Read wanga NEHEMIA 8 Bible Online

NEHEMIA 8 - wanga bible

NEHEMIA 8

¹Okhuula khumwesi kwa musafu Abaisiraeli boosi bali nibamalile okhuchaaka okhumenya mumataala kabwe. Khunyanga yambeli eyo mumwesi okwo, abandu boosi bakhung'ana halala mu Yerusalemu mushikuri eshili mushiliibwa eshilangwa mbu, Eshiliibwa shia Amaatsi. Abandu baboolela Ezira, owali omwisaaliisi khandi omwechesia wa Amalako ka OMWAMI Nyasaye yali niyahelesia Abaisiraeli okhubirila khu Musa mbu, areere eshitabu shia Amalako.

²Kho Ezira nareera eshitabu eshio ewabandu bali nibakhung'anile, omukanda okwo kwalimwo abasaatsa, abakhasi halala nende abaana bali nibanyala okhuhulila Amalako ako.

³Habwene yaho mushikuri eshili mushiliibwa eshilangwa mbu, Eshiliibwa shia Amaatsi, Ezira yabasoomela Amalako ako nomwoyo omukhongo okhurula mumabwibwi okhuula mushiteere hakari. Ne abandu boosi barecheresia obulayi olwa Amalako ako kasoomwa.

⁴Ezira yasinjila habundu hachinguukhu khushindu shiali nishikhomilwe okhurula khutsimbao khulwa omulimo okwo. Abasaatsa abasinjila khulubeka lwomukhonokwe musaatsa bali Matitsia, Sheema, Anayia, Uria, Hilikia, nende Maaseya. Nabo abasinjila khumukhonokwe mukhasi bali, Pedayia, Mishayeli, Malikiya, Hashumu, Hashibadana, Zekaria nende Meshulamu.

⁵Ezira yasinjila khushindu shiokhusoomelakhwo amalako eshio, okhwa buli mundu yanyalilwa okhumulola. Boosi bamuraangaala. Ne olwa yabambula eshitabu eshio, abandu boosi basinjila.

⁶Mana Ezira naboola ari, “OMWAMI Nyasaye yetsoomibwe, Nyasaye nomukhongo!” Abandu boosi nibachinga amakhono kabwe ikulu ne nibakalusia bari, “Amina! Amina!” Nibasikama nibenamia obweni bwabwe okhuula hasi.

⁷Mana abandu nibabuukha nibasinjila habundu yaho, nabo Abalawi balondakhwo bano nibenoosilia abandu Amalako: Yeshwa, Bani, Sherebia, Yamini, Akubu, Shabetsayi, Hodia, Maaseya, Kelita, Azaria, Yozabadi, Hanani nende Pelayia.

⁸Basooma okhurula mushitabo nibakalula[5] obulayi Amalako ako, mana buli mundu nahulila obulayi nende okhumanyilisia eshisina shiako obulayi.

⁹Olwa abandu bahulila amakhuwa ka Amalako ako koosi, kabasamba mumioyo muno nibachaaka okhulila. Kho Nehemia, owali omukafuna, nende Ezira, owali omwisaaliisi khandi omwechesia wa Amalako nende Abalawi bali nibenoosinjia Amalako, baboolela abandu boosi bari, “Inyanga yino niyinyanga indakatifu khu OMWAMI Nyasaye wenywe, kho shimulekhuula kata okhulila tawe.

¹⁰Bulano kalushe ingo mana mukhole lisabo. Mulie ebiokhulia bienywe ebinulu nende okhunywa idivai indayi, ne mukabane ebindu nende ababula eshindu. Inyanga yino niyinyanga indakatifu khu OMWAMI wefwe, kho shimulabeleelakhwo tawe. Okhuba Obusaangaafu bwa OMWAMI Nyasaye amuhelesinjia bulamukhola okhuba abamaani.”

¹¹Kho Abalawi bahotselesia abandu nibababoolela bari, “Muholeele, shimulekhuula ta, okhuba inyanga yino ninyanga indakatifu.”

¹²Abandu boosi nibakalukha ingo, nibalia nende okhunywa nibasaangaala khandi nibakabana ebia bali ninabio nende abandi, shichila bali nibamanyilisiye aka bali nibasoomeelwe.

¹³Inyanga yakhabili eyomumwesi kwa musaafu okwo, abemilisi babebiliibwa boosi halala nende abesaaliisi nende Abalawi bakhung'ana halala nibatsia khu Ezira omwechesia wa Amalako, khulwa okhusoma nende okhumanyilisia Amalako ako.

¹⁴Banyoola mbu, Amalako ka OMWAMI Nyasaye yahaana okhubirira khu Musa, kalachilisia abandu ba Isiraeli okhumenya mumatili mutsinyanga tsielisabo lia Amatili.

¹⁵Kho nibahaana amebaalo kalondakhwo kano nende okhukatswania mu Yerusalemu nende mumatookho nende mumataala kandi nibaboola bari, “Tsie khubikulu mana mureere amasaka kemiseituni nende aka emiseituni chia nabulimo, amaru kamaremwa, aka amashindu, nende amasaka kemisaala chindi emitendemu khulwa okhumbakha amatili okhulondana nende amebaalo kahandikwa mu Amalako ako.”

¹⁶Kho abandu nibatsia nibareera amasaka ako, ne nibekasilia abeene amatili khubilama bietsinzu tsiabwe, mutsinyanyi tsiabwe, mulwanyi olweihekalu nende mushikuri shieshiliibwa shilangwa mbu, Eshiliibwa shia Amaatsi, nako akandi hashiliibwa shilangwa mbu, Eshiliibwa shia Efuraimu.

¹⁷Abandu boosi abali nibacheleele okhurula mubuhambe bombakha amatili ne nibamenyamwo. Luno nilwo olwali olwembeli Abaisiraeli okhwikhoya okhurula mutsinyanga tsia Yoshwa, omusiani wa Nuni. Abandu boosi bekhoya nibasaangaala muno.

¹⁸Buli nyanga, okhurula khunyanga yambeli okhuula khu yokhumalilikha, basoomanga okhurula mushitabo eshio eshitonye shiamalako ka Nyasaye. Balia lisabo elo khulwa tsinyanga musafu, ne khunyanga yomunane bakhola omulukha kwokhumalilisia shinga olwa kahandikwa mumalako.