Read wanga NEHEMIA 6 Bible Online

NEHEMIA 6 - wanga bible

NEHEMIA 6

¹Olwa Sanibalati, Tobia, Geshemu, owali Omwarabu nende abasuku befwe boosi babulila mbu, khwali nikhumalile okhumbakha lisiisi khandi mbu, tsinzafwa tsiosi tsiali nitsikaalwe, (kata kario khwali nikhushili okhusinjisia ebiliibwa mubwikhalo bwabio),

²Sanibalati nende Geshemu baruma oburume nibaboola bari, “Itsa khwakaane ninawe mwitaala elala khukali mumuhololokhwe kuli Ono.” Nebutswa bali niberechekhanga okhuusaalisia.

³Kho ndabarumila abarume nemboola endi, “Endi khumulimo omukhongo, shienyala okhukholomokha okhwitsa eyo tawe. Shienyala okhulekha omulimo okhusinjila shichila mbu, nditsanga okhumulola inywe tawe.”

⁴Baarumila oburume obwo akhandi khane, ne buli olwa burumanga, ndabakalusinjia likalusio elala elo.

⁵Mana Sanibalati naruma mulala khubakhalabanibe khwisie noburume obwolukhola akhandi kharano, buno bwali mubarwa eyilafuuniikhwe tawe.

⁶Yalimwo oburume bwaboola buri: “Geshemu yamboolelanga mbu, amakhuwa kachendanga nikaboolekha mutsimbia tsiabandu bamenyile mushialo mbu, iwe nende Abayahudi mwenyanga okhukhola induli, niko akachila nimumbakha obuyia lisiisi. Kaboolekhanga khandi mbu, iwe wirechekhanga okhuba omuruchi,

⁷khandi mbu, orecheeshe abalakusi bandi okhulakula mu Yerusalemu mbu, niwe omuruchi wa Yuda. Khandi kalahulilikha khumuruchi Aritashasita wa Parisia, kho isie ninawe khukhoyile okhwakaana khukasie amakhuwa kano.”

⁸Ndamurumila likalusio nemboola endi, “Libulakhwoho elioboolanga elili liobwatoto tawe. Niwe omwene owakhalonga butswa amakhuwa ako.”

⁹Bateemanga butswa okhukhuriisia kho mbu, khuleshe emilimo. Nebutswa ndasaaya Nyasaye mbu, yambelesie amaani!

¹⁰Inyanga yindi ndatsia okhucheniya Shemayia omusiani wa Delayia, omwitsukhulu wa Mehetabeli, owali niyekalilwa munzumwe. Shemayia niyamboolela ari, “Chenda khutsie khwakaanile munzu ya Nyasaye, muhekalu mukari, mana khwikale emiliango, shichila mushilo shino betsanga okhukhwira iwe.”

¹¹Nasi nemukalusia endi, “Omusaatsa shinga isie shienyala okhwilukha mbu, ndifise ta! Noho kata okhutsia muhekalu kho mbu, ehohokosie obulamu bwanje tawe! Shienziamwo tawe.”

¹²Olwa ndayililisia khumakhuwa ako ndamanyilisia mbu, Nyasaye shiyali naboolilekhwo nende Shemayia ta, habula Sanibalati nende Tobia bali nibamuhelesiye eshiomufuusi khulwa okhufukula isie.

¹³Bamuhelesia eshiomufuusi kho mbu, yariisie ekhole obwonooni, kho bonoone eliira lianje nende okhusasia oluyali lwanje.

¹⁴Ndasaaya nemboola endi, “Nyasaye yitsulila aka Tobia nende Sanibalati bakholile mana obahelesie eshinyasio. Yitsulila khandi omulakusi omukhasi mbu Naodia nende abalakusi bandi abateema okhuuriisia.”

¹⁵Kho lisiisi liamalwa khunyanga yamakhumi kabili nende kharano, eya mumwesi kwa Eluli, tsiosi halala tsiali tsinyanga amakhumi karano natsibili.

¹⁶Olwa abasuku befwe ba amahanga akakhubotokhana boosi bahulilakhwo amakhuwa ako, baria khandi nibafwa omwoyo, shichila bamanyilisia mbu, Nyasaye wefwe yakhukhoonya okhukhola omulimo okwo.

¹⁷Mutsinyanga etsio tsiosi, abemilisi ba Abayahudi boosi bahandichilanga Tobia tsibarwa nibasungana ninaye.

¹⁸Abandu abanji Ebuyahudi bali khulubekalwe, shichila yali niyateeshia omukhaana wa Shekani, omusiani wa Ara, Omuyahudi. Okhumeetakhwo, omusianiwe mbu, Yehohanani yali niyateeshia omukhaana wa Meshulamu, omusiani wa Berekia.

¹⁹Abandu bamboolelanga amakhuwa amalayi koosi aka Tobia yakholanga, khandi bamuboolela koosi aka ndaboolanga. Naye yatsiililila okhuurumila tsibarwa khulwa okhuuriisia.