe, imele yabwe, idivai yabwe nende amafura akemiseituni, ebia mwali nimwabukula okhurula khubo.”

¹²Abemilisi abo nibakalusia bari, “Khulakhola akoboolile. Khulabakalusilia ebindu biabwe, ne shikhulateemakhwo okhubanza amakofi kefwe tawe.” Ndalanga abesaaliisi okhwitsa imbeli, nabo abemilisi boosi nibetsuba imbeli wabwe mbu balalinda aka bali nibakhasuubia.

¹³Mana nemboholola omushipi kwa ndali nindiboyile mushishienje ne nisakusula[4] nemboola endi, “Nyasaye alasakusula ario omundu yesi yesi khwinywe oulalinda obusuubisie buno tawe. Nyasaye alabukula tsinzu tsienywe nende buli shindu shia muli ninashio mana amuleshe butswa eshikhaya.” Buli mundu wali naliho yakalusia ari, “Kabe kario!” Mana nibetsoomia OMWAMI Nyasaye. Ne abemilisi abo nibalinda obusubisie bwabwe.

¹⁴Khulwa emiyika ekhumi nachibili chiosi echia ndali omukafuna weshialo shia Yuda, okhuchaachila khumuyika kwamakhumi kabili Aritashasita nali omuruchi, okhuula khumuyikakwe kwamakhumi kataru nakhabili, abekho banje kata isie mwene, shindaliakhwo eshiokhulia eshilayi shia ndali nekhoyile okhulia shinga omuruchi tawe.

¹⁵Nebutswa abaruchi abaaranjilila imbeli basandia abandu muno khandi barunjinjia abandu ebitonye amakhumi kane ebieifetsa buli khunyanga khulwa ebiokhulia nende idivai yomuruchi. Kata abakhalabani babwe boosi basandinjia abandu. Nebutswa isie shindakholakhwo ako ta, shichila ndahelesinjia Nyasaye oluyali.

¹⁶Ndalumilila okhumbakha obuyia lisiisi lieihekalu, shindabukulakhwo emiandu chiosi chiosi tawe. Buli mundu, owakhalabanilanga yaakhoonya okhumbakha obuyia lisiisi.

¹⁷Okhumeetakhwo, buli lwosi ndalisinjia abandu khumeesa yanje. Abayahudi halala nende abemilisi babwe abahela eshikhumi shilala nende amakhumi karano (150), abandu bandi boosi abetsanga khwisie okhurula mumahanga kandi akali nikakhubotokhana ifwe nibabulakhwo.

¹⁸Buli nyanga ndasinzanga ihunwa ndala, amakondi amalayi kasasaba, nende tsingokho tsinyinji, khandi buli olunyuma lwetsinyanga ekhumi ndahaananga idivai indoro. Nebutswa okhuba ndali nindamanya obusiro bwabandu bali ninabwo, kho shindareebanga omurungo kwosi kwosi okwomukafuna okhoyile okhunyoola tawe.

¹⁹Bulano iwe Nyasaye wanje, yitsulila amakhuwa koosi aka ndakholela abandu bano mana unaamile ikhabi.