Read wanga ESITA 1 Bible Online

ESITA 1 - wanga bible

ESITA 1

¹Omuruchi Ahasuwero yarukanga ebikwenyi eshikhumi shilala namakhumi kabili namusaafu (127), okhuurula India okhuula Etsiopia[2]

²Mutsinyanga etsio, litookholie likhulundu elia yamenyangamwo liali Susa.

³Ne mumuyika kwakhataru khwoburuchibwe, yakholela abakhulundube nende abalondibe lisabo. Abemilisi abelihe elia Perisia, elia Media nende abakhulundu nende abemilisi abetsingongo boosi baliho.

⁴Mana khulwa tsinyanga eshikhumi shilala namakhumi munaane (180) omuruchi yalolesia habulafu emiandu echielihangalie nende oluyali neifuma yachio chiosi.

⁵Olwa tsinyanga etsio tsiahwa, omuruchi yakholela abandu boosi, abayinda nende abatakha lisabo likhongo mwitookho lia Susa khulwa tsinyanga musaafu; liekholeshela mulwanyi lwomuruchi.

⁶Olwanyi olwo lwali nilusiayilwe obulayi nende tsingubo tsishinga tsindafu nende etsiabulu, etsiakasibwa okhurula khupamba. Tsingubo tsishinga etsio tsiali nitsiboyilwe nemishipi echia ikitani indorotoro eya isambarau khutsingaka tsieifetsa, etsiali khutsisiilo etsiali nitsiakasibwa khumachina amang'inang'inu. Ebifumbi biabekhalakhwo biali ebia itsahabu nende ifeetsa, biali khubwelu bwamachina amang'inang'inu, amakhanyu, amalafu, amamali khandi akobukusi obukhongo.

⁷Ebiokhunywa biahanwa mubikombe ebiahukhaane bieitsahaabu. Omuruchi yahana idivaiye yomuburuchi inyinji.

⁸Abulaho oweleshesia noho owanichilisibwa okhunywa, okhuba omuruchi yali nalachilisiye abakhalabani abeitookho mbu baleshe buli omundu anywe shinga olwa yenya.

⁹Naye Vashiti omukhaye womuruchi, yesi yali nakholeele abakhasi lisabo likhongo muitookho yomuruchi Ahasuwero.

¹⁰Mana khunyanga yomusafu eyelisabo elio, lwomuruchi yali natsaatsahalile khulwa okhunywa idivai, yalachilisia abakhalabanibe beene abalate musaafu; Mehumani, Bizitsa, Haribona, Bigitsa, Abagitsa, Zetsari nende Karikasi,

¹¹mbu bareere Vashiti omukhayewe, nali nolusimbilwe lwoburuchi, kho mbu yetse alolesie abandu nende abakhongo abo likondolie lilayi, okhuba omukhaye Vashiti yali owelikondo lilayi khandi eliokhuchamisia.

¹²Nebutswa, olwa abakhalabani abo baboolela Vashiti oburume obwo, omukhaye Vashiti yaloba okhutsia ewa omuruchi yali. Mana omuruchi nasinyikha muno.

¹³Kho omuruchi nareeba okhurula khubachesi okhulondana nende amakhuwa akamalako nende obukhalachi; kho nalanga abachesiyibe khulwa okhuhana obukhalachi bwahabwene.

¹⁴Abachesiyi abomuruchi yayinyanga okhureeba bali, Karishena, Shetsari, Adimatsa, Tarishishi, Meresi, Marisena nende Memukani, nibo abali abemilisi musaafu aba Perisia nende Media abali ahambi khumuruchi khandi abobunyali obukhongo muburuchi.

¹⁵Yareeba abasaatsa abo ari, “Okhulondana namalako, khumukholele shiina Omukhaye Vashiti? Okhuba shiakholile lilako elia isie Omuruchi Ahasuwero ndamurumile okhubirira khu abalate banje tawe?”

¹⁶Mana Memukani naboolela omuruchi nende abalondi ari, “Omukhaye Vashiti shiakholeele omuruchi yenyene obubi tawe, habula akholeele kata abalondi abomuruchi boosi nende abandu boosi abamenyanga mutsingongo tsiosi tsioburuchi buno.

¹⁷Okhuba bulano buli omukhasi muburuchi buno oulahulilakhwo amakhuwa aka Omukhaye Vashiti akholile, alachaaya omusaatsawe. Abakhasi balaboola mbu, ‘Kata Omuruchi Ahasuwero yalachilisia mbu Omukhayewe Vashiti yeetse imbeliwe, naye Vashiti naloba okhutsia.’

¹⁸Bulano okhurula inyanga yino, olwa abakhaye boosi aba abeemilisi aba Perisia nende Medi bahulila ifuma eya emiima echia Omukhaye Vashiti, balachaaka mubwangu inyanga yino niyishili okhuhwa, okhuboolela abasaatsa babwe. Abakhasi boosi buli habundu balachaya abasaatsa babwe, nabo abasaatsa balatilwa noburuma khu abakhasi babwe.

¹⁹Kho nikaba nikakhuchamisia iwe Omuruchi owoluyali, haana lilako liomuruchi habulafu khandi lihandikwe mumalako ka Perisia nende Media obulakalukhasibwa ta mbu, Vashiti aleetsakhwo imbeli womuruchi tawe. Ne wahule omukhasi undi welikondo lilayi okhushila Vashiti okhukalukha mushilenjeshie shinga Omukhaye womuruchi.

²⁰Mana olwa lilako liomuruchi lilarumbulwa nende okhutswanibwa buli habundu mulihangalie lino likhongo, buli omukhasi alahelesia omusaatsawe oluyali, abe omusaatsa omuyinda noho omumanani.”

²¹Likhuwa elio nilichamisia omuruchi nende abemilisi boosi, mana omuruchi nakhola shinga Memukani yali naboolile.

²²Yayila tsibarwa mutsingongo tsiosi tsie lihangalie. Tsibarwa etsio tsiahandikwa mululimi nende mubuhandiche bwa buli olukongo. Tsiahandikwamwo mbu, buli omusaatsa aruchenje abeinzuye khandi aboolenje mululimi lwabandube.