Read wanga NEHEMIA 9 Bible Online

NEHEMIA 9 - wanga bible

NEHEMIA 9

¹Khunyanga yamakhumi kabili nende khane, eyomumwesi kwa musafu okwo, Abaisiraeli bekhung'asia halala nibahonga inzala khulwokhusaaya, khandi nibefwala tsingubo tsiamakunia, nibepuuka olufu khumirwe chiabwe khulwa okhulolesia mbu, babeeleele muno khulwa obwonooni bwabwe.

²Abolwibulo lwa Isiraeli, beyahula abeene okhurula khubarende. Basinjila habundu wabwe ne nibeyama obwonooni bwabwe nende obumayanu bwabakuuka babwe.

³Basoomelwa eshitabo shia Amalako aka OMWAMI Nyasaye wabwe khulwa masa kataru, ne masa kandi kataru kalondakhwo, beyama obwonooni bwabwe, nibenamila OMWAMI Nyasaye wabwe khulwa masa kataru kalondakhwo.

⁴Mana Yeshwa, Bani, Kadimieli, Shebania Buni, Sherebia, Bani, nende Kenani nibasinjila habundu ahachinguukhu aha Abalawi, ne nibasaaya nomwoyo omukhongo khu OMWAMI Nyasaye wabwe.

⁵Abalawi balondakhwo bano, Yeshwa, Kadimeli, Bani, Hashabuneya, Sherebia, Hodia, Shebania nende Petsahia baboolela abandu bari, “Sinjile mwitsoomie OMWAMI Nyasaye wenywe, mumwitsoomie obushia nobushia! Abandu boosi betsoomie eliira lia OMWAMI Nyasaye lioluyali, elili elioluyali nende tsikhabi okhushila obwitsoomi bwosi.”

⁶Mana Ezira nasaaya naboola ari, “Iwe OMWAMI Nyasaye, niwe Nyasaye wenyene, niwe owalonga likulu nende ebilonje bindi bilimwo biosi pe. Walonga eshialo, nende ebilimwo biosi pe, walonga inyanza nende ebilimwo biosi pe, nawe niwe oubihelesinjia obulamu nibiba mwoyo, khandi ebilonje biomwikulu biosi pe bikhwinamilanga iwe.

⁷Iwe niwe OMWAMI Nyasaye, niwe owaahula Aburamu ne nomurusia mushialo shia Uri mu Babuloni, mana nokalukhasia eliiralie okhuba Aburahamu.

⁸Wamunyoola okhuba omwisiikwa imbeliwo, ne nokhola Indakano ninaye, nomusuubisia okhumuhelesia eshialo shia Abakanani, Abahiti nende Abamori, Abaperisi, Abayebusi nende Abagirigashi. Nawe nomala nobakholela shinga olwa wabasuubisia, shichila iwe oli omwisiikwa.

⁹Walola shinga olwa abakuuka befwe banyakhana olwa bali nibali mushialo shia Misiri, khandi shinga olwa bakhuhabila iwe nibenya obukhoonyi nibali khunyanza Inzakhanyu.

¹⁰Wakhola amangalimwa kokhuhuchisia khumuruchi wa Misiri, khubakhalabanibe boosi nende khubandu beshialoshie boosi. Okhub wali niwamanya shinga olwa basandinjia abakuuka befwe. Kho niwinyoolela ifuma eyishiliho okhuula olwa leelo.

¹¹Wakabukhasiamwo inyanza imbeliwo, nabo nibabira hakari wayo, Ne nobambusiamwo khushialo eshiumu. Nebutswa iwe wenikha Abamisiri ababalondachilila mulusiba lwamaatsi, wabenikhamwo shinga lichinalisiro liyinikhanga mumaatsi amanji, munyanza yamarunda.

¹²Mushiteere iwe wabemililanga injila nende lileesi, ne mushilo wabemililanga nende mulilo, okhubakhosilia injila yokhulondakhwo.

¹³Mushikulu shia Sinai wekha okhurula mwikulu ne noboola nende abandubo. Nobahelesia amebaalo amalayi khandi nobahelesia amalako kahabwene.

¹⁴Okhubiririra khumukhalabaniwo Musa, wabeechesia okhulinda inyangayo ya Isabato okhuba Indakatifu, khandi nobalachilisia okhulinda amalakoko okhubiririra khumukhalabaniwo Musa.

¹⁵Olwa bali neinzala, wabahelesia emikaate okhurula mwikulu, ne olwa bali nobuloho, wabahelesia amaatsi okhurula mulwanda, wabalachilisia okhubukula eshialo shia wali niwasuubisia okhubahelesia.

¹⁶Nebutswa bo nende abakuuka befwe abo bechinjimisia, khandi niboma emirwe, nibalalonda amalakoko tawe.

¹⁷Baloba okhuhulila amalakoko, khandi nibebilila akamakana ka wabakholela. Khulwa isunga yabwe baahula omuruchi owokhubakalusia mubuhambe Misiri. Nebutswa iwe Nyasaye, oli omwangu wokhubeela abandu tsimbabasi, oli Nyasaye wobukoosia khandi wa tsimbabasi, shiosinyikhanga bwangu tawe. Oli nobuheeli obunji mana shiwabebala tawe.

¹⁸Kata olwa bekaasilia abeene omunyasaye oufwana shinga eshimoosi nibaboola bari, ‘Uno niye omunyasaye wefwe, owakhurusia ifwe mushialo shia Misiri!’ Mana nibanyeka OMWAMI Nyasaye muno.

¹⁹Nebutswa shichila tsimbabasitsio ni tsinyinji, shiwabalekha yaho mushitsiimi ta, shiwarusiaho lileesi noho omulilo, ebiabamanyinjia injila eshiteere nende eshilo tawe.

²⁰Wabahelesia Rohowo omulayi okhubebaalila aka bakhoyile okhukhola, wabahelesia imana okhuba eshiokhulia shiabwe nende amaatsi kokhunywa, kho mbu, obuloho buleshe okhubalia.

²¹Wabalinda mushitsiimi khulwemiyika amakhumi kane, khandi shibatambakhwo eshindu shiosi shiosi tawe. Ebifwalo biabwe shibiarandukhakhwo, kata ebilenje biabwe okhufimbakhwo tawe.

²²Wabakhola okhuhula amahanga kandi nende oburuchi, wabakhola oklhuhula ebialo bia baarananga olwakho ninabio. Bahula eshialo shia Heshiboni, eshiomuruchi Sihoni yarukanga, nende eshialo shia Bashani eshiomuruchi Ogu yarukanga.

²³Wabahelesia abaana abanji shinga tsing'ining'ini tsiomwikulu, khandi nobakhola okhuhula mana nibamenya mushialo eshio, eshia wali niwasuubisia abakuuka babwe okhubahelesia.

²⁴Khulweshio Abolwibulo lwabwe benjila mushialo eshio nibashibukula okhuba eshiabwe, bakhupa Abakanani bamenyanga mushialo eshio nibabahula. Wabahelesia obunyali okhukhola shinga olwa benya khubandu nende abaruchi beshialo shia Kanani.

²⁵Batiila nibabukula amatookho kabotokhanwa nende tsingoba, nende emikunda eminulu, nibabukula tsinzu etsietsulamwo ebindu ebinji ebilayi, babukula amayabo kamaatsi akali nikayabwa, emikunda chiemitsabibu nende echiemiseituni, halala nende emisaala eminji chiebiamo. Khulweshio balia nibekura khandi nibanera. Bekhooyela ebindu bia wabahelesia biosi.

²⁶ Nebutswa abandubo shiabaali abasuubuilwa khwiwe tawe. Bakhukholela iwe induli ne nibaloba okhukhuhulila; Baloba okhulonda Amalakoko. Beera abalakusi ababachetsiyinjia okhulekha okhukhola obwonooni, kho mbu bakhukalushile iwe. Nabo nibakhunyeka akhandi akhanji.

²⁷Kho nobahaana khubasuku babwe, nabo abasuku abo nibabasandia. Nebutswa olwa basandibwa bakhuhabila iwe, nawe nobahulila noli mwikulu. Ne khulwa tsimbabasitsio tsinyinji, wabarumila abemilisi bokhubahonokosia, nabo nibabanunula okhurula mumakhono kabasuku babwe.

²⁸Nebutswa olwa banyoola omulembe, bakhwonoonela iwe khandi, nawe nobalekha abasuku babwe okhubaruka. Kata kario olwa bekalukhasia nibalekha obwonooni bwabwe ne nibakhuhabila iwe, wabahulila noli mwikulu, Ne khulwa tsimbabasitsio tsinyinji wabahonokosia buli shise.

²⁹Wabachetsiyia kho mbu, bakalushe okhukhola akamalakoko kenya. Nebutswa, khulwa obwichinjimisi bwabwe, balekha okhulinda amalakoko, nibakhaya okhulonda ameebaaloko, nako niko akomundu akhoyile okhulinda kho mbu babeho mwoyo. Bekhola okhuba abemirwe emiumu, nibaba abamakosi amoomu ne nibakhaya okhuba abahulili.

³⁰Iwe wabesimilisilia khulwemiyika eminji, nobachetsiyia khulwomwoyokwo omulayi, okhubirira khubalakusibo. Nebutswa abandubo bekala amarwi. Khulweshio iwe wabalekha nibarukwa nende amahanga kandi.

³¹Ne khulwa tsimbabasitsio tsinyinji, shiwabalekha noho okhubamulula tawe. Oli Nyasaye owobukoosia khandi owetsimbabasi!

³²Khulweshio iwe Nyasaye wefwe, oli Nyasaye omukhongo muno! Oli owamariisia muno khandi owobunyali muno! Iwe olindanga obusuubisie bwa Indakanoyo mubwisikwa. Okhurula olwa abaruchi ba Abasiria bakhusandia ifwe, okhuula bulano, khwakhanyakhana muno! Abaruchi befwe, abemilisi befwe, abesaaliisi befwe nende abalakusi befwe, abakuuka befwe nende abandu befwe boosi basandibwa. Yitsulila shinga lwa khwakhasandibwa!

³³Okholile habwene okhukhuhelesia eshinyasio. Iwe oli omwisiikwa khwifwe, kata olwa ifwe khuba nikhwonoonile.

³⁴Abakuuka befwe, abaruchi befwe, abemilisi befwe, nende abesaaliisi befwe, shibalonda Amalakoko tawe. Shibarecheresia okhuhulila amalakoko nende obuchetsiyibwo tawe.

³⁵Olwa bali muburuchi bwabwe abeene, shibakhukhalabanila iwe ta, kata olwa bali nibamenya mushialo shiobuyinda obunji shia wabahelesia. Nebutswa shibakhukhalabanila kata okhwikalukhasia okhurula mubwonooni bwabwe tawe.

³⁶Nebutswa lola, bulano khuli abasumba mushialo shia wahelesia abakuuka befwe kho mbu, baliekhwo ebiamo biashio, nende ebindu bindi ebilayi ebia khunyoolangamwo.

³⁷Khulwa obwonooni bwefwe, obuyinda bweshialo shino buheebungwa abaruchi abawaraho okhukhuruka ifwe. Bakhurukanga ifwe shinga olwa bachama, khandi emiruko chiefwe bachiikhoonyelanga shinga olwa benya, khuli mubunyakhani obukhongo muno.”

³⁸Khulwa amakhuwa kekholekha ako koosi, ifwe, abandu ba Isiraeli bulano khukhola indakano yokhuufchilisania eyilanyala okhufunakwa ta, nikhuchira mubuhandiche, nabo abemilisi befwe, Abalawi befwe nende abesaaliisi befwe, nibarakhwo eshibalikho.